7 ಭಾಷೆಗಳಲ್ಲಿ ಉಪ್ಪಿ ಅಂಡರ್​​ವರ್ಲ್ಡ್​​ ಕಬ್ಜ..!

ಬೆಂಗಳೂರು : ರಿಯಲ್ ಸ್ಟಾರ್ ಉಪೇಂದ್ರ ಹಾಗೂ ಆರ್. ಚಂದ್ರು ನಿರ್ದೇಶನದ ಮತ್ತೊಂದು ಸಿನಿಮಾ ಘೋಷಣೆಯಾಗಿದೆ. ಕಬ್ಜ ಹೆಸರಿನ ಈ ಸಿನಿಮಾ, ಬರೋಬ್ಬರಿ ಏಳು ಭಾಷೆಗಳಲ್ಲಿ ಬರಲಿದೆ ಎಂದು ನಿರ್ದೇಶಕ ಆರ್.ಚಂದ್ರು ಘೋಷಣೆ ಮಾಡಿದ್ದಾರೆ. ವಿಶೇಷ ಅಂದ್ರೆ, ಇದೇ ಮೊದಲ ಬಾರಿಗೆ ಆರ್.ಚಂದ್ರು ಅಂಡರ್​​ವರ್ಲ್ಡ್​ ಕಥೆಯ ಸಿನಿಮಾ ಮಾಡ್ತಿದ್ದಾರೆ.

ಉಪೇಂದ್ರ ನಾಯಕನಾಗಿ ನಟಿಸ್ತಿರೋ ಈ ಸಿನಿಮಾದಲ್ಲಿ ಬಹುತಾರಾಗರಣ ಇರಲಿದೆ. ಬಹುಭಾಷೆಯಲ್ಲಿ ಮಾಡ್ತಿರೋದ್ರಿಂದ, ಬಹುಭಾಷಾ ತಾರೆಯರನ್ನೇ ಚಿತ್ರಕ್ಕೆ ಆಯ್ಕೆ ಮಾಡಿಕೊಳ್ಳುವ ಪ್ಲಾನ್​ ನಿರ್ದೇಶಕರದ್ದು. ನಾಯಕಿ, ಖಳನಾಯಕ, ಪೋಷಕರ ಪಾತ್ರಗಳು ಸೇರಿದಂತೆ ಬಹುತೇಕರು, ಬಹುಭಾಷಾ ನಟರೇ ಇರಲಿದ್ದಾರೆ.

ಉಪ್ಪೇಂದ್ರ ನಿರ್ದೇಶನ ಮಾಡಿ, ಕನ್ನಡ ಸಿನಿಮಾದಲ್ಲಿ ಹೊಸ ದಾಖಲೆ ಸೃಷ್ಟಿಸಿದ್ದ ಶಿವಣ್ಣ ಅಭಿನಯದ ಓಂ ಸಿನಿಮಾ ರೀತಿಯಲ್ಲಿ ಕಬ್ಜ ಮಾಡೋ ಪ್ಲಾನ್​ ನಿರ್ದೇಶಕ ಹಾಗೂ ಉಪ್ಪಿಗೆ ಇದೆಯಂತೆ. ಕನ್ನಡ, ತಮಿಳು, ತೆಲುಗು, ಹಿಂದಿ, ಮಲಯಾಳಂ, ಮರಾಠಿ ಹಾಗೂ ಬೆಂಗಾಲಿಯಲ್ಲಿ ಸಿನಿಮಾ ತಯಾರಿ ನಡೆಯಲಿದೆ.

ಒಟ್ಟಿನಲ್ಲಿ ಯಶ್​, ದರ್ಶನ್​, ಸುದೀಪ್​ ಬಳಿಕ ಈಗ ಉಪ್ಪಿ ಕೂಡ ಪ್ಯಾನ್​ ಇಂಡಿಯಾ ಸಿನಿಮಾ ಮಾಡ್ತಿರೋದು ಖುಷಿಯ ವಿಚಾರ.