ಬೆಂಗಳೂರಲ್ಲಿ ನಲ್ಲಿ ನೀರು ಕುಡಿಯಲು ಯೋಗ್ಯವಲ್ಲ : ನೀರು ಕುಡಿದ್ರೆ ಆಸ್ಪತ್ರೆ ಗ್ಯಾರೆಂಟಿ..!

ನವದೆಹಲಿ : ಬೆಂಗಳೂರಿನಲ್ಲಿ ಬರುವ ನಲ್ಲಿ ನೀರು ನೇರವಾಗಿ ಕುಡಿಯಲು ಯೋಗ್ಯವಲ್ಲ ಎನ್ನುವ ಸ್ಫೋಟಕ ಮಾಹಿತಿ ಹೊರಬಿದ್ದಿದೆ. ಕೇಂದ್ರ ಗ್ರಾಹಕ ವ್ಯವಹಾರಗಳ ಸಚಿವಾಲಯವು, ಬ್ಯುರೋ ಆಪ್​ ಇಂಡಿಯನ್​ ಸ್ಟಾಂಡರ್ಡ್​​ ಮೂಲಕ ಭಾರತದ 17 ರಾಜ್ಯಗಳ ರಾಜಧಾನಿಗಳ ನೀರನ್ನು ಸಮೀಕ್ಷೆಗೆ ಒಳಪಡಿಸಿತ್ತು. ಈ ವೇಳೆ, ಬೆಂಗಳೂರಿನ ನಲ್ಲಿ ನೀರು ಕುಡಿಯಲು ಸುರಕ್ಷಿತವಲ್ಲ ಎನ್ನುವ ಆಘಾತಕಾರಿ ಅಂಶ ಬೆಳಕಿಗೆ ಬಂದಿದೆ.

ಬೆಂಗಳೂರಿನ 10 ಸ್ಥಳಗಳಲ್ಲಿನ ನಲ್ಲಿ ನೀರನ್ನು ಪರೀಕ್ಷೆಗೆ ಒಳಪಡಿಸಲಾಗಿತ್ತು. ಆದ್ರೆ, ಇದರಲ್ಲಿ ಒಂದೇ ಒಂದು ಮಾದರಿ ಕೂಡ ಕುಡಿಯಲು ಯೋಗ್ಯ ಎನ್ನುವಂತಿಲ್ಲ. ಶುದ್ಧೀಕರಿಸದೇ ಕುಡಿದ್ರೆ, ಅನಾರೋಗ್ಯಕ್ಕೆ ಗುರಿಯಾಗೋದು ಪಕ್ಕಾ ಎಂದು ಅಧ್ಯಯನ ಹಾಗೂ ಸಂಶೋಧನೆಯಲ್ಲಿ ತಿಳಿದುಬಂದಿದೆ. ಇದಕ್ಕೆ ಸಂಬಂಧಿಸಿದ ವರದಿಯನ್ನು ಶನಿವಾರ ಕೇಂದ್ರ ಸಚಿವ ರಾಮ್ ವಿಲಾಸ್ ಪಾಸ್ವಾನ್ ಬಿಡುಗಡೆ ಮಾಡಿದ್ರು.

ಬೆಂಗಳೂರಿನ ನೀರು ಸುರಕ್ಷಿತವಲ್ಲ ಎಂಬುದು ಖಾತ್ರಿಯಾಗಿದೆ. ಹೀಗಾಗಿ, ಇನ್ಮುಂದೆ ಬೆಂಗಳೂರು ನಾಗರೀಕರು ನೀರನ್ನು ಶುದ್ಧೀಕರಿಸದೇ ಕುಡಿಯಲೇ ಬೇಡಿ. ಶುದ್ಧ ನೀರಿನ ಘಟಕ ಅಥವಾ ಮನೆಯಲ್ಲೇ ನೀರಿನ ಶುದ್ಧೀಕರಣ ಯಂತ್ರವನ್ನ ಬಳಸಿ ನೀರು ಕುಡಿಯಿರಿ. ಇಲ್ಲದೇ ಹೋದ್ರೆ, ಅನಾರೋಗ್ಯ ಹಾಗೂ ವಿವಿಧ ರೀತಿಯ ಕಾಯಿಲೆಗಳು ಕಟ್ಟಿಟ್ಟ ಬುತ್ತಿ.