ಬೆಂಗಳೂರಿನಲ್ಲಿ ನೀರಿಗೆ ಬರ : ಹೆಚ್ಚು ನೀರು ಬಳಸಿದರೆ ₹5 ಸಾವಿರ ದಂಡ..!

ಬೆಂಗಳೂರು : ಬೇಸಿಗೆ ಶುರುವಾಗುವ ಮುನ್ನವೇ ಬೆಂಗಳೂರಿನಲ್ಲಿ ನೀರಿಗೆ ಬರ ಎದುರಾಗಿದೆ. ಕಳೆದ ಮುಂಗಾರಿನಲ್ಲಿ ಸರಿಯಾಗಿ ಮಳೆಯಾಗದ ಪರಿಣಾಮ ಬೆಂಗಳೂರು ಹಿಂದೆಂದೂ ಕಂಡು ಕೇಳರಿಯದ ನೀರಿನ ಬರ ಎದುರಿಸುತ್ತಿದೆ. ಬೆಂಗಳೂರಿಗೆ ನೀರು ಪೂರೈಕೆ ಮಾಡುವ ಮೂಲಗಳಲ್ಲಿ ಒಂದಾದ ಕಾವೇರಿ ಕೊಳ್ಳದಲ್ಲಿಯೂ ಸರಿಯಾಗಿ ಮಳೆಯಾಗಿಲ್ಲ.

ಇದರ ಪರಿಣಾಮ ಬೆಂಗಳೂರಿಗೆ ನೀರಿನ ಕೊರತೆ ಎದುರಾಗಿದೆ. ಜೊತೆಗೆ ಅಂತರ್ಜಲ ಮಟ್ಟವೂ ಕುಸಿತವಾಗಿದೆ. ಇದರಿಂದ ಎಚ್ಚೆತ್ತಿರುವ ಅನೇಕ ವಸತಿ ಸಮುಚ್ಛಯಗಳು ಪಡಿತರ ಲೆಕ್ಕದಲ್ಲಿ ನೀರು ಪೂರೈಕೆಗೆ ಮುಂದಾಗಿವೆ. ಅಲ್ಲದೇ ಯಾರು ಹೆಚ್ಚಿನ ಪ್ರಮಾಣದ ನೀರು ಉಪಯೋಗಿಸುತ್ತಾರೋ ಅವರಿಗೆ ದಂಡ ವಿಧಿಸಲು ಸಹ ಮುಂದಾಗಿವೆ. ಬೆಂಗಳೂರಿನ ವೈಟ್ ಫೀಲ್ಡ್ ನಲ್ಲಿರುವ ಪಾಮ್ ಮೆಡೋಸ್ ವಸತಿ ಸಮುಚ್ಛಯ, ‘‘ಕಳೆದ ನಾಲ್ಕು ದಿನಗಳಿಂದ ಬೆಂಗಳೂರು ಜಲ ಮಂಡಳಿಯಿಂದ ನೀರು ಪೂರೈಕೆಯಾಗುತ್ತಿಲ್ಲ.

ನಾವು ಕೊರೆಸಿರುವ ಕೊಳವೆ ಬಾವಿಗಳ ಮೂಲಕ ನೀರು ಪೂರೈಕೆ ಮಾಡುತ್ತಿದ್ದೇವೆ. ಹೀಗಾಗಿ ಎಲ್ಲರೂ ಮಿತವಾಗಿ ನೀರು ಬಳಕೆ ಮಾಡಬೇಕು. ಪ್ರಸ್ತುತ ಬಳಸುತ್ತಿರುವ ನೀರಿನಲ್ಲಿ ಶೇಕಡ 20ರಷ್ಟು ಕಡಿತ ಮಾಡಬೇಕು. ಒಂದು ವೇಳೆ ಈ ನಿಯಮ ಉಲ್ಲಂಘಿಸಿದರೆ 5 ಸಾವಿರ ರೂಪಾಯಿ ದಂಡ ತೆರಬೇಕು’’ ಎಂದು ನಿವಾಸಿಗಳಿಗೆ ನೋಟಿಸ್ ನೀಡಿದೆ.