Featured
ಐಪಿಎಲ್ ಹಬ್ಬಕ್ಕೆ ಕೌಂಟ್ಡೌನ್: ಉದ್ಘಾಟನಾ ಪಂದ್ಯದಲ್ಲಿ ಮುಂಬೈ-ಚೆನ್ನೈ ಮುಖಾಮುಖಿ
ರೈಸಿಂಗ್ ಕನ್ನಡ:
ನ್ಯೂಸ್ ಡೆಸ್ಕ್:
ಕ್ರಿಕೆಟ್ ಅಭಿಮಾನಿಗಳನ್ನ ತುದಿಗಾಲಲ್ಲಿ ನಿಲ್ಲಿಸಿರುವ ಸೀಸನ್ 13ರ ಐಪಿಎಲ್ ಟೂರ್ನಿ ಶನಿವಾರದಿಂದ ಆರಂಭವಾಗಿಲಿದೆ. ಶನಿವಾರದಿಂದ (ಸೆ.19) ಯುಎಇಯಲ್ಲಿ ಉದ್ಘಾಟನಾ ಪಂದ್ಯ ನಡೆಯಲಿದ್ದು ಕಲ್ಲರ್ಫುಲ್ ಟೂರ್ನಿಯ ಆರಂಭಕ್ಕೆ ಕೌಂಟ್ಡೌನ್ ಶುರುವಾಗಿದೆ.
53 ದಿನಗಳ ಕಾಲ ನಡೆಯಲಿರುವ ಮಿಲಿಯನ್ ಡಾಲರ್ ಟೂರ್ನಿಗೆ ಕೊರೊನಾ ಭೀತಿ ಇದ್ದು ಬಯೋ ಸೆಕ್ಯೂರ್ ವ್ಯವಸ್ಥೆಯಲ್ಲಿ ಖಾಲಿ ಕ್ರೀಡಾಂಗಣದಲ್ಲಿ ಟೂರ್ನಿ ನಡೆಯಲಿದೆ.
53 ದಿನಗಳ ಕಾಲ ಕ್ರಿಕೆಟ್ ಅಭಿಮಾನಿಗಳನ್ನ ರಂಜಿಸಲಿರುವ ಐಪಿಎಲ್ನಲ್ಲಿ 56 ಲೀಗ್ ಪಂದ್ಯಗಳು 4 ಪ್ಲೇಆಫ್ ಪಂದ್ಯಗಳು ಒಟ್ಟು 60 ಪಂದ್ಯಗಳು ನಡೆಯಲಿದೆ.
ಪ್ರಮುಖ ನಗರಗಳಾದ ಅಬುಧಾಬಿ,ದುಬೈ ಮತ್ತು ಶಾರ್ಜಾದಲ್ಲಿ ಪಂದ್ಯಗಳು ನಡೆಯಲಿದೆ. ಈ ಬಾರಿ ಬಹುಮಾನ ಮೊತ್ತವನ್ನ ಕಡಿತಗೊಳಿಸಲಾಗಿದ್ದು 20 ಕೋಟಿ ರೂಪಾಯಿ ಬದಲಿಗೆ ಚಾಂಪಿಯನ್ ಆಗುವ ತಂಡಕ್ಕೆ 10 ಕೋಟಿ ರೂಪಾಯಿ ಬಹುಮಾನ ಸಿಗಲಿದೆ. ಇನ್ನು ರನ್ನರ್ಅಪ್ ತಂಡಕ್ಕೆ 10 ಕೋಟಿ ರೂಪಾಯಿ ಬದಲಿಗೆ 6.25 ಕೋಟಿ ರೂಪಾಯಿ ಸಿಗಲಿದೆ.
ಶನಿವಾರ ಅಬುಧಾಬಿಯಲ್ಲಿ ನಡೆಯಲಿರುವ ಉದ್ಘಾಟನಾ ಪಂದ್ಯದಲ್ಲಿ ಐಪಿಎಲ್ನ ಬಲಿಷ್ಠ ತಂಡಗಳಾದ ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ತಂಡಗಳು ಮುಖಾಮುಖಿಯಾಗಲಿವೆ. ಕಳೆದ ಆವೃತ್ತಿಯ ಫೈನಲ್ ಪಂದ್ಯದ ಕೊನೆಯ ಎಸೆತದಲ್ಲಿ ಚೆನ್ನೈ ತಂಡದ ವಿರುದ್ಧ ರೋಹಿತ್ ಪಡೆ ಗೆದ್ದು ಟ್ರೋಫಿ ಮುತ್ತಿಕ್ಕಿತ್ತು. ಇದೀಗ ಈ ಬಾರಿಯ ಆವೃತ್ತಿಯ ಮೊದಲ ಪಂದ್ಯದಲ್ಲೆ ಎರಡು ತಂಡಗಳು ರಣಾಂಗಣದಲ್ಲಿ ಹೋರಾಡಿ ಗೆಲುವು ಪಡೆಯೋದಕ್ಕೆ ಪಣತೊಟ್ಟು ನಿಂತಿವೆ.
