ಕೋಲಾರದ ಅರಾಬಿಕೊತ್ತನೂರು ಗ್ರಾಮದಲ್ಲಿ ಸಂಕ್ರಾಂತಿ ಆಚರಿಸಲ್ಲ ಯಾಕೆ ಗೊತ್ತಾ.?

ರೈಸಿಂಗ್ ಕನ್ನಡ

ಕೋಲಾರ : ಕೊರೊನಾ ನಡುವೆಯು ರಾಜ್ಯಾದ್ಯಂತ ಸಂಕ್ರಾಂತಿ ಹಬ್ಬದ ಸಡಗರ ಕಳೆಗಟ್ಟಿದೆ. ಆದರೆ ಕೋಲಾರ ತಾಲೂಕಿನ ಅರಾಭಿಕೊತ್ತನೂರು ಗ್ರಾಮದಲ್ಲಿ ತಲ ತಲಾಂತರಗಳಿಂದ ಸಂಕ್ರಾಂತಿ ಹಬ್ಬ ಬಂದಿತೆಂದರೆ ಗ್ರಾಮದಲ್ಲಿ ಸೂತಕದ ಛಾಯೆ ಮೂಡುತ್ತದೆ. ಈ ಗ್ರಾಮದಲ್ಲಿ ಎರಡು ತಲೆಮಾರಿನ ಹಿಂದೆ, ಸಂಕ್ರಾಂತಿ ಹಬ್ಬದ ಆಚರಣೆ ಸಂದರ್ಭದಲ್ಲಿ ರಾಸುಗಳಿಗೆ ಕಿಚ್ಚಾಯಿಸುವ ವೇಳೆ ಹಸುಗಳು, ಎತ್ತುಗಳಿಗೆ ಗಾಯಗಳಾಗಿ ಗ್ರಾಮದಿಂದಲೇ ಓಡಿಹೊಗಿವೆ. ಕೆಲ ಹಸುಗಳಿಗೆ ಸಾಂಕ್ರಾಮಿಕ ಖಾಯಿಲೆಗಳು ಕಂಡುಬಂದು ಕೆಲ ಹಸುಗಳು ಸಾವನ್ನಪ್ಪಿದ್ದವು.

ಹೀಗಾಗಿ ಭಯಭೀತರಾಗಿದ್ದ ಗ್ರಾಮಸ್ಥರು ಅರಾಭಿಕೊತ್ತನೂರು ಗ್ರಾಮದಲ್ಲಿ ಸಂಕ್ರಾಂತಿ ಹಬ್ಬದ ಆಚರಣೆಯನ್ನೆ ಮರೆತಿದ್ದಾರೆ. ಸಂಕ್ರಾಂತಿ ಹಬ್ಬವೆಂದರೆ ಗ್ರಾಮೀಣ ಭಾಗದಲ್ಲೆ ಸಂಭ್ರಮ ಸಡಗರದಿಂದ ಆಚರಿಸುವುದನ್ನ ಕಾಣಬಹುದು. ಆದರೆ ಈ ಗ್ರಾಮದಲ್ಲಿ ಹಬ್ಬದ ವಾತಾವರಣವೇ ಕಾಣಸಿಗುವುದಿಲ್ಲ.

ರಾಸುಗಳಿಗೆ ಪೂಜೆ ಮಾಡದಿರುವುದು, ತೋರಣ ಕಟ್ಟದಿರುವುದು, ರಂಗೋಲಿ ಹಾಕದಿರುವ ದೃಶ್ಯಗಳು ಸಾಮಾನ್ಯವಾಗಿ ಕಂಡುಬರುತ್ತವೆ. ಈ ಕುರಿತು ಮಾತನಾಡಿರುವ ಗ್ರಾಮದ ಹಿರಿಯರಾದ ನಂಜುಂಡೇ ಗೌಡ ಅವರು ಹಿರಿಯರ ಆಚರಣೆಯಂತೆ ನಾವು ಸಂಕ್ರಾಂತಿ ಹಬ್ಬವನ್ನ ಆಚರಣೆ ಮಾಡುತ್ತಿಲ್ಲ. ಆದರೆ ಬಸವ ಜಯಂತಿಯ ದಿನ ಗೋಪೂಜೆಯನ್ನ ಮಾಡುವುದಾಗಿ ಪ್ರತಿಕ್ರಿಯೆ ನೀಡಿದ್ದಾರೆ.