ರಾಯರ ದರ್ಶನಕ್ಕೆ ಸರಕಾರದಿಂದ ಅನುಮತಿ- ಜುಲೈ 2ರಿಂದ ಭಕ್ತರಿಗೆ ಷರತ್ತುಬದ್ಧ ಎಂಟ್ರಿ..!

ರೈಸಿಂಗ್​ ಕನ್ನಡ:

ಮಂತ್ರಾಲಯ:

ಲಾಕ್​ಡೌನ್​ನಿಂದ ಜನಸಾಮಾನ್ಯರ ಬದುಕು ಮೂರಾಬಟ್ಟೆಯಾಗಿದೆ. ಈ ಮಧ್ಯೆ ಧಾರ್ಮಿಕ ಕೇಂದ್ರಗಳು ಕೂಡ ಬಾಗಿಲು ಮುಚ್ಚಿಕೊಂಡಿದ್ದವು. ಪ್ರತಿದಿನ ಸಾವಿರಾರು ಭಕ್ತರು ಸೇರುವ ಪುಣ್ಯಸ್ಥಳ ಮಂತ್ರಾಲಯ ಕೂಡ ಕಳೆದ 3 ತಿಂಗಳುಗಳಿಂದ  ಬಂದ್​ ಆಗಿತ್ತು. ಗುರುರಾಯರ ದರ್ಶನಕ್ಕೆ ಅವಕಾಶವಿರಲಿಲ್ಲ.

ದೇಶದೆಲ್ಲೆಡೆ ನಿಧಾನವಾಗಿ ಧಾರ್ಮಿಕ ಕೇಂದ್ರಗಳು ತೆರೆದುಕೊಳ್ಳುತ್ತಿವೆ. ಆಂಧ್ರಪ್ರದೇಶ ಸರಕಾರ ಶ್ರೀಮಠವನ್ನು ತೆರೆಯಲು ಷರತ್ತು ಬದ್ಧ ಅನುಮತಿ ನೀಡಿದೆ. ಈ ಹಿನ್ನಲೆಯಲ್ಲಿ ಮಂತ್ರಾಲಯದ ರಾಯರ ಮಠ ಜುಲೈ 2ರಿಂದ ಭಕ್ತರಿಗಾಗಿ ತೆರೆಯಲಿದೆ.  ಮಠಕ್ಕೆ ಬರುವ ಭಕ್ತರಿಗೆ ಹಲವು ನಿಬಂಧನೆಗಳಿವೆ. ಅದನ್ನು ಪಾಲಿಸಿದರೆ ಮಾತ್ರ ಮಠದಲ್ಲಿ ರಾಯರ ದರ್ಶನ ಪಡೆಯಬಹುದಾಗಿದೆ.

ದರ್ಶನಕ್ಕೆ ಬರುವ ಭಕ್ತರ ಗಮನಕ್ಕೆ

• ಮಠಕ್ಕೆ ಬರುವ ಭಕ್ತರು ಆಧಾರ್ ಕಾರ್ಡ್, ಮೊಬೈಲ್ ನಂಬರ್ ಕೊಡುವುದು ಕಡ್ಡಾಯ.
• ಕಂಟೋನ್ಮೆಂಟ್ ಝೋನ್ ನಿಂದ ಬಂದವರಿಗೆ ಶ್ರೀಮಠದಲ್ಲಿ ದರ್ಶನಕ್ಕೆ ಅವಕಾಶ ಇಲ್ಲ.
• ಮಾಸ್ಕ್ ಹಾಗೂ ಸಾಮಾಜಿಕ ಅಂತರ ಪಾಲನೆ ಕಡ್ಡಾಯ.
• ದರ್ಶನಕ್ಕೆ ಬರುವರಿಗೆ ಶ್ರೀಮಠದ ಹೊರಗಡೆ ಕೈ- ಕಾಲು ತೊಳೆದುಕೊಳ್ಳಲು ವ್ಯವಸ್ಥೆ.
• ಥರ್ಮಲ್ ಸ್ಕ್ಯಾನಿಂಗ್ ಮಾಡಿದ ಬಳಿಕವೇ ಭಕ್ತರಿಗೆ ದರ್ಶನಕ್ಕೆ ಅನುವು.
• 65 ವರ್ಷದ ಮೇಲ್ಪಟ್ಟವರಿಗೆ, ಗರ್ಭಿಣಿಯರಿಗೆ ದರ್ಶನಕ್ಕೆ ಅವಕಾಶ ಇಲ್ಲ.
• ವಯೋಸಂಬಂಧಿ ಕಾಯಿಲೆ ಇರುವ ಭಕ್ತರಿಗೆ ದರ್ಶನ ಭಾಗ್ಯ ಸಿಗಲ್ಲ.
• ಪ್ರಾಕಾರದಲ್ಲಿ ಪ್ರದಕ್ಷಿಣೆ, ಉರುಳುಸೇವೆ ಇತ್ಯಾದಿಗೆ ಅವಕಾಶ ಇಲ್ಲ.
• ತೀರ್ಥ, ಮಂತ್ರಾಕ್ಷತೆ, ಪ್ರಸಾದ ವಿತರಣೆ, ಅನ್ನಪ್ರಸಾದ ವಿತರಣೆ ಇಲ್ಲ.
• ಶ್ರೀಮಠದಲ್ಲಿ ಶ್ರೀಗಳಿಂದ ಮುದ್ರಾ ಪ್ರದಾನ ಹಾಗೂ ಶ್ರೀಗಳ ಪಾದಪೂಜೆ ಇರುವುದಿಲ್ಲ.
• ಬೃಂದಾವನ ದರ್ಶನಕ್ಕೆ ಬೆಳಗ್ಗೆ 8 ಗಂಟೆಯಿಂದ ಮಧ್ಯಾಹ್ನ 2 ಗಂಟೆವರೆಗೆ ಮತ್ತು ಸಂಜೆ 4 ಗಂಟೆಯಿಂದ 6 ಗಂಟೆವರೆಗೆ ಮಾತ್ರ ಅವಕಾಶ.