ಅಜೀರ್ಣಕ್ಕೆ ಕೈಯಲ್ಲೇ ಮದ್ದು, ಹೊಟ್ಟೆಹುಳವೂ ಮಂಗಮಾಯ- ಮಧುಮೇಹ, ತಲೆನೋವಿಗೂ ತುಂಬೆ ಗಿಡವೇ ರಾಮಬಾಣ

ತುಂಬೆ ಗಿಡದ ಉಪಯುಕ್ತತೆ ಬಗ್ಗೆ  ಪುರಾಣಿಕ ಆಯುರ್ವೇದ ಚಿಕಿತ್ಸಾ ಕೇಂದ್ರ ಮತ್ತು ಅನುವಂಶೀಯ ವೈದ್ಯರ ಪರಿಷತ್​ ತಿಳಿಸಿಕೊಡುತ್ತಿದೆ. ತುಂಬೆ ತುಂಬೆಲ್ಲಾ ಔಷಧಿ ಅನ್ನುವುದು ಗೊತ್ತೇ ಇದೆ. ಆದ್ರೆ ತುಂಬೆಯಿಂದ ಮನೆ ಮದ್ದು ಮಾಡಿಕೊಳ್ಳುವುದು ಹೇಗೆ ಅನ್ನುವುದನ್ನು ಪುರಾಣಿಕ ಆಯುರ್ವೇದ ಚಿಕಿತ್ಸಾ ಕೇಂದ್ರ ಮತ್ತು ಅನುವಂಶೀಯ ವೈದ್ಯರ ಪರಿಷತ್ ತಿಳಿಸಿಕೊಟ್ಟಿದೆ.

• ಅಜೀರ್ಣಕ್ಕೆ

ಅರ್ಧ ಹಿಡಿಯಷ್ಟು ತುಂಬೆ ಸೊಪ್ಪನ್ನು ಚೆನ್ನಾಗಿ ಬೇಯಿಸಿಕೊಳ್ಳಬೇಕು. ಅದಕ್ಕೆ ಬೆಳ್ಳುಳ್ಳಿ, ಸಾಸಿವೆ, ಕರಿಬೇವು ಜೀರಿಗೆಯನ್ನು ತುಪ್ಪದೊಂದಿಗೆ ಒಗ್ಗರಣೆ ಕೊಟ್ಟು ಪಲ್ಯದಂತೆ ಮಾಡಿ ಊಟದ ಜೊತೆ ಸೇವಿಸಬೇಕು. ಹೀಗೆ ಮಾಡುವುದರಿಂದ ಅಜೀರ್ಣ ದೂರವಾಗಿ ಪಚನ ಕ್ರೀಯೆ ಉತ್ತಮವಾಗುತ್ತದೆ.

• ಹೊಟ್ಟೆ ಜಂತುಹುಳ

3 ರಿಂದ 4 ತುಂಬೆ ಬೇರನ್ನು ತೊಳೆದು ಅರೆದು ಒಂದೆರಡು ಲೋಟ ಮಜ್ಜಿಗೆ ಸೇರಿಸಿ ಸ್ವಲ್ಪ ಬಿಸಿಮಾಡಿ ನಿತ್ಯ ಬೆಳಗ್ಗೆ ಮತ್ತು ಸಾಯಂಕಾಲ ಸೇವಿಸಬೇಕು. ಹೀಗೆ ಮಾಡುವುದರಿಂದ ಜಂತು ಹುಳದ ಸಮಸ್ಯೆ ದೂರವಾಗುತ್ತದೆ.

• ತಲೆನೋವು

ತುಂಬೆ ಸೊಪ್ಪಿನ ರಸದೊಂದಿಗೆ ಸ್ವಲ್ಪ  ಬೆಳ್ಳುಳ್ಳಿ ರಸ ಸೇರಿಸಿ ಚೆನ್ನಾಗಿ ಕಲಸಿಕೊಳ್ಳಬೇಕು. ನಂತರ 1 ರಿಂದ 4 ಹನಿಯಷ್ಟು ತುಂಬೆ ಮತ್ತು ಬೆಳ್ಳುಳ್ಳಿ ರಸದ ಮಿಕ್ಸ್​ ಅನ್ನು ಮೂಗಿನೊಳಗೆ ಹಾಕಿಕೊಳ್ಳವುದುರಿಂದ ತಲೆನೋವು ನಿವಾರಣೆ ಆಗುತ್ತದೆ.

• ಮಧುಮೇಹ

7 ರಿಂದ 8 ತುಂಬೆ ಎಲೆಯೊಂದಿಗೆ 4 ರಿಂದ 5 ಕಾಳು ಮೆಣಸು ಸೇರಿಸಿ ನುಣ್ಣಗೆ ಅರೆದು ಪ್ರತಿದಿನ ಬೆಳಗ್ಗೆ ಸೇವಿಸಬೇಕು. ಇದೇ ರೀತಿ 7 ರಿಂದ 8 ವಾರ ಸೇವನೆ ಮಾಡಿದರೆ ಮೂತ್ರದಲ್ಲಿರುವ ಮಧುವೇಹ ನಿವಾರಣೆ ಆಗುತ್ತದೆ.

ಇದೆಲ್ಲದರ ಜೊತೆಗೆ ಮನೆ ಮದ್ದು ಮಾಡುವ ಮೊದಲು ವೈದ್ಯರನ್ನು ಸಮಾಲೋಚಿಸಿ. ಆಯುರ್ವೇದ ಚಿಕಿತ್ಸೆಯ ಬಗ್ಗೆ ಹೆಚ್ಚಿನ ಮಾಹಿತಿಗೆ ಪುರಾಣಿಕ ಆಯುರ್ವೇದ ಕೇಂದ್ರವನ್ನು ಸಂಪರ್ಕಿಸಿ