ಒಂದೇ ಚೆಂಬು, ಒಂದೇ ಬಾತ್​ರೂಮ್ – ಹಳಸಿದ ಅನ್ನವೇ ಮೃಷ್ಟಾನ್ನ..! – ಇದು ಕೋವಿಡ್ ಆಸ್ಪತ್ರೆ ದುಃಸ್ಥಿತಿ?

ರೈಸಿಂಗ್ ಕನ್ನಡ :

ಬಾಗಲಕೋಟೆ :

ಜಿಲ್ಲೆಯ ಕೋವಿಡ್ ಆಸ್ಪತ್ರೆಯಲ್ಲಿ ರೋಗಿಗಳಿಗೆ ಹಳಸಿದ ಅನ್ನ ನೀಡಲಾಗುತ್ತಿದೆ ಅನ್ನೋ ಆರೋಪ ಕೇಳಿಬಂದಿದ್ದು, ಆಸ್ಪತ್ರೆಯ ಕರ್ಮಕಾಂಡ ಬೆಳಕಿಗೆ ಬಂದಂತಾಗಿದೆ. ಸಾಮಾಜಿಕ ಜಾಲತಾಣದಲ್ಲಿ ಆಸ್ಪತ್ರೆಯಲ್ಲಿ ನೀಡುವ ಹಳಸಿದ ಅನ್ನದ ವಿಡಿಯೋ ಫುಲ್ ವೈರಲ್ ಆಗಿದೆ.

ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಪೊಲೀಸ್ ಪೇದೆಯೊಬ್ಬರು ಹಳಸಿದ ಅನ್ನದ ಬಗ್ಗೆ ಪ್ರಶ್ನಿಸಿದ್ರೆ ,ಆಸ್ಪತ್ರೆಯ ಸಿಬ್ಬಂದಿ ಬೇಜವಾಬ್ದಾರಿ ಹೇಳಿಕೆ ನೀಡಿದ್ದು ಆಸ್ಪತ್ರೆಯಲ್ಲಿನ ರೋಗಿಗಳನ್ನ ಕೆರಳಿಸಿದೆ. ಆಸ್ಪತ್ರೆಯವರು ನೀಡುವ ಹಳಸಿದ ಅನ್ನ ತಿನ್ನುವ ಸ್ಥಿತಿ ರೋಗಿಗಳಿಗೆ ಬಂದೊದಗಿದ್ದು ಆಸ್ಪತ್ರೆಯ ಸಿಬ್ಬಂದಿ ವಿರುದ್ಧ ಹಿಡಿ ಶಾಪ ಹಾಕುತ್ತಿದ್ದಾರೆ ಎನ್ನಲಾಗಿದೆ.

ಇನ್ನು ಸುಮಾರು ಮೂವತ್ತಕ್ಕೂ ಅಧಿಕ ರೋಗಿಗಳಿಗೆ ಒಂದೇ ಬಾತ್ ರೂಮ್ ಇದ್ದು, ಮಹಿಳೆಯರು ಹಾಗೂ ಪುರುಷರು ಒಂದೇ ಮಗ್​ನಲ್ಲಿ ಸ್ನಾನ , ಬಹಿರ್ದೆಸೆಯ ಕೆಲಸ ಮುಗಿಸಿಕೊಳ ಬೇಕಾಗಿರೋದು ಆಸ್ಪತ್ರೆಯ ಅವ್ಯವಸ್ಥೆಗೆ ಸಾಕ್ಷಿಯಾಗಿದೆ ಎನ್ನುತ್ತಿದ್ದಾರೆ ರೋಗಿಗಳು.

ಇನ್ನು ವ್ಯವಸ್ಥೆ ಸರಿಪಡಿಸುವಂತೆ ಪೊಲೀಸ್ ಪೇದೆ ಜಿಲ್ಲಾ ಶಸ್ತ್ರ ಚಿಕಿತ್ಸಕ ಡಾ.ಪ್ರಕಾಶ ಬಿರಾದರ ಅವರೊಂದಿಗೆ ಮಾತನಾಡಿ ಆಸ್ಪತ್ರೆಯಲ್ಲಿನ ಅವ್ಯವಸ್ಥೆಯ ಬಗ್ಗೆ ಹೇಳಿಕೊಂಡಿದ್ದು, ಕೂಡಲೇ ಅವ್ಯವಸ್ಥೆಯನ್ನ ಸರಿಪಡಿಸುವುದಾಗಿ ಹೇಳಿದ್ದಾರೆ.

ಪೇದೆ ಹಾಗೂ ಜಿಲ್ಲಾ ಶಸ್ತ್ರ ಚಿಕಿತ್ಸಕರ ನಡುವಿನ ದೂರವಾಣಿ ಸಂಭಾಷಣೆ ಕೂಡ ವೈರಲ್ ಆಗಿದ್ದು, ಆಸ್ಪತ್ರೆಯಲ್ಲಿನ ಅವ್ಯವಸ್ಥೆಗೆ ರೋಗಿಗಳು ಕಂಗಾಲಾಗಿ  ಹೋಗಿದ್ದಾರೆ. ಕೂಡಲೇ ಜಿಲ್ಲಾಡಳಿತ ಕೋವಿಡ್ ಆಸ್ಪತ್ರೆಯಲ್ಲಿ ಅವ್ಯವಸ್ಥೆಯನ್ನ ಸರಿಪಡಿಸಿ ರೋಗಿಗಳಿಗೆ ಸೂಕ್ತವ್ಯವಸ್ಥೆ ಕಲ್ಪಿಸಬೇಕಿದೆ.