Featured
ಚೀನಾಕ್ಕೆ ಮತ್ತೊಂದು ಶಾಕ್- ಕೇಂದ್ರ ಸರ್ಕಾರದಿಂದ 370 ವಸ್ತುಗಳ ಗುಣಮಟ್ಟಕ್ಕೆ ನಿರ್ಬಂಧ- ಡ್ರ್ಯಾಗನ್ ದೇಶದ ಎಕಾನಮಿಗೆ ಪೆಟ್ಟು..!
ರೈಸಿಂಗ್ ಕನ್ನಡ ನ್ಯೂಸ್ ಡೆಸ್ಕ್:
ಚೀನಾ ವಸ್ತುಗಳೆಂದ್ರೆ ಬೆಲೆ ಕಡಿಮೆ ಹೆಚ್ಚು ಲಾಭ ಅನ್ನುವ ಮಾತಿದೆ. ಆದ್ರೆ ಭಾರತದ ವಿರುದ್ಧ ಕಾಲು ಕೆರೆಯುತ್ತಿರುವ ಚೀನಾಕ್ಕೆ ಕೇಂದ್ರ ಸರ್ಕಾರ ಹೊಡೆತಗಳ ಮೇಲೆ ಹೊಡೆತ ಕೊಡುತ್ತಿದೆ. ಚೀನಾ ಆ್ಯಪ್ಗಳನ್ನು ನಿಷೇಧ ಮಾಡಿದ ಬೆನ್ನಲ್ಲೇ ಈಗ ಚೀನಾ ವಸ್ತುಗಳ ಗುಣಮಟ್ಟದ ಮೇಲೆ ಮೋದಿ ಸರ್ಕಾರ ಚಾಟಿ ಏಟು ಹಾಕಿದೆ. ಚೀನಿ ವಸ್ತುಗಳ ಮೇಲೆ ಗುಣಮಟ್ಟ ನಿರ್ಬಂಧ ವಿಧಿಸುವ ನಿರ್ಣಯವನ್ನು ಭಾರತ ಸರ್ಕಾರ ಕೈಗೊಂಡಿದೆ.
ರಾಜತಾಂತ್ರಿಕ ಮಾರ್ಗಗಳ ಮೂಲಕ ಚೀನಾ ಮಣಿಸಲು ಮೋದಿ ಸರ್ಕಾರ ಮುಂದಾಗಿದೆ. ಚೀನಾದಿಂದ ಆಮದಾಗುತ್ತಿರುವ ಸುಮಾರು 370 ವಸ್ತುಗಳ ಗುಣಮಟ್ಟದ ಮೇಲೆ ನಿರ್ಬಂಧವಿಧಿಸಿರುವ ಭಾರತ ಗಡಿಯಲ್ಲಿ ಕ್ಯಾತೆ ತೆಗೆಯುತ್ತಿರುವ ಚೀನಾಕ್ಕೆ ಶಾಕ್ ಮೇಲೆ ಶಾಕ್ ನೀಡುತ್ತಿದೆ. ಚೀನಾದಿಂದ ಆಮದಾಗುವ ಸುಮಾರು 370 ವಸ್ತುಗಳನ್ನು ಮುಂದಿನ ಮಾರ್ಚ್ ಒಳಗಾಗಿ ಭಾರತೀಯ ಮಾನದಂಡಗಳ ಸುಪರ್ದಿಗೆ ತರಲಾಗುವುದು ಎಂದು ವಾಣಿಜ್ಯ ಸಚಿವಾಲಯ ಮಾಹಿತಿ ನೀಡಿದೆ.
ಆಟಿಕೆ ಸಾಮಾನುಗಳು, ಸ್ಟೀಲ್ ಬಾರ್, ಸ್ಟೀಲ್ ಟ್ಯೂಬ್, ಟೆಲಿಕಾಂ, ಎಲೆಕ್ಟ್ರಾನಿಕ್ ಐಟಂಗಳು, ಕಾಗದ, ರಬ್ಬರ್, ಭಾರೀ ಯಂತ್ರೋಪಕರಣಗಳು, ಗಾಜು ಹೀಗೆ ಸುಮಾರು 370ಕ್ಕೂ ಹೆಚ್ಚು ವಸ್ತುಗಳ ಮೇಲೆ ಗುಣಮಟ್ಟ ನಿರ್ಬಂಧ ವಿಧಿಸಿ ಈ ಮೂಲಕ ಚೀನಾಕ್ಕೆ ಆರ್ಥಿಕ ಹೊಡೆತ ನೀಡಲು ಭಾರತ ಮುಂದಾಗಿದೆ. ಇದೆಲ್ಲದರ ಜೊತೆಗೆ ಆತ್ಮ ನಿರ್ಭರ ಭಾರತ್ ಯೋಜನೆಯನ್ನು ಚುರುಕುಗೊಳಿಸಿ, ಆಮದನ್ನು ಕಡಿಮೆ ಮಾಡಿ ರಫ್ತು ಹೆಚ್ಚಿಸುವ ಗುರಿ ಸಾಧನೆಗೂ ಈ ಕ್ರಮ ನೆರವಾಗಲಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ. ಚೀನಾ ವಸ್ತುಗಳಿಗೆ ಭಾರತ ನಿರ್ಬಂಧ ವಿಧಿಸಿದರೆ, ಚೀನಾಕ್ಕೆ ಆರ್ಥಿಕ ಹೊಡೆತ ಬೀಳಲಿದೆ. ಚೀನಾ ಪಾಲಿಗೆ ಭಾರತ ಏಷ್ಯಾದಲ್ಲೇ ನಂಬರ್ 1 ಮಾರುಕಟ್ಟೆಯಾಗಿದೆ ಅನ್ನುವುದನ್ನು ನೆನಪು ಮಾಡಿಕೊಳ್ಳಬೇಕಿದೆ.
