ರೈತ ಸಂಘಟನೆಯ ಜಿಲ್ಲಾಧ್ಯಕ್ಷರಾಗಿ ಕೊತ್ತವಾಲ ಶರಣಪ್ಪ ನೇಮಕ

ರೈಸಿಂಗ್​ ಕನ್ನಡ:

ನಾಗರಾಜ್​. Y. ಕೊಪ್ಪಳ

ಭಾರತೀಯ ಕೃಷಿ ಕಾರ್ಮಿಕ‌ ಮತ್ತು ರೈತ ಸಂಘಟನೆಯ ಕೊಪ್ಪಳ ಜಿಲ್ಲಾಧ್ಯಕ್ಷರಾಗಿ ಶರಣಪ್ಪ ಕೊತ್ತವಾಲ ನೇಮಕಗೊಂಡಿದ್ದಾರೆ. ಹಾವೇರಿ ಜಿಲ್ಲೆಯ ಹಾನಗಲ್ ಪಟ್ಟಣದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಸಂಘಟನೆಯ ರಾಜ್ಯಾಧ್ಯಕ್ಷ ಎಂ.ಎಸ್.ಪಾಟೀಲ್ ನೇಮಕ ಆದೇಶ ನೀಡಿ, ಕೊಪ್ಪಳ ಜಿಲ್ಲೆಯಲ್ಲಿ ಸಂಘಟನೆಯ ಮೂಲಕ ಬಡವರು ಮತ್ತು ನಿರ್ಗತಿಕರಿಗೆ ಸರ್ಕಾರದ ಯೋಜನೆ ತಲುಪುವ ನಿಟ್ಟಿನಲ್ಲಿ ಕೆಲಸ ಮಾಡಬೇಕಿದೆ ಎಂದರು. ಶರಣಪ್ಪ ಕೊತ್ತವಾಲ ಮಾತನಾಡಿ, ಕೊಪ್ಪಳ ಜಿಲ್ಲೆ, ಹೋರಾಟಕ್ಕೆ ಹೆಸರು ಮಾಡಿದೆ. ಜೊತೆಗೆ ಜಿಲ್ಲೆಯಲ್ಲಿ ರೈತರು ಮತ್ತು ಕಾರ್ಮಿಕರು ಸಾಕಷ್ಟು ಸಮಸ್ಯೆ ಎದುರಿಸುತ್ತಿದ್ದಾರೆ. ಜೊತೆಗೆ ತುಂಗಭದ್ರಾ ಜಲಾಶಯ ನಿರ್ಮಾಣದ ಪ್ರಮುಖ ಉದ್ದೇಶ ನೀರಾವರಿ ಮತ್ತು ಕುಡಿವ ನೀರು ನೀಡುವುದಾಗಿದೆ. ಆದರೆ, ಇತ್ತೀಚೆಗೆ ಟಿ.ಬಿ. ಡ್ಯಾಂ ಮತ್ತು ತುಂಗಭದ್ರಾ ಎಡದಂಡೆ ಯೋಜನೆ ಅಧಿಕಾರಿಗಳ ಕಳ್ಳಾಟದಿಂದ ಕಾರ್ಖಾನೆಗಳೇ ಹೆಚ್ಚು ನೀರು ಪಡೆದು, ರೈತರಿಗೆ ಅನ್ಯಾಯ ಮಾಡುತ್ತಿದ್ದಾರೆ. ಇದರ ವಿರುದ್ಧವೂ ಸಂಘಟನೆ ಮುಂದಾಳತ್ವದಲ್ಲಿ ಹೋರಾಟ ಮಾಡಲಾಗುವುದು ಎಂದರು. ಸಂಘಟನೆ ಪದಾಧಿಕಾರಿಗಳಾದ ಮಧುಮತಿ ಪೂಜಾರ, ಎಸ್.ಎ.ಖಾದ್ರಿ, ಅಮರೇಗೌಡ ಯರಡೋಣ, ಪಂಪಾಪತಿ ಕನಕಗಿರಿ, ವೀರೇಶ ಚಳ್ಳೂರ, ರಮೇಶ ನಾಯಕ ಸೇರಿ ಇತರರು ಇದ್ದರು.