Featured
ಮಲೆ ಮಹದೇಶ್ವರನಿಗಿಲ್ವಾ ಕೊರೊನಾ ಭೀತಿ – ಬರುತ್ತಲೇ ಇದ್ದಾರೆ ಸಾವಿರಾರು ಭಕ್ತರು..!
ರೈಸಿಂಗ್ ಕನ್ನಡ :
ಚಾಮರಾಜನಗರ :
ಭಕ್ತರ ಭಕ್ತಿಗೆ ಕೊರೊನಾ ಅಡ್ಡಿ ಬರುತ್ತಿಲ್ಲ. ಕೊರೊನಾ ಶರವೇಗದ ನಡುವೆಯೂ ಭಕ್ತರು ದೇವಸ್ಥಾನಗಳಿಗೆ ಲಗ್ಗೆ ಇಡುತ್ತಲೇ ಇದ್ದಾರೆ. ರಾಜ್ಯದ ಪ್ರಸಿದ್ಧ ದೇವಾಲಯಗಳಲ್ಲಿ ಒಂದಾದ ಮಲೆ ಮಹದೇಶ್ವರಬೆಟ್ಟದಲ್ಲಿ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸುತ್ತಿದ್ದಾರೆ.
ಭಕ್ತರ ಹಿತ ಕಾಯುವ ದೃಷ್ಟಿಯಿಂದ ಮಲೆ ಮಹದೇಶ್ವರಬೆಟ್ಟದಲ್ಲಿ ಪ್ರಾಧಿಕಾರದ ಯಾವುದೇ ಕೊಠಡಿಗಳಲ್ಲಿ ತಂಗಲು ಅವಕಾಶವನ್ನ ನೀಡುತ್ತಿಲ್ಲ. ಇಷ್ಟಾದರೂ, ಸಾವಿರಾರು ಭಕ್ತರು ಮಾದಪ್ಪನ ದರುಶನಕ್ಕೆ ದಾಂಗುಡಿ ಇಡುತ್ತಿದ್ದಾರೆ.
ಬೆಳಗ್ಗೆ 7 ರಿಂದ ರಾತ್ರಿ 7 ರವರೆಗೆ , ಮಾದಪ್ಪನ ದರುಶನ ಪಡೆಯಲು ಅವಕಾಶ ಕಲ್ಪಿಸಲಾಗಿದೆ. ಆದರೆ, ರಾತ್ರಿ ವಾಸ್ತವ್ಯಕ್ಕೆ ಇಲ್ಲಿನ ಕೊಠಡಿಗಳಲ್ಲಿ ಅವಕಾಶ ಇಲ್ಲ. ಜಿಲ್ಲಾಡಳಿತ ವಾಸ್ತವ್ಯಕ್ಕೆ ನಿಷೇಧ ಹೇರಿದೆ.
ಹೀಗಿದ್ದರೂ ಭಕ್ತರ ಆಗಮನ ಕಡಿಮೆಯಾಗಿಲ್ಲ. ಕೊರೊನಾ ಸೋಂಕಿನ ಭಯದ ನಡುವೆಯೂ ಕಳೆದ ಎರಡು ದಿನಗಳಲ್ಲಿ 12,500 ಮಂದಿ ಭಕ್ತರು ಮಾದಪ್ಪನ ದರ್ಶನ ಪಡೆದಿದ್ದಾರೆ.
ಈ ಮಧ್ಯೆ, ಕೊರೊನಾ ಮುಂಜಾಗೃತಾ ಕ್ರಮವಾಗಿ, ಸಾಕಷ್ಟು ಸುರಕ್ಷಿತ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ. ದೇವಾಲಯದ ಆವರಣದಲ್ಲಿ ಆಸನ ವ್ಯವಸ್ಥೆ ಮಾಡಿ, ಒಂದು ಆಸನದಿಂದ ಮತ್ತೊಂದು ಆಸನಕ್ಕೆ ಅಂತರವಿರಿಸಲಾಗಿದೆ. ಇಲ್ಲಿ ಭಕ್ತರು ಕುಳಿತು ತಮ್ಮ ಸರತಿ ಬಂದಾಗ ದೇವಾಲಯದೊಳಗೆ ಹೋಗುವಂತೆ ಕ್ರಮ ಕೈಗೊಳ್ಳಲಾಗಿದೆ.
ಹೋಗುವ ಮುನ್ನ ಥರ್ಮಲ್ ಸ್ಕ್ರೀನಿಂಗ್ ಮಾಡಲಾಗುತ್ತದೆ. ಅಲ್ಲದೇ ಕೈಗೆ ಸ್ಯಾನಿಟೈಸರ್ ನೀಡಲಾಗುತ್ತದೆ. ಅಲ್ಲದೇ ಬೆಟ್ಟದಲ್ಲಿ ಓಡಾಡುವ ಮಂದಿ, ದೇವಾಲಯಕ್ಕೆ ಹೋಗುವ ಮಂದಿಗೆ ಮಾಸ್ಕ್ ಕಡ್ಡಾಯಗೊಳಿಸಲಾಗಿದೆ.
