ಚೀನಾ ಸಮುದ್ರದಲ್ಲಿ ಅಮೆರಿಕನ್ನರ ತಾಲೀಮು- ಡ್ರ್ಯಾಗನ್ ದೇಶಕ್ಕೆ ನೇರಾ ನೇರ ಟಕ್ಕರ್- ಭಾರತಕ್ಕೆ ಆನೆ ಬಲ

ರೈಸಿಂಗ್​ ಕನ್ನಡ ನ್ಯೂಸ್​ ಡೆಸ್ಕ್​​:

ಶತ್ರುವಿನ ಶತ್ರು ಮಿತ್ರ ಅನ್ನುವ ಮಾತಿದೆ. ಈಗ ಅದು ವಿಶ್ವಮಟ್ಟದಲ್ಲೂ ಸುದ್ದಿಯಾಗ್ತಿದೆ. ಅಮೆರಿಕಾಕ್ಕೆ ಚೀನಾ ಶತ್ರು. ಭಾರತಕ್ಕೂ ಚೀನಾ ಶತ್ರು. ಅಮೆರಿಕಾ ಮತ್ತು ಚೀನಾ ನಡುವೆ ಮಾತಿನಲ್ಲೇ ಫೈಟ್​ ನಡೆಯುತ್ತಿದೆ. ಭಾರತದ ಜೊತೆ ಚೀನಾ ಕಾಲು ಕೆರದು ಗಡಿ ವಿವಾದವನ್ನು ಹುಟ್ಟುಹಾಕಿದೆ. ಭಾರತ ಗಲ್ವಾನ್​​​​ ಹಾಗೂ ಲಡಾಕ್​ ಗಡಿಭಾಗದಲ್ಲಿ ಡ್ರ್ಯಾಗನ್​ ಸೈನಿಕರಿಗೆ ತಕ್ಕ ಪಾಠ ಕಲಿಸಿದೆ. ಇತ್ತ ಕಡೆ ವಿಶ್ವದ ದೊಡ್ಡಣ್ಣ ಅಮೆರಿಕಾ ಕೂಡ ಚೀನಾವನ್ನು ಕಟ್ಟಿಹಾಕುವ ಪ್ರಯತ್ನ ಮಾಡ್ತಿದೆ. ಇಲ್ಲಿತನಕ ಮಾತಿನ ಮೂಲಕ ಚೀನಾ ವಿರುದ್ಧ ಭಾರತಕ್ಕೆ ಬೆಂಬಲ ನೀಡ್ತಿದ್ದ ಅಮೆರಿಕಾ ಈಗ ಕೆಂಪು ಬಾವುಟದ ರಾಷ್ಟ್ರಕ್ಕೆ ನೇರಾನೇರಾ ಟಕ್ಕರ್​ ನೀಡಿದೆ.

ಕೆಲದಿನಗಳ ಹಿಂದೆ ಯೂರೋಪ್​ನಲ್ಲಿದ್ದ ಅಮೆರಿಕಾ ಸೇನೆ ಪಡೆಗಳು ದಕ್ಷಿಣ ಚೀನಾದ ಸಮುದ್ರದ ಕಡೆಗೆ ರವಾನೆಯಾಗಿದ್ದವು. ಈಗಾಗಲೇ ಚೀನಾ ವಿಯೆಟ್ನಾಂ, ಪಿಲಿಪೈನ್ಸ್​​, ಮಲೇಷಿಯಾ, ತೈವಾನ್​ ಮತ್ತು ಬ್ರೂನೈ ದೇಶಗಳಲ್ಲಿ ತನ್ನ ಅಧಿಪತ್ಯ ಸ್ಥಾಪಿಸುವ ಪ್ರಯತ್ನ ಮಾಡುತ್ತಿದೆ. ಚೀನಾ ವಿರುದ್ಧ ಈ ದೇಶಗಳು ಸಿಡಿದು ನಿಂತಿವೆ. ಈಗ ಅಮೆರಿಕಾದ ನೌಕಾ ಚಟುವಟಿಕೆ ಭಾರತ ಮಾತ್ರವಲ್ಲ ಚೀನಾದ ಬೆದರಿಕೆ ಇರುವ ಎಲ್ಲಾ ದೇಶಗಳಿಗೆ ನೈತಿಕ ಬಲ ತುಂಬಿದೆ.

ದಕ್ಷಿಣ ಚೀನಾದ ಸಮುದ್ರದಲ್ಲಿ ಅಮೆರಿಕಾದ ನೌಕಾಸೇನೆಗಳು ತಾಲೀಮು ನಡೆಸಿವೆ. ಇತ್ತ ಭಾರತ ಚೀನಾಕ್ಕೆ ಹೊಂದಿಕೊಂಡಿರುವ ಗಡಿಗಳನ್ನು ಟೈಟ್​ ಮಾಡ್ತಿದೆ. ಅಮೆರಿಕಾದ ನೌಕಾ ತಾಲೀಮು ಚೀನಾ ದೇಶದೊಂದಿಗೆ ನೇರ ಫೈಟ್​ಗೆ ಇಳಿಯುವ ಸೂಚನೆಯೂ ಆಗಿದೆ. ಇಂಡೋ-ಫೆಸಿಫಿಕ್​​ ಏರಿಯಾದ ದೇಶಗಳನ್ನು ಬೆಂಬಲಿಸುವ ಯೋಚನೆಯಲ್ಲಿ ನೌಕಾ ತಾಲೀಮು ನಡೆಸುತ್ತಿದ್ದೇವೆ ಎಂದು ಅಮೆರಿಕಾ ಹೇಳಿಕೊಳ್ಳುತ್ತಿದೆ.

ಶುಕ್ರವಾರ CVN 68 ಮತ್ತು CVN 76 ನೌಕೆಗಳು ಚೀನಾ ಸಮುದ್ರದಲ್ಲಿ ಕಾರ್ಯಾಚರಣೆ ನಡೆಸಿ ನೇರವಾಗಿ ಚೀನಾಕ್ಕೆ ಟಾಂಗ್​ ಕೊಟ್ಟಿದೆ. ಭಾರತ ಮತ್ತು ಚೀನಾ ನಡುವಿನ ಗಲ್ವಾನ್​ ಗಲಾಟೆ ಹಾಗೂ ಗಡಿ ತಂಟೆ ಪ್ರಕರಣವನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದೇವೆ ಎಂದು ಕೆಲ ದಿನಗಳ ಹಿಂದೆ ಅಮೆರಿಕಾ ಹೇಳಿತ್ತು. ಈಗ ಅಮೆರಿಕನ್​​ ನೇವಿಯ ಈ ತಾಲೀಮು ಭಾರತಕ್ಕೆ ಮತ್ತಷ್ಟು ಬಲ ತಂದಿದೆ. ಇತ್ತೀಚೆಗೆ ಅಮೆರಿಕಾ  ಚೀನಾ ಸಮುದ್ರ ವ್ಯಾಪ್ತಿಗೆ ಬರುವ ದೇಶಗಳಿಗೆ ಕಮ್ಯೂನಿಸ್ಟ್​ ಸರಕಾರದ ಬೆದರಿಕೆ ಇರುವುದರಿಂದ, ಆ ದೇಶದ ಪರವಾಗಿ  ನಿಲ್ಲುವುದಾಗಿ ಘಂಟಾಘೋಷವಾಗಿ ಹೇಳಿದ್ದನ್ನು ನೆನಪಿಸಿಕೊಳ್ಳಬಹುದು.