ಸಿದ್ದರಾಮಯ್ಯ ಪುತ್ರ ರಾಕೇಶ್​ ಸಾವಿಗೆ ಆತನೇ ಕಾರಣ : MTB ನಾಗರಾಜ್​ ಗಂಭೀರ ಆರೋಪ

ಹೊಸಕೋಟೆ : ಉಪ ಚುನಾವಣಾ ರಾಜಕೀಯ ವೈಯಕ್ತಿಕ ಮಟ್ಟಕ್ಕೆ ಇಳಿದಿದೆ. ಹೊಸಕೋಟೆ ಅನರ್ಹ ಶಾಸಕ ಎಂಟಿಬಿ ನಾಗರಾಜ್​​, ಇವತ್ತು ಸಿದ್ದರಾಮಯ್ಯ ಮಗ ರಾಕೇಶ್​ ಸಾವಿನ ಕುರಿತು ಮಾತ್ನಾಡಿದ್ದಾರೆ. ಸಿದ್ದು ಪುತ್ರ ರಾಕೇಶ್​​​ ಸಾವಿಗೆ ಆತನೇ ಕಾರಣ. ಪಾರ್ಟಿಗಳಿಗೆ ಕರ್ಕೊಂಡು ಹೋಗಿ, ಪ್ರತಿ ದಿನ ಕುಡಿಸಿ ರಾಕೇಶ್​ ಸಿದ್ದರಾಮಯ್ಯ ಅವರನ್ನ ಹಾಳು ಮಾಡಿದ್ದು ಅವನೇ ಎಂದು ಗಂಭೀರ ಆರೋಪ ಮಾಡಿದ್ದಾರೆ.

ಎಂಟಿಬಿ ನಾಗರಾಜ್ ಆರೋಪ ಮಾಡಿರೋದು ಸಿದ್ದರಾಮಯ್ಯ ಆಪ್ತ, ಭೈರತಿ ಸುರೇಶ್​ ಮೇಲೆ ಅನ್ನೋದು ಗೊತ್ತಾಗಿದೆ. ಭೈರತಿ ಸುರೇಶ್​ ಪತ್ನಿಯನ್ನ ಹೊಸಕೋಟೆಯಿಂದ ಕಣಕ್ಕೆ ಇಳಿಸಲು ಸಜ್ಜಾಗ್ತಿರೋ ಈ ಟೈಮಲ್ಲಿ, ಭೈರತಿ ಸುರೇಶ್​ ವಿರುದ್ಧ ಪರೋಕ್ಷವಾಗಿ ಎಂಟಿಬಿ ವಾಗ್ದಾಳಿ ನಡೆಸಿದ್ದಾರೆ. ಭೈರತಿ ಸುರೇಶ್ ಸಹವಾಸ ಮಾಡದೇ ಇದ್ದಿದ್ರೆ, ರಾಕೇಶ್ ಸಿದ್ದರಾಮಯ್ಯ ಇನ್ನೂ 50 ವರ್ಷ ಬದುಕಿರ್ತಿದ್ದ ಎಂದು ಎಂಟಿಬಿ ಹೇಳಿದ್ದಾರೆ.

ಇದೇ ವೇಳೆ ಭೈರತಿ ಸುರೇಶ್​ ಇನ್ನೂ ರಾಜಕೀಯದಲ್ಲಿ ಬಚ್ಚ ಎಂದಿರೋ ಎಂಟಿಬಿ, ನನಗೆ ಟಿಕೆಟ್​ ಕೊಡಿಸಿದ್ದು ಸಿದ್ದರಾಮಯ್ಯ ಅಲ್ಲ, ಎಸ್​.ಎಂ. ಕೃಷ್ಣ ಅಂತ ಹೇಳಿದ್ರು. ಸಿದ್ದರಾಮಯ್ಯ ಕಾಂಗ್ರೆಸ್​ಗೆ ಬಂದಿದ್ದು 2006ರಲ್ಲಿ, ಅದಕ್ಕೂ ಮೊದಲೇ ನಾನು ಕಾಂಗ್ರೆಸ್​ ಅಭ್ಯರ್ಥಿ ಆಗಿದ್ದೆ ಎಂದು ಸಿದ್ದುಗೂ ಟಾಂಗ್​ ಕೊಟ್ರು ಎಂಟಿಬಿ.