ಬಿಜೆಪಿ ಹಿರಿಯ ನಾಯಕ ಸುಷ್ಮಾ ಸ್ವರಾಜ್​ ವಿಧಿವಶ

ನವದೆಹಲಿ : ಬಿಜೆಪಿಯ ಹಿರಿಯ ನಾಯಕ, ಮಾಜಿ ವಿದೇಶಾಂಗ ಸಚಿವ ಸುಷ್ಮಾ ಸ್ವರಾಜ್ ವಿಧಿವಶರಾಗಿದ್ದಾರೆ. ಮಂಗಳವಾರ ರಾತ್ರಿ 11 ಗಂಟೆ ಸುಮಾರಿಗೆ ಸುಷ್ಮಾ ಸ್ವರಾಜ್​ ಮೃತಪಟ್ಟಿದ್ದಾರೆ. ಹೃದಯಾಘಾತಕ್ಕೆ ಒಳಗಾಗಿದ್ದ ಸುಷ್ಮಾ ಸ್ವರಾಜ್​ ಅವರನ್ನ ದೆಹಲಿಯ ಏಮ್ಸ್​ ಆಸ್ಪತ್ರೆಗೆ ದಾಖಲು ಮಾಡಲಾಗಿತ್ತು. ಆದ್ರೆ, ಚಿಕಿತ್ಸೆ ಫಲಕಾರಿಯಾಗದೆ ಸುಷ್ಮಾ ಕೊನೆಯುಸಿರೆಳೆದಿದ್ದಾರೆ.

ಸುಷ್ಮಾ ಸ್ವರಾಜ್ ನಿಧನರಾಗುವ ಮುನ್ನ, 370ನೇ ವಿಧಿಯನ್ನು ಹಿಂತೆಗೆದುಕೊಳ್ಳುವ ಪ್ರಧಾನಿ ಮೋದಿ ನಿರ್ಧಾರವನ್ನ ಅಭಿನಂದಿಸಿ ಸುಷ್ಮಾ ಟ್ವೀಟ್​ ಮಾಡಿದ್ದರು. ಈ ದಿನಕ್ಕಾಗಿ ನಾನು ಕಾಯುತ್ತಿದ್ದೆ. ಧನ್ಯವಾದ ಮೋದಿ ಜೀ ಎಂದು ಸುಷ್ಮಾ ಟ್ವೀಟ್​ ಮಾಡಿದ್ದರು. ಅದೇ ಅವರ ಕೊನೇ ಟ್ವೀಟ್​ ಆಗಿತ್ತು.

ಬಹುಕಾಲದಿಂದಲೂ ಬಿಜೆಪಿಯ ಮುಂಚೂಣಿ ನಾಯಕಿಯಾಗಿದ್ದವರು ಸುಷ್ಮಾ ಸ್ವರಾಜ್​. ಹರಿಯಾಣ ರಾಜ್ಯದಲ್ಲಿ ಸಚಿವೆಯಾಗಿ, ದೆಹಲಿ ಮುಖ್ಯಮಂತ್ರಿಯಾಗಿ, ಕೇಂದ್ರ ಸರ್ಕಾರದಲ್ಲಿ ವಿವಿಧ ಖಾತೆಗಳ ನಿರ್ವಹಿಸಿದ ಸಚಿವೆಯಾಗಿ ಸುಷ್ಮಾ ಖ್ಯಾತಿಗಳಿಸಿದ್ದರು. ಹಲವು ಮೊದಲುಗಳಿಗೆ ಸುಷ್ಮಾ ಶ್ರೀಕಾರವನ್ನ ಬರೆದಿದ್ದರು. ಆದ್ರೆ, ಅನಾರೋಗ್ಯದಿಂದ 2019ರ ಲೋಕಸಭಾ ಚುನಾವಣೆಯಿಂದ ಸುಷ್ಮಾ ದೂರ ಇದ್ದರು.

ಅನಾರೋಗ್ಯದಿಂದ ಬಳಲುತ್ತಿದ್ದ ಸುಷ್ಮಾ, 2019ರಲ್ಲಿ ಚುನಾವಣೆಗೂ ಸ್ಪರ್ಧೆ ಮಾಡಿರಲಿಲ್ಲ. ಇಂದು ಬೆಳಗ್ಗೆ 11 ಗಂಟೆಯಿಂದ ಮಧ್ಯಾಹ್ನ 3 ಗಂಟೆವರೆಗೆ ದೆಹಲಿ ಬಿಜೆಪಿ ಕಚೇರಿಯಲ್ಲಿ ಸುಷ್ಮಾ ಅಂತಿಮ ದರ್ಶನಕ್ಕೆ ಅವಕಾಶ ಕಲ್ಪಿಸಲಾಗಿದೆ. ಬಳಿಕ ಅಂತ್ಯಕ್ರಿಯೆ ನಡೆಯಲಿದೆ..