ಐಪಿಎಲ್ ಡೇಟ್ ಫಿಕ್ಸ್- ದೀಪಾವಳಿ ಹಬ್ಬಕ್ಕೆ ಸಿಗಲ್ಲ ಡಬಲ್ ಧಮಾಕಾ- ನವೆಂಬರ್ 8 ರಂದು ಫೈನಲ್ ಫೈಟ್..!

ರೈಸಿಂಗ್​ ಕನ್ನಡ ಸ್ಪೋರ್ಟ್ಸ್​​ಡೆಸ್ಕ್​:

13ನೇ ಆವೃತ್ತಿಯ ಇಂಡಿಯನ್​ ಪ್ರಿಮಿಯರ್​ ಲೀಗ್​ ಪಂದ್ಯಗಳು ನಡೆಯುವುದು ಬಹುತೇಕ ಖಚಿತವಾಗಿದೆ. ಕೊರೊನಾ  ಭೀತಿ ಯಿಂದ ಈ ಬಾರಿಯ ಐಪಿಎಲ್​​ ಮುಂದೂಡಲ್ಪಟ್ಟಿತ್ತು. ಈಗ ಬಿಸಿಸಿಐ ಸೆಪ್ಟೆಂಬರ್‌ 26ರಿಂದ ನವೆಂಬರ್‌ 8ರ ಒಳಗೆ ಮುಗಿಸಲು ತಾತ್ಕಲಿಕ ವೇಳಾಪಟ್ಟಿ ತಯಾರಿಸಿಕೊಂಡಿದೆ. ಸೆಪ್ಟೆಂಬರ್‌ 26ರ ಶನಿವಾರ ಆರಂಭವಾಗಲಿರುವ 13ನೇ ಆವೃತ್ತಿಯ ಐಪಿಎಲ್​​ ನವೆಂಬರ್‌ 8ರಂದು ಭಾನುವಾರ ಕೊನೆಗೊಳ್ಳಲಿದೆ.

13ನೇ ಆವೃತ್ತಿಯ ಐಪಿಎಲ್​​ 44 ದಿನಗಳ ಫಿಕ್ಚರ್​​​ ಆಗಿರಲಿದ್ದು ಒಟ್ಟು  60 ಪಂದ್ಯಗಳು ನಡೆಯಲಿದೆ. ಸ್ಟಾರ್​ ಐಪಿಎಲ್​​​ ಟೆಲಿಕಾಸ್ಟಿಂಗ್​ ರೈಟ್ಸ್​​ ಪಡೆದಿದ್ದು ಪ್ರತಿ ವರ್ಷ 3500ರಿಂದ 4000 ಕೋಟಿ ರೂಪಾಯಿಗಳ ಭಾರಿ ಮೊತ್ತವನ್ನು ಬಿಸಿಸಿಐ ಬೊಕ್ಕಸಕ್ಕೆ ನೀಡಲಿದೆ. ಹೀಗಾಗಿ ಹೆಚ್ಚು ಜಾಹೀರಾತುಗಳನ್ನು ಆಕರ್ಷಿಸುವ ಸಲುವಾಗಿ ಸ್ಟಾರ್ ಇಂಡಿಯಾ,​​​ ದೀಪಾವಳಿ ತನಕ ಟೂರ್ನಿ ಆಯೋಜನೆಗೆ ಬಿಸಿಸಿಐ ಬಳಿ ಕೇಳಿಕೊಂಡಿತ್ತು. ಆದ್ರೆ  ಬಿಸಿಸಿಐ, ಐಸಿಸಿ ಶೆಡ್ಯೂಲ್​ ಉಲ್ಲೇಖಿಸಿ ಅಲ್ಲಿ ತನಕ ಟೂರ್ನಿಯನ್ನು ನಡೆಸಲು ಒಪ್ಪಿಗೆ ನೀಡಿಲ್ಲ. ಹೀಗಾಗಿ 44 ದಿನಗಳಲ್ಲಿ ಐಪಿಎಲ್​​ ಕೊನೆಗೊಳ್ಳಲಿದೆ.

ಈ ನಡುವೆ ಟೀಮ್‌ ಇಂಡಿಯಾ ನವೆಂಬರ್‌ನಲ್ಲಿ ಆಸ್ಟ್ರೇಲಿಯಾ ಪ್ರವಾಸ ಕೈಗೊಳ್ಳಲಿದೆ. ಅಷ್ಟೇ ಅಲ್ಲ ಕೊರೊನಾ ಕ್ವಾರಂಟೈನ್​ ಸಮಯವನ್ನು ಕೂಡ ಆಸ್ಟೇಲಿಯಾದಲ್ಲಿ ಕಳೆಯಬೇಕಿರುವುದರಿಂದ ಕಾಂಗರೂ ನೆಲಕ್ಕೆ ಬೇಗನೆ ಹೋಗಬೇಕಿದೆ.  ಐಪಿಎಲ್ ನವೆಂಬರ್‌ 8ಕ್ಕೆ ಅಂತ್ಯಗೊಂಡರೆ ಭಾರತ ತಂಡ ನವೆಂಬರ್‌ 10ಕ್ಕೆ ಆಸ್ಟ್ರೇಲಿಯಾಕ್ಕೆ ಪ್ರಯಾಣ ಬೆಳೆಸುವುದು ಸಾಧ್ಯವಾಗುತ್ತದೆ.