ಈಜಲು ಹೋಗಿದ್ದ ಯುವಕನ ಶವ ಪತ್ತೆ : ಜಲಪಾತದಲ್ಲಿ ಕೊಚ್ಚಿ ಹೋಗಿದ್ದ ರಾಜಸ್ಥಾನ ಮೂಲದ ಯುವಕ

ರೈಸಿಂಗ್ ಕನ್ನಡ :

ಯಾದಗಿರಿ:

ಜಿಲ್ಲೆಯ ಗುರುಮಠಕಲ್ ತಾಲೂಕಿನ ಧಬ್ ಧಬೆ ಜಲಪಾತದಲ್ಲಿ ನಿನ್ನೆ ಈಜಲು ತೆರಳಿದ್ದ ವ್ಯಕ್ತಿ ಶನಿವಾರ ಶವವಾಗಿ ಪತ್ತೆಯಾಗಿದ್ದಾನೆ.

ಶುಕ್ರವಾರ ಮಧ್ಯಾಹ್ನ ನಜರಾಪುರ ಬಳಿಯ ಜಲಾಪಾತಕ್ಕೆ ರಾಜಸ್ಥಾನ ಮೂಲದ ಭಾಯ್ ರಾಮ್ ಸಂಬಂಧಿಕರೊಂದಿಗೆ ಈಜಲು ತೆರಳಿದ್ದ. ಭಾಯ್ ರಾಮ್ ಸಂಬಂಧಿಕರು ಸೈದಾಪುರ ಪಟ್ಟಣದಲ್ಲಿ ದಿನಸಿ ಅಂಗಡಿ ಹೊಂದಿದ್ದಾರೆ.

ಸಂಬಂಧಿಕರೊಂದಿಗೆ ಸೇರಿ ಜಲಪಾದ ನೋಡಲು ಬಂದಿದ್ದ ವ್ಯಕ್ತಿ, ನೀರಿನಲ್ಲಿ ಇಳಿದಿದ್ದ.ಆಳ ನೀರಿನಲ್ಲಿ ಸುಳಿಯಲ್ಲಿ ಸಿಲುಕಿ ನಾಪತ್ತೆಯಾಗಿದ್ದ ಬಗ್ಗೆ ಪ್ರತ್ಯಕ್ಷದರ್ಶಿ ಹೇಳಿದ್ರು.

ಅಗ್ನಿ ಶಾಮಕ ದಳ ಸಿಬ್ಬಂದಿ ಸ್ಥಳಕ್ಕೆ ಭೇಟಿ ನೀಡಿದ್ದರಾದ್ರೂ, ನೀರಿನ ಹರಿವು ಹೆಚ್ಚಿದ್ದ ಕಾರಣ ರಕ್ಷಣಾ ಕಾರ್ಯ ಸಾಧ್ಯವಾಗಿರಲಿಲ್ಲ. ಆದ್ರೆ, ಬೆಳಗ್ಗೆ ಸ್ಥಳಕ್ಕೆ ಹೋಗಿದ್ದ ಸ್ಥಳೀಯರ ಕಣ್ಣಿಗೆ ಭಾಯ್ ರಾಮ್ ಶವ ಕಾಣಿಸಿಕೊಂಡಿದೆ.

ಸುದ್ದಿ ತಿಳಿದು ಸ್ಥಳಕ್ಕೆ ಧಾವಿಸಿದ ಪೊಲೀಸರು ಸ್ಥಳೀಯರ ಸಹಾಯದಿಂದ ಶವ ಹೊರತೆಗೆದಿದ್ದಾರೆ. ನಂತರ ಮರಣೋತ್ತರ ಪರೀಕ್ಷೆ ನಡೆಸಿ ಸಂಬಂಧಿಕರಿಗೆ ಹಸ್ತಾಂತರಿಸಲಾಗಿದೆ