ಡೋಂಟ್​ ವರಿ, ಬಿ ಹ್ಯಾಪಿ..! ಯಡಿಯೂರಪ್ಪ ಪ್ಲಾನ್​​ ಬಿಗೆ ಅಮಿತ್ ಶಾ ಗ್ರೀನ್​ ಸಿಗ್ನಲ್​..!

ನವದೆಹಲಿ : ಉಪಚುನಾವಣೆ ಘೋಷಣೆಯಾದ ಬೆನ್ನಲ್ಲೇ ರಾಜಕೀಯ ಚಟುವಟಿಕೆ ಮತ್ತಷ್ಟು ಹೆಚ್ಚಾಗಿದೆ. ದೆಹಲಿಗೆ ಹೋಗಿರೋ ಸಿಎಂ ಯಡಿಯೂರಪ್ಪ, ಅಮಿತ್ ಶಾ ಭೇಟಿಯಾಗಿ ಅನರ್ಹ ಶಾಸಕರ ಭವಿಷ್ಯದ ಬಗ್ಗೆ ಚರ್ಚೆ ನಡೆಸಿದ್ದಾರೆ. ಈ ಕುರಿತು ಅಮಿತ್ ಶಾ, ಸಿಎಂ ಯಡಿಯೂರಪ್ಪಗೆ ಅಭಯ ನೀಡಿದ್ದಾರೆ. ಡೋಂಟ್​​ವರಿ, ನೀವು ಆರಾಮಾಗಿರಿ.. ಬಿ ಹ್ಯಾಪಿ, ಎಲ್ಲವೂ ಸರಿಯಾಗುತ್ತೆ ಎಂದು ಅಮಿತ್ ಶಾ, ಸಿಎಂ ಯಡಿಯೂರಪ್ಪಗೆ ಭರವಸೆ ನೀಡಿದ್ದಾರೆ.

ಒಂದು ವೇಳೆ ಅನರ್ಹ ಶಾಸಕರು ಉಪ ಚುನಾವಣೆಯಲ್ಲಿ ಸ್ಪರ್ಧೆ ಮಾಡಲು ಆಗದೇ ಇದ್ದರೂ, ಸಮಸ್ಯೆ ಇಲ್ಲ. ಪ್ಲಾನ್ ಬಿ ರೆಡಿ ಮಾಡಿಕೊಳ್ಳಿ ಎಂದು ಅಮಿತ್​ ಶಾ, ಯಡಿಯೂರಪ್ಪಗೆ ಅಭಯ ನೀಡಿದ್ದಾರೆ. ಅನರ್ಹ ಶಾಸಕರ ಸಂಬಂಧಿಕರಿಗೆ ಟಿಕೆಟ್​ ನೀಡಲು ಅಮಿತ್ ಶಾ ಒಪ್ಪಿಗೆ ನೀಡಿದ್ದಾರೆ ಎನ್ನಲಾಗಿದೆ.

ಈ ನಡುವೆ ನಾಳೆ, ಸುಪ್ರೀಂಕೋರ್ಟ್​​​ನಲ್ಲಿ ಅನರ್ಹ ಶಾಸಕರ ಪ್ರಕರಣ ವಿಚಾರಣೆಗೆ ಬರಲಿದೆ. ಹೇಗಾದರೂ ಮಾಡಿ, ಸುಪ್ರೀಂಕೋರ್ಟ್​ನಲ್ಲಿ ಅನರ್ಹರ ಪರ ತೀರ್ಪು ಬರಬೇಕು. ಹಿರಿಯ ವಕೀಲರನ್ನ ನೇಮಿಸಿ, ವಾದ ಮಂಡಿಸಬೇಕು ಎಂದು ಅನರ್ಹರು ಪಟ್ಟು ಹಿಡಿದಿದ್ದಾರೆ. ಅನರ್ಹರ ಮಾತನ್ನು ಯಡಿಯೂರಪ್ಪ, ಅಮಿತ್ ಶಾಗೆ ವಿವರಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಅನರ್ಹರಿಗೆ ಏನು ಬೇಕೋ, ಅವರನ್ನ ಹೇಗೆ ರಕ್ಷಿಸಬೇಕೋ ಎಲ್ಲವೂ ಮಾಡೋಣ. ಅನರ್ಹ ಶಾಸಕರು ಧೈರ್ಯವಾಗಿ ಇರಲಿ ಎಂದು ಅಮಿತ್ ಶಾ, ಸಿಎಂ ಹಾಗೂ ಡಿಸಿಎಂಗೆ ಅಭಯ ನೀಡಿದ್ದಾರೆ.