2050ಕ್ಕೆ ಮಂಗಳೂರು, ಮುಂಬೈ, ಕೋಲ್ಕತ್ತಾಗೆ ಮುಳುಗಡೆ ಭೀತಿ..! ಜಾಗತಿಕ ಗಂಡಾಂತರ..!

ರೈಸಿಂಗ್ ಕನ್ನಡ : ಜಾಗತಿಕ ತಾಪಮಾನ ಏರಿಕೆ ಬಿಸಿ, ಇದೀಗ ಕರ್ನಾಟಕ ಸೇರಿದಂತೆ ಭಾರತಕ್ಕೂ ತಟ್ಟುವ ಭೀತಿ ಎದುರಾಗಿದೆ. ಜಾಗತಿಕ ತಾಪಮಾನ ಏರಿಕೆಯಿಂದಾಗಿ ಸಮುದ್ರದ ಮಟ್ಟ ಏರಿಕೆ ಆಗ್ತಿದೆ. ಇದರಿಂದಾಗಿ 2050ರ ವೇಳೆಗೆ ಭಾರತದ ಕರಾವಳಿ ತೀರಿಗೆ ಕಂಟಕ ಕಾದಿದೆ ಅನ್ನೋ ಶಾಕಿಂಗ್ ಸತ್ಯ ಬಯಲಾಗಿದೆ. ಅದರಲ್ಲೂ ಮುಂಬೈ, ಕೋಲ್ಕತ್ತಾ, ಒಡಿಶಾ, ಬಂಗಾಳದ ಕರಾವಳಿ ಪ್ರದೇಶ ಬಹುತೇಕ ಮುಳುಗಡೆ ಆಗಲಿದೆ ಎಂದು ಅಧ್ಯಯನ ಎಚ್ಚರಿಸಿದೆ.

ವಿಶೇಷ ಅಂದ್ರೆ, ಇದರಲ್ಲಿ ನಮ್ಮ ಮಂಗಳೂರುಗೂ ಭೀತಿ ಇದ್ದು, ಮುಂಬೈ ಹಾಗೂ ಕೋಲ್ಕತ್ತಾಗೆ ಇರುವಷ್ಟು ಆತಂಕ ಇಲ್ಲ. ಆದ್ರೆ, ಮುಂದಿನ ದಿನಗಳಲ್ಲಿ ಮಂಗಳೂರಿಗೂ ಅಪಾಯ, ಗಂಡಾಂತರ ಕಾದಿದೆ ಎಂದು ತಜ್ಞರು ಅಭಿಪ್ರಾಯ ಪಟ್ಟಿದ್ದಾರೆ.

ಭಾರತವಷ್ಟೇ ಅಲ್ಲದೆ, ಏರುತ್ತಿರುವ ಸಮುದ್ರ ಮಟ್ಟವು ವಿಶ್ವವ್ಯಾಪಿ ಪರಿಣಾಮ ಬೀರಲಿದೆ. ಈ ಶತಮಾನದ ಅಂತ್ಯಕ್ಕೆ 2 ಸೆಂಟಿ ಮೀಟಿರ್​ ಹಾಗೂ 20ನೇ ಶತಮಾನದಲ್ಲಿ 11 ರಿಂದ 16 ಸೆಂಟಿ ಮೀಟರ್​ನಷ್ಟು ಸಮುದ್ರದ ನೀರು ಏರಿಕೆಯಾಗಲಿದೆ. 2050ಕ್ಕೆ ವಿಶ್ವದ 34 ಕೋಟಿ ಜನ ಹಾಗೂ 2100ಕ್ಕೆ 63 ಕೋಟಿ ಜನ ಸಮುದ್ರದ ಏರಿಕೆಗೆ ತತ್ತರಿಸಲಿದ್ದಾರೆ. ಅಮೆರಿಕದ ನ್ಯೂ ಜೆರ್ಸಿಯ ಕ್ಲೈಮೇಟ್​​ ಸೆಂಟ್ರಲ್​ ಎಂಬ ಸಂಸ್ಥೆ ಈ ಕುರಿತು ಅಧ್ಯಯನ ವರದಿ ಸಿದ್ಧಪಡಿಸಿದೆ.

ಅದರಲ್ಲೂ ಚೀನಾದ 9 ಕೋಟಿ, ಭಾರತದ 3.6 ಕೋಟಿ, ಬಾಂಗ್ಲಾದೇಶದ 4 ಕೋಟಿ, ವಿಯೇಟ್ನಾಂನ 3 ಕೋಟಿ, ಇಂಡೋನೇಷ್ಯಾದ 2.3 ಕೋಟಿ ಸೇರಿದಂತೆ ಒಟ್ಟು 2050ಕ್ಕೆ 34 ಕೋಟಿ ಜನ ಮುಳುಗುವ ಭೀತಿ ಇದೆ ಎನ್ನಲಾಗಿದೆ.