ಸಂತ್ರಸ್ಥರಿಗೆ ಶೌಚಾಲಯ ಇಲ್ಲ, ಬೀದಿಯಲ್ಲೇ ಪಾಠ : ರಾಜ್ಯ ಸರ್ಕಾರದ ಸಿದ್ದು ವಾಗ್ದಾಳಿ

ಬೆಂಗಳೂರು : ಮಾಜಿ ಸಿಎಂ, ಪ್ರತಿಪಕ್ಷ ನಾಯಕ ಸಿದ್ದರಾಮಯ್ಯ, ರಾಜ್ಯ ಬಿಜೆಪಿ ಸರ್ಕಾರದ ವಿರುದ್ಧ ಆಕ್ರೋಶವನ್ನ ಮತ್ತೊಮ್ಮೆ ಹೊರಹಾಕಿದ್ದಾರೆ. ಬೆಂಗಳೂರಿನಲ್ಲಿ ನಡೆದ ಮಾಧ್ಯಮ ಸಂವಾದದಲ್ಲಿ ಮಾತ್ನಾಡಿದ ಸಿದ್ದು, ಉತ್ತರ ಕರ್ನಾಟಕದಲ್ಲಿ ಸಂತ್ರಸ್ಥರಿಗೆ ಶೆಡ್ ಮಾತ್ರ ಹಾಕಲಾಗಿದೆ. ಕನಿಷ್ಠ ಶೌಚಾಲಯಗಳೂ ಇಲ್ಲದೇ, ಬಯಲಲ್ಲೇ ಶೌಚಕ್ಕೆ ಹೋಗುವಂತಹ ಸ್ಥಿತಿ ನಿರ್ಮಾಣವಾಗಿದೆ ಎಂದು ರಾಜ್ಯ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದ್ರು.

ಬಹುತೇಕ ಶಾಲಾ ಕಟ್ಟಡಗಳು ಬಿದ್ದುಹೋಗಿವೆ. ಮಕ್ಕಳಿಗೆ ಯಾವುದೇ ವ್ಯವಸ್ಥೆ ಮಾಡಿಲ್ಲ. ಬೀದಿಯಲ್ಲೇ ಮಕ್ಕಳು ಪಾಠ ಕೇಳುವಂತಾಗಿದೆ. ಇದರ ಜೊತೆ ತಾತ್ಕಾಲಿಕ ಶೆಡ್​ಗೆ ಹೋಗಲು ಕೂಡ ಜನ ಭಯ ಪಡ್ತಿದ್ದಾರೆ ಎಂದು ಜನರ ನೋವು ಹೊರಹಾಕಿದ್ರು.

ನೆರೆಯಿಂದಾಗಿ ಸುಮಾರು ೧೮೦೦ ಮಗ್ಗಗಳು ಮಳೆಗೆ ಕೊಚ್ಚಿ ಹೋಗಿವೆ. ಸರ್ಕಾರ ಒಂದು ಮಗ್ಗಕ್ಕೆ ೨೫ ಸಾವಿರ  ಕೋಡೋದಾಗಿ ಹೇಳಿತ್ತು. ಆದ್ರೆ, ಆರು ಮಗ್ಗ ಹೋಗಿದ್ದರೂ ೨೫ ಸಾವಿರ, ಒಂದು ಮಗ್ಗ ಕಳೆದುಕೊಂಡ್ರೂ ೨೫ ಸಾವಿರ ಕೊಡ್ತಿದೆ. ಮೂರು ತಿಂಗಳಾದ್ರೂ ಪರಿಹಾರ ಸಿಕ್ಕಿಲ್ಲ ಎಂದು ಸಿದ್ದರಾಮಯ್ಯ ಆರೋಪಿಸಿದ್ರು.