ByElection : ಕೆ.ಆರ್. ಪೇಟೆ ಟಿಕೆಟ್​​ಗಾಗಿ ಜೆಡಿಎಸ್​ನಲ್ಲಿ ಫ್ಯಾಮಿಲಿ ಫೈಟ್​ : ನಿಖಿಲ್​​ ವರ್ಸಸ್​ ಭವಾನಿ ರೇವಣ್ಣ..! ಯಾರಿಗೆ ಟಿಕೆಟ್​..?

ಮಂಡ್ಯ : ಉಪ ಚುನಾವಣಾ ಕಣ ರಂಗೇರಿದ್ದು, ಎಲ್ಲಾ ಪಕ್ಷಗಳಲ್ಲಿ ಟಿಕೆಟ್​ಗಾಗಿ ಪೈಪೋಟಿ ಶುರುವಾಗಿದೆ. ಆದ್ರೆ, ಜೆಡಿಎಸ್​ನಲ್ಲಿ ಟಿಕೆಟ್​ಗಾಗಿ ಫ್ಯಾಮಿಲಿ ಫೈಟ್​ ಜೋರಾಗಿಯೇ ನಡೀತಿದೆ. ಇತ್ತೀಚೆಗಷ್ಟೇ ಬೆಂಗಳೂರಿನಲ್ಲಿ ಸುದ್ದಿಗೋಷ್ಠಿ ನಡೆಸಿದ್ದ ಹೆಚ್.ಡಿ. ದೇವೇಗೌಡರು, ನಿಮ್ಮ ಕುಟುಂಬದಿಂದ ಯಾರಾದ್ರೂ ಚುನಾವಣೆಗೆ ನಿಲ್ತಾರ ಅಂತ ಕೇಳಿದ್ರೆ, ನಿಮಗೇನು ಬೇರೆ ಕೆಲಸ ಇಲ್ವಾ ಅಂತ ಉತ್ತರ ನೀಡಿದ್ರು. ಆದ್ರೀಗ, ಕೆ.ಆರ್. ಪೇಟೆಗೆ ಉಪ ಚುನಾವಣೆ ನಡೆಯಲಿದ್ದು, ಜೆಡಿಎಸ್​ ಅಭ್ಯರ್ಥಿ ಯಾರು ಅನ್ನೋ ಕುತೂಹಲ ಜೋರಾಗಿದೆ.

ಯಾಕಂದ್ರೆ, ಕಳೆದ ಲೋಕಸಭಾ ಚುನಾವಣೆಯಲ್ಲಿ ಮಂಡ್ಯದಿಂದ ಸ್ಪರ್ಧಿಸಿ ಸೋತಿದ್ದ ನಿಖಿಲ್​ ಕುಮಾರಸ್ವಾಮಿ, ಕೆ.ಆರ್. ಪೇಟೆಯ ಬೈ ಎಲೆಕ್ಷನ್​ಗೆ ಅಭ್ಯರ್ಥಿ ಆಗೋ ಸಾಧ್ಯತೆ ಇದೆ. ಮಗನನ್ನ ಹೇಗಾದರೂ ಮಾಡಿ, ರಾಜಕೀಯಕ್ಕೆ ತರಬೇಕು ಅಂತ ಮಾಜಿ ಸಿಎಂ ಕುಮಾರಸ್ವಾಮಿ ಪಟ್ಟು ಹಿಡಿದಿದ್ದಾರೆ. ಇದಕ್ಕೆ ತಕ್ಕಂತೆ ನಿಖಿಲ್ ಕುಮಾರಸ್ವಾಮಿ ಕೂಡ, ಕೆ.ಆರ್​.ಪೇಟೆ ಭಾಗದಲ್ಲಿ ಸುತ್ತಾಟ ನಡೆಸ್ತಿದ್ದಾರೆ. ಮಂಡ್ಯ ಪ್ರವಾಸ ಮಾಡ್ತಿರೋ ನಿಖಿಲ್​, ಕೆ.ಆರ್.ಪೇಟೆ ಭಾಗದಲ್ಲಿ ಹೆಚ್ಚು ಹೆಚ್ಚು ಓಡಾಟ ಮಾಡ್ತಿದ್ದಾರೆ. ಹೀಗಾಗಿ, ಸಹಜವಾಗಿಯೇ ನಿಖಿಲ್​ ಕುಮಾರಸ್ವಾಮಿ, ಕೆ.ಆರ್. ಪೇಟೆಯಿಂದ ಜೆಡಿಎಸ್ ಅಭ್ಯರ್ಥಿಯಾಗೋ ಸಾಧ್ಯತೆ ಇದೆ.

ಮತ್ತೊಂದೆಡೆ ಹೆಚ್​.ಡಿ. ರೇವಣ್ಣ ಪತ್ನಿ, ಭವಾನಿ ರೇವಣ್ಣ ಕೂಡ ಟಿಕೆಟ್​ ಆಕಾಂಕ್ಷಿ ಎನ್ನಲಾಗಿದೆ. ಕೆ.ಆರ್. ಪೇಟೆಗೆ ತನಗೆ ಟಿಕೆಟ್​ ನೀಡುವಂತೆ ಮಾವ ಹೆಚ್​.ಡಿ. ದೇವೇಗೌಡರ ಬಳಿ ಕೇಳಿದ್ದಾರೆ ಎನ್ನಲಾಗಿದೆ. ಹೀಗಾಗಿ, ಕೆ.ಆರ್.ಪೇಟೆ ಟಿಕೆಟ್​​ಗಾಗಿ ನಿಖಿಲ್​ ವರ್ಸಸ್​​ ಭವಾನಿ ರೇವಣ್ಣ ನಡುವೆ ಪೈಪೋಟಿ ಶುರುವಾಗಿದೆ ಅನ್ನೋದು ರಾಜಕೀಯ ವಲಯದ ಚರ್ಚೆ. ಇದೇ ವಿಚಾರವಾಗಿ ಖಾಸಗಿ ಸುದ್ದಿವಾಹಿನಿಯಲ್ಲೂ ಸುದ್ದಿ ಪ್ರಸಾರವಾಗಿದೆ.

ಈ ಮಧ್ಯೆ, ಒಂದ್ವೇಳೆ ನಿಖಿಲ್​ ಕುಮಾರಸ್ವಾಮಿಗೆ ಕೆ.ಆರ್. ಪೇಟೆಗೆ ಟಿಕೆಟ್​ ನೀಡಿದ್ರೆ, ತನಗೆ ಹುಣಸೂರಿನಿಂದ ಟಿಕೆಟ್​ ನೀಡಿ ಎಂದು ಭವಾನಿ ರೇವಣ್ಣ ಕೇಳಿದ್ದಾರೆ ಎನ್ನಲಾಗಿದೆ. ಸದ್ಯ, ಇದ್ಯಾವುದು ಅಧಿಕೃತವಲ್ಲ. ನೋಡೋಣ, ಮುಂದೇನಾಗುತ್ತೆ ಅನ್ನೋದು ಇನ್ನೊಂದು ವಾರದಲ್ಲಿ ಸ್ಪಷ್ಟ ಚಿತ್ರಣ ಸಿಗಲಿದೆ.