‘ನಾನು ಮಲಾಲಾ ಅಲ್ಲ.. ಭಾರತದಲ್ಲಿ ಸುರಕ್ಷಿತವಾಗಿದ್ದೇನೆ’

ಇಂಗ್ಲೆಂಡ್ ಸಂಸತ್ತಿನಲ್ಲಿ ಕಾಶ್ಮೀರಿ ಯುವತಿ ಯಾನಾ ಮಿರ್ ಮಾಡಿರುವ ಭಾಷಣ ಎಲ್ಲೆಡೆ ಭಾರಿ ಸದ್ದು ಮಾಡುತ್ತಿದೆ. ಇಂಗ್ಲೆಂಡ್ ಜಮ್ಮು-ಕಾಶ್ಮೀರ ಅಧ್ಯಯನ ಕೇಂದ್ರ ಏರ್ಪಡಿಸಿದ್ದ ಕಾರ್ಯಕ್ರಮದಲ್ಲಿ ಯಾನಾ ಮಿರ್ ಮಾತನಾಡಿ, ‘ನಾನು ಮಲಾಲಾ ಯುಸುಫ್ ಜೈ ಅಲ್ಲ.. ಭಾರತದಲ್ಲಿ ಸುರಕ್ಷಿತವಾಗಿದ್ದೇನೆ’ ಎಂದಿದ್ದಾರೆ.

‘ನಾನು ಮಲಾಲಾ ಯುಸುಫ್ ಜೈ ಅಲ್ಲ. ನಾನು ಸ್ವತಂತ್ರವಾಗಿದ್ದೇನೆ. ನನ್ನ ದೇಶದಲ್ಲಿ ನಾನು ಸುರಕ್ಷಿತವಾಗಿದ್ದಾನೆ. ಭಾರತದ ಭಾಗವಾಗಿರುವ ಕಾಶ್ಮೀರ ನನ್ನ ತವರು ನಾಡು ಬಹಳ ಸುರಕ್ಷಿತವಾಗಿದೆ. ಎಂದಿಗೂ ನನ್ನ ದೇಶದಿಂದ ಪಲಾಯನ ಮಾಡಿ ಇತರ ದೇಶಗಳ ನೆಲೆಸುವ ಸ್ಥಿತಿ ನನಗೆ ಬಂದಿಲ್ಲ. ನಾನು ಎಂದೆಂದಿಗೂ ಮಲಾಲಾ ಯುಸುಫ್ ಜೈ ಆಗಲು ಬಯಸಲ್ಲ. ಆದರೆ ಮಲಾಲಾ ಯುಸುಫ್ ಜೈ ನನ್ನ ದೇಶವನ್ನು, ತಾಯ್ನಾಡನ್ನು ತುಳಿಯುತ್ತಿದ್ದಾರೆ ಎಂಬುದನ್ನು ಖಂಡಿಸುತ್ತೇನೆ’ ಎಂದಿದ್ದಾರೆ.

ಯಾನಾ ಮಿರ್ ಕುರಿತು 5 ಕುತೂಹಲಕಾರಿ ವಿಚಾರಗಳು :

ಯಾನಾ ಮಿರ್ ಶ್ರೀನಗರ ಮೂಲದವರಾಗಿದ್ದು ಸಾಮಾಜಿಕ ಕಾರ್ಯಕರ್ತೆ, ಯುಟ್ಯೂಬರ್ ಮತ್ತು ಟೆಡ್ ಎಕ್ಸ್ ಭಾಷಣಕಾರರಾಗಿ ಗುರುತಿಸಿಕೊಂಡಿದ್ದಾರೆ. ಆಕೆ ಮುಂಬೈ ವಿವಿಯಲ್ಲಿ ಎಂಬಿಎ ಮತ್ತು ಐಇಸಿ ವಿವಿಯಲ್ಲಿ ಪತ್ರಿಕೋದ್ಯಮ ಪದವಿ ಪಡೆದಿದ್ದಾರೆ.

ಯಾನಾ ಮಿರ್ ಸದ್ಯಕ್ಕೆ ಫಸ್ಟ್ಪೋಸ್ಟ್ ಇಂಗ್ಲೀಷ್ ವೆಬ್ ಸೈಟ್ ನಲ್ಲಿ ಫ್ರೀಲ್ಯಾನ್ಸರ್ ಆಗಿದ್ದು, ಐಟಿವಿ ಮಾಧ್ಯಮ ಸಂಸ್ಥೆಯ ವ್ಯವಸ್ಥಾಪಕ ಸಂಪಾದಕಿಯಾಗಿದ್ದಾರೆ. ಜಮ್ಮು-ಕಾಶ್ಮೀರದ ಮೊಟ್ಟ ಮೊದಲ ಮಹಿಳಾ ಯುಟ್ಯೂಬರ್ ಆಗಿದ್ದು, ಅವರ ಚಾನಲ್ಗೆ 20 ಲಕ್ಷಕ್ಕೂ ಹೆಚ್ಚು ಚಂದಾದಾರರಿದ್ದಾರೆ. ಕಾಶ್ಮೀರ ಕಣಿವೆಯ ಅಭಿವೃದ್ಧಿ, ಯುವಕರ ಕೌಶಲ್ಯಾಭಿವೃದ್ಧಿಗೆ ಮೀಸಲಾಗಿರುವ ಸರ್ಕಾರೇತರ ಜೆಕೆ ಯುವ ಸಂಘದ ಉಪಾಧ್ಯಕ್ಷರಾಗಿಯೂ ಮಿರ್ ಕಾರ್ಯ ನಿರ್ವಹಿಸುತ್ತಿದ್ದಾರೆ.