Featured
ಕೊರೊನಾ ನಡುವೆಯೆ ಶೂಟಿಂಗ್ ಸ್ಟಾರ್ಟ್ – 250 ಕನ್ನಡಿಗರ ಕುಟುಂಬಗಳಿಗೆ ಆಸರೆಯಾದ ಪೈಲ್ವಾನ್..!
ರೈಸಿಂಗ್ ಕನ್ನಡ :
ವೆಬ್ ಡೆಸ್ಕ್ :
ಕೊರೊನಾ ಅಟ್ಟಹಾಸ ಹೆಚ್ಚುತ್ತಲೇ ಇದೆ ನಿಜ. ಹಾಗಂತ, ನಮ್ಮ ಎಲ್ಲ ಕೆಲಸ ಕಾರ್ಯಗಳನ್ನ ನಿಲ್ಲಿಸಬೇಕಾ… ಇಲ್ಲ ಖಂಡಿತವಾಗ್ಲೂ ಇಲ್ಲ. ಆದ್ರೆ, ಜವಾಬ್ದಾರಿ ಮರೆಯಬಾರದು ಅಷ್ಟೆ. ಸಾಮಾಜಿಕ ಅಂತರ, ಸ್ಯಾನಿಟೈಸ್, ಮಾಸ್ಕ್ ಜೊತೆಯಲ್ಲೇ ನಮ್ಮ ಬದುಕನ್ನ ಕೂಡ ಮುಂದುವರಿಸಬೇಕು. ಇದಕ್ಕೆ ಉದಾಹರಣೆ ಅನ್ನುವಂತೆ, ಸ್ಯಾಂಡಲ್ವುಡ್ನ ಕಿಚ್ಚ ಸುದೀಪ್ ಶೂಟಿಂಗ್ಗೆ ತೆರಳಿದ್ದಾರೆ. ಹೈದ್ರಾಬಾದ್ನಲ್ಲಿ ಫ್ಯಾಂಟಮ್ ಚಿತ್ರದ ಶೂಟಿಂಗ್ ಆರಂಭವಾಗಿದೆ.
ಚಿತ್ರದ ಶೂಟಿಂಗ್ ಆರಂಭಗೊಂಡಿದ್ದು, ಕಿಚ್ಚ ಸುದೀಪ್ ಮತ್ತು ನಿರ್ದೇಶಕ ಅನೂಪ್ ಭಂಡಾರಿ ಹೈದ್ರಾಬಾದ್ನಲ್ಲಿ ಕಾಣಿಸಿಕೊಂಡಿದ್ದಾರೆ. ಬೃಹತ್ ಸೆಟ್ನಲ್ಲಿ ಸಿನಿಮಾದ ಶೂಟಿಂಗ್ ನಡೆಯಲಿದೆಯಂತೆ. ಹೈದ್ರಬಾದ್ನ ಅನ್ನಪೂರ್ಣ ಸ್ಟುಡಿಯೋದಲ್ಲಿ ಫ್ಯಾಂಟಮ್ ಸಿನಿಮಾದ ಶೂಟಿಂಗ್ ಆರಂಭವಾಗಿದೆ. ವಿಘ್ನೇಶ್ವರನಿಗೆ ಪೂಜೆ ಸಲ್ಲಿಸೋ ಮೂಲಕ ಸಿನಿಮಾ ಶೂಟಿಂಗ್ ಅನ್ನ ನಿರ್ಮಾಪಕ ಜ್ಯಾಕ್ ಮಂಜು ಆರಂಭಿಸಿದ್ದಾರೆ.
ಇನ್ನೂ ಖುಷಿಯ ವಿಚಾರ ಅಂದ್ರೆ, ಫ್ಯಾಂಟಮ್ ಚಿತ್ರದಲ್ಲಿ ಕನ್ನಡ ಸಿನಿಮಾ ಕಾರ್ಮಿಕರಿಗೆ ಕೆಲಸ ನೀಡಲಾಗುತ್ತಿದೆಯಂತೆ. ಇದನ್ನ ಕಿಚ್ಚ ಸುದೀಪ್ ಅವರ ಆದೇಶದ ಮೇರೆಗೆ ಮಾಡಲಾಗುತ್ತಿದೆ. ಇದಕ್ಕಾಗಿ 250 ಜನ ಸಿನಿಮಾ ಕಾರ್ಮಿಕರನ್ನ ಬೆಂಗಳೂರಿನಿಂದ ಹೈದರಾಬಾದ್ಗೆ ಕರೆದುಕೊಂಡು ಹೋಗಿದೆ ಫ್ಯಾಟಂ ಸಿನಿಮಾ ತಂಡ. ಇದ್ರೊಂದಿಗೆ ಕೊರೊನಾದಿಂದ ಕೆಲಸ ಇಲ್ಲದೆ ಕೂತಿದ್ದ ನೂರಾರು ಕುಟುಂಬಗಳಿಗೆ ಕಿಚ್ಚ ಸುದೀಪ್ ಬದುಕುಕಟ್ಟಿಕೊಟ್ಟಂತಾಗಿದೆ.
ಅನ್ನಪೂರ್ಣ ಸ್ಟುಡಿಯೋದ ಮೂರು ಫ್ಲೋರ್ಗಳಲ್ಲಿ ಶೂಟಿಂಗ್ ನಡೆಯಲಿದೆ. ಕೊರೊನಾದಿಂದಾಗಿ ಕಳೆದ 5 ತಿಂಗಳಿನಿಂದ ಫ್ಯಾಂಟಮ್ ಚಿತ್ರೀಕರಣ ನಿಂತಿತ್ತು.
ಶೂಟಿಂಗ್ ಸೆಟ್ ಕೆಲಸ ಕೂಡ ಅರ್ಧಕ್ಕೆ ನಿಂತಿತ್ತು. ಈಗ ಆರುವರೆ ಕೋಟಿ ವೆಚ್ಚದಲ್ಲಿ ಸೆಟ್ ಹಾಕಿ ಶೂಟಿಂಗ್ ಆರಂಭಿಸಲಾಗಿದೆ. 70 ದಿನಗಳ ಕಾಲ ಅನ್ನಪೂರ್ಣ ಸ್ಟುಡಿಯೋದಲ್ಲಿ ಒಂದೇ ಶೆಡ್ಯೂಲ್ನಲ್ಲಿ ಶೂಟಿಂಗ್ ಮಾಡೋಕೆ ನಿರ್ಧರಿಸಿದೆ ಚಿತ್ರತಂಡ.
