ಲೆಕ್ಕಕೊಡಿ ಅಭಿಯಾನಕ್ಕೆ ಸರ್ಕಾರದಿಂದ ತಿರುಗೇಟು- ಎಲ್ಲಾ ಇಲಾಖೆಗಳಿಂದಲೂ ಲೆಕ್ಕ ಕೇಳಿರುವ ಮುಖ್ಯಕಾರ್ಯದರ್ಶಿ

ರೈಸಿಂಗ್​ ಕನ್ನಡ:

ಬೆಂಗಳೂರು:

ಕೊರೊನಾ ಕಾಟ ಕರ್ನಾಟಕದಲ್ಲಿ ದಿನದಿಂದ ದಿನಕ್ಕೆ ಮಿತಿಮೀರುತ್ತಿದೆ. ಜನ ಸಾಯುತ್ತಾ ಇದ್ರೂ ರಾಜಕೀಯ ಪಕ್ಷಗಳು ಇನ್ನೂ ರಾಜಕೀಯ ಬಿಟ್ಟಿಲ್ಲ. ರಾಜ್ಯ ಸರ್ಕಾರದ ವಿರುದ್ಧ ತಿರುಗಿಬಿದ್ದಿರುವ ವಿಪಕ್ಷ ಕಾಂಗ್ರೆಸ್​​​ ಸಿ.ಎಂ.ಯಡಿಯೂರಪ್ಪ ಸರ್ಕಾರದಿಂದ ಕೊರೊನಾ ಲೆಕ್ಕಕೊಡಿ ಅಭಿಯಾನ ಶುರುಮಾಡಿದೆ. ಕಾಂಗ್ರೆಸ್​ನಲ್ಲೇ ಈ ಅಭಿಯಾನಕ್ಕೆ ಎರಡು ಮನಸ್ಸುಗಳಿದ್ದರೂ ರಾಜ್ಯಸರ್ಕಾರ ಅವಶ್ಯಬಿದ್ರೆ ಲೆಕ್ಕಕೊಡುವ ತಯಾರಿ ಮಾಡುತ್ತಿದೆ. ಕೊರೋನಾ ನಿಯಂತ್ರಣ ಸಂಬಂಧಿತ ಖರ್ಚು ವೆಚ್ಚಗಳ ವಿಚಾರವನ್ನು ಲೆಕ್ಕಪತ್ರದ ಮೂಲಕ ಕೊಡಲು ಸಿದ್ಧತೆ ಮಾಡಿಕೊಳ್ಳುತ್ತಿದೆ.

ವಿಧಾನಸಭೆಯ ವಿಪಕ್ಷ ನಾಯಕ ಸಿದ್ಧರಾಮಯ್ಯ ಪತ್ರದಿಂದ ಎಚ್ಚೆತ್ತುಕೊಂಡ ರಾಜ್ಯ ಸರ್ಕಾರ ಎಲ್ಲಾ ಇಲಾಖೆಗಳಿಂದಲೂ ಕೊರೊನಾ ಸಂಬಂಧಿತ ಲೆಕ್ಕಾಚಾರಗಳನ್ನು ಕೇಳಿದೆ.  ಕೊರೊನಾ ಸಂಬಂಧಿತ ಖರ್ಚು ವೆಚ್ಚದ ಲೆಕ್ಕ ಕೇಳಿದ್ದ ಸಿದ್ದರಾಮಯ್ಯ  ಸರ್ಕಾರ ಕೊರೊನಾ ಪರಿಸ್ಥಿತಿಯನ್ನು ಸರಿಯಾಗಿ ನಿಭಾಯಿಸಿಲ್ಲ ಎಂದು ಕಿಡಿಕಾರಿದ್ದಾರೆ.

ಸಿದ್ದರಾಮಯ್ಯ ಪತ್ರದ ಹಿನ್ನೆಲೆಯಲ್ಲಿ ಎಲ್ಲಾ ಇಲಾಖೆಗಳಿಂದ ಮಾಹಿತಿ ಕೇಳಿರುವ  ಸರ್ಕಾರದ ಮುಖ್ಯ ಕಾರ್ಯದರ್ಶಿ ವಿಜಯಭಾಸ್ಕರ್ ಅದನ್ನು ಸಿಎಂಗೆ ಹಸ್ತಾಂತರ ಮಾಡಲಿದ್ದಾರೆ.  ಎಲ್ಲಾ ಇಲಾಖೆಗಳ ಆಯುಕ್ತರು, ಪ್ರಧಾನ ಕಾರ್ಯದರ್ಶಿಗಳು ಮತ್ತು ಕಾರ್ಯದರ್ಶಿಗಳಿಗೆ ಪತ್ರ ರವಾನೆಯಾಗಿದ್ದು, ಎಲ್ಲಿ ಎಷ್ಟೆಷ್ಟು ಖರ್ಚಾಗಿದೆ ಅನ್ನುವ ಮಾಹಿತಿ ಕೇಳಿದ್ದಾರೆ ಎಂದು ಹೇಳಲಾಗುತ್ತಿದೆ.  ಗುರುವಾರ ಸಂಜೆಯೊಳಗೆ ಕೊರೊನಾ ಖರ್ಚು ವೆಚ್ಚದ ಮಾಹಿತಿ ನೀಡುವಂತೆ ವಿಜಯಭಾಸ್ಕರ್ ಸೂಚಿಸಿದ್ದಾರೆ.