SSLC ಪರೀಕ್ಷೆಗೆ ಬಂದಿದ್ದ ಅಧಿಕಾರಿಗೆ ಕೊರೊನಾ ಪಾಸಿಟಿವ್?

ರೈಸಿಂಗ್ ಕನ್ನಡ :

ತುಮಕೂರು :

ಪ್ರತಿನಿಧಿ : ಕೆ.ಆರ್ ಬಾಬು

ತುಮಕೂರು ಜಿಲ್ಲೆಯಲ್ಲಿ ದಿನೇ ದಿನೇ ಕೊರೊನಾ ಪಾಸಿಟಿವ್ ಪ್ರಕರಣಗಳು ಹೆಚ್ಚಾಗುತ್ತಿವೆ. ಆತಂಕದ ವಿಷ್ಯ ಅಂದ್ರೆ, ಮೊನ್ನೆ ನಡೆದ SSLC ಪರೀಕ್ಷೆಯಲ್ಲಿ ಭಾಗಿಯಾಗಿದ್ದ ಸಿಟ್ಟಿಂಗ್ ಸ್ಕ್ವಾಡ್‌ಗೆ ಕೊರೊನಾ ಪಾಸಿಟಿವ್ ವರದಿ ಪತ್ತೆಯಾಗಿದೆ. ಬಿಸಿಎಂ ಅಧಿಕಾರಿಯನ್ನ ಸ್ಕ್ವಾಡ್ ಆಗಿ ಶಿಕ್ಷಣ ಇಲಾಖೆ ನೇಮಿಸಿತ್ತು. ಬಿಸಿಎಂ ಅಧಿಕಾರಿ ಕೊರೊನಾ ಪರೀಕ್ಷೆಗೆ ಒಳಪಟ್ಟು, ಪರೀಕ್ಷಾ ಕರ್ತವ್ಯಕ್ಕೆ ಹಾಜರಾಗಿದ್ದರಂತೆ. ಆ ಬಳಿಕ ತುಮಕೂರು ಜಿಲ್ಲೆ ಪಾವಗಡ ತಾಲೂಕಿನ ಅರಸೀಕೆರೆಯ ಪರೀಕ್ಷೆ ಕೇಂದ್ರದಲ್ಲಿ SSLC ಪರೀಕ್ಷಾ ಕರ್ತವ್ಯ ನಿರ್ವಹಿಸಿದ್ದರು. ಈ ಸಂಬಂಧ ಬಿಸಿಎಂ ಅಧಿಕಾರಿಯ ಸಂಪರ್ಕಕ್ಕೆ ಬಂದಿರುವ 12 ಶಿಕ್ಷಕರನ್ನು ಕ್ವಾರಂಟೈನ್ ಮಾಡಲಾಗಿದೆ ಎಂದು ತುಮಕೂರು ಡಿಹೆಚ್‌ಓ ನಾಗೇಂದ್ರಪ್ಪ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

22ನೇ ತಾರೀಕು ಕೊರೋನಾ ಪರೀಕ್ಷೆಗೆ ಒಳಗಾಗಿದ್ದ ಬಿಸಿಎಂ ಅಧಿಕಾರಿ, ಆ ವಿಚಾರವನ್ನ ಮುಚ್ಚಿಟ್ಟು ಪರೀಕ್ಷಾ ಕರ್ತವ್ಯಕ್ಕೆ ಹಾಜರಾಗಿದ್ದರು ಎನ್ನಲಾಗಿದೆ. ಒಟ್ಟಿನಲ್ಲಿ ಕೊರೊನಾ ವಿಚಾರದಲ್ಲಿ ಎಷ್ಟೇ ಎಚ್ಚರಿಕೆ ವಹಿಸಿದ್ರೂ, ಒಂದಿಲ್ಲೊಂದು ಅವಾಂತರಗಳು ಆಗುತ್ತಲೇ ಇವೆ. ಆದ್ರೆ, ಮಕ್ಕಳ ವಿಚಾರದಲ್ಲಿ ಮಾತ್ರ ಯಾವುದೇ ಎಡವಟ್ಟಾಗೋದು ಬೇಡ. ಅಂದು ಪರೀಕ್ಷೆ ಬರೆದಿರುವ ಯಾವ ಮಕ್ಕಳಿಗೂ ಸೋಂಕು ಆಗದೇ ಇರಲಿ ಅಂತ ಆಶಿಸೋಣ. ಕೊರೊನಾ ವಿಚಾರದಲ್ಲಿ ಯಾರೂ ಅಜಾಗರೂಕತೆಯಿಂದ ವರ್ತಿಸಬೇಡಿ.