18 ದೇಶಗಳಲ್ಲಿ ಶುರುವಾಗಿದೆ ಆರ್ಥಿಕ ಹಿಂಜರಿತ

ಇಂಗ್ಲೆಂಡ್, ಜಪಾನ್ ಹಾದಿಯಲ್ಲಿ 18 ದೇಶಗಳು ಆರ್ಥಿಕ ಹಿಂಜರಿತದ ಭೀತಿ ಎದುರಿಸುತ್ತಿವೆ. ಈ 18 ದೇಶಗಳ ಪೈಕಿ ಬಹುತೇಕ ದೇಶಗಳು ಯುರೋ ಒಕ್ಕೂಟಕ್ಕೆ ಸೇರಿವೆ. ಡೆನ್ಮಾರ್ಕ್, ಲಕ್ಸೆಂಬರ್ಗ್, ಬಹ್ರೈನ್, ಕೆನಡಾ, ದಕ್ಷಿಣ ಆಫ್ರಿಕಾ ಸೇರಿ 14 ದೇಶಗಳು ಆರ್ಥಿಕ ಹಿಂಜರಿತದ ಭೀತಿ ಎದುರಿಸುತ್ತಿವೆ. ಜರ್ಮನಿ ಈಗಾಗಲೇ ಶೇಕಡ 0.3ರಷ್ಟು ಜಿಡಿಪಿ ಕುಸಿತ ಕಂಡಿದೆ. ಯುರೋ ಒಕ್ಕೂಟದ ಅತ್ಯಂತ ದೊಡ್ಡ ಆರ್ಥಿಕತೆಯಾದ ಜರ್ಮನಿ ಜಿಡಿಪಿ ಕುಸಿತ ಕಂಡಿರುವುದು ಕಳವಳಕಾರಿ ಬೆಳವಣಿಗೆಯಾಗಿದೆ.

ಭಾರತಕ್ಕೆ ಕಾದಿದೆಯಾ ಆರ್ಥಿಕ ಹಿಂಜರಿತದ ಭೀತಿ?

ಆಧುನಿಕ ಯುಗದಲ್ಲಿ ಜಗತ್ತು ಸಣ್ಣ ಹಳ್ಳಿಯ ರೀತಿ ಬದಲಾಗಿದೆ. ಜಗತ್ತಿನಲ್ಲಿ ಆಗುವ ಪ್ರತಿಯೊಂದು ಪರಿಣಾಮಗಳು ಸಹ ಎಲ್ಲ ದೇಶಗಳ ಮೇಲೆ ಪ್ರಭಾವ ಬೀರುತ್ತವೆ. ಯುರೋ ಒಕ್ಕೂಟದಲ್ಲಿ ಆರ್ಥಿಕ ಹಿಂಜರಿತ ಶುರುವಾಗಿರುವುದರಿಂದ ಭಾರತದ ಆರ್ಥಿಕತೆಯ ಮೇಲೂ ಪ್ರಭಾವ ಬೀರಲಿದೆ. ಭಾರತದ ಮಾಹಿತಿ ತಂತ್ರಜ್ಞಾನ ಉದ್ಯಮದ ರಫ್ತಿನಲ್ಲಿ ಇಳಿಕೆಯಾಗುವ ಸಂಭವ ಇದೆ.

ಇದರ ಜೊತೆಗೆ ಆಮದಾಗುವ ವಸ್ತುಗಳ ಬೆಲೆ ಹೆಚ್ಚಳದಿಂದ ಭಾರತದ ಆರ್ಥಿಕತೆಯ ಮೇಲೆ ಹೆಚ್ಚಿನ ಒತ್ತಡ ಬೀರಲಿದೆ. ಇಷ್ಟಾದರೂ ಭಾರತದಲ್ಲಿ ಹೆಚ್ಚಿನ ಜನ ಉಳಿತಾಯ ಯೋಜನೆಗಳಲ್ಲಿ ಹಣ ಹೂಡಿಕೆ ಮಾಡಿರುವುದರಿಂದ ಭಾರತದ ಆರ್ಥಿಕತೆಯ ಮೇಲಿನ ಒತ್ತಡವನ್ನು ಕಡಿಮೆ ಮಾಡಿದೆ ಎಂದು ಆರ್ಥಿಕ ತಜ್ಞರು ಹೇಳಿದ್ದಾರೆ.