ಬೃಹತ್ ನಕ್ಷತ್ರ ಕಣ್ಮರೆ! ಬ್ರಹ್ಮಾಂಡವೆಲ್ಲಾ ಹುಡುಕುತ್ತಿರೋ ವಿಜ್ಞಾನಿಗಳು..!

ರೈಸಿಂಗ್ ಕನ್ನಡ :

ವೆಬ್ ಡೆಸ್ಕ್ :

ಒಂದು ದಶಕಕ್ಕೂ ಅಧಿಕ ಸಮಯದಿಂದ ಅಧ್ಯಯನ ಮಾಡುತ್ತಿದ್ದ ಬೃಹತ್ ನಕ್ಷತ್ರವೊಂದು ಏಕಾಏಕಿ ಮಾಯವಾಗಿದೆ. ತನ್ನ ಜೀವಿತಾವಧಿಯ ಕೊನೆಯ ಹಂತದಲ್ಲಿದ್ದ ಬೃಹತ್ ನಕ್ಷತ್ರವೊಂದರ ಚಟುವಟಿಕೆಯನ್ನ ಖಗೋಳ ಶಾಸ್ತ್ರಜ್ಞರು ನಿರಂತರವಾಗಿ ಗಮನಿಸುತ್ತಿದ್ದರು. 2001 ರಿಂದ 2011ರ ಅವಧಿಯಲ್ಲಿ ಭಾರೀ ಪ್ರಕಾಶಮಾನವಾಗಿ ಹೊಳೆಯುತ್ತಿದ್ದ ಈ ನಕ್ಷತ್ರ, 2019ರಲ್ಲಿ ಏಕಾಏಕಿ ಮಾಯವಾಗಿದೆ.

ಐರ್ಲೆಂಡ್‌ ರಾಜಧಾನಿ ಡಬ್ಲಿನ್‌ನಲ್ಲಿರುವ ಟ್ರಿನಿಟಿ ಕಾಲೇಜಿನ ಖಗೋಳಶಾಸ್ತ್ರಜ್ಞ ಆ್ಯಂಡ್ರ್ಯೂ ಆ್ಯಲನ್ ಈ ಕುರಿತು ಮಾತನಾಡಿದ್ದಾರೆ. ಭೂಮಿಯಿಂದ ಸುಮಾರು 75 ಮಿಲಿಯನ್ ಜ್ಯೋತಿರ್ವರ್ಷ ದೂರದಲ್ಲಿರುವ PHL293B ಎಂಬ ಗ್ಯಾಲಕ್ಸಿಯಲ್ಲಿರುವ ನಕ್ಷತ್ರವೊಂದು ಏಕಾಏಕಿ ಮಾಯವಾಗಿದೆ ಎಂದಿದ್ದಾರೆ.

ಸಾಮಾನ್ಯವಾಗಿ ಅಳಿನ ಅಂಚಿನಲ್ಲಿರುವ ನಕ್ಷತ್ರಗಳು, ಸೂಪರ್‌ನೋವಾ ಅಂದ್ರೆ ಮಹಾ ವಿಸ್ಫೋಟದೊಂದಿಗೆ ಬ್ಲ್ಯಾಕ್‌ ಹೋಲ್‌ಗಳಾಗಿ ಪರಿವರ್ತನೆ ಹೊಂದುತ್ತವೆ. ಆಗ ನಕ್ಷತ್ರ ಪ್ರಕಾಶಿಸುವುದಿಲ್ಲ. ಇದರೊಂದಿಗೆ ನಕ್ಷತ್ರ ಅಧಿಕೃತವಾಗಿ ಅವಸಾನಹೊಂದಿದೆ ಎಂದು ಹೇಳಲಾಗುತ್ತೆ.

ಆದರೆ ಒಂದು ದಶಕಕ್ಕೂ ಹೆಚ್ಚುಕಾಲ ಈ ನಕ್ಷತ್ರದ ಅಧ್ಯಯನ ನಡೆಸಿದ್ದ ಖಗೋಳ ವಿಜ್ಞಾನಿಗಳಿಗೆ, ಈ ನಕ್ಷತ್ರ ಸೂಪರ್‌ನೋವಾ ಹಂತವನ್ನು ತಲುಪಿದ ಯಾವುದೇ ಸುಳಿವೂ ಸಿಗದೆ. ಏಕಾಏಕಿ ನಾಪತ್ತೆಯಾಗಿದೆ.

ನಮ್ಮ ಸೂರ್ಯನ ಸುಮಾರು 2.5 ರಿಂದ 3.5 ಮಿಲಯನ್ ಪಟ್ಟು ಹೆಚ್ಚು ಪ್ರಕಾಶಮಾನವಾದ ಈ ನಕ್ಷತ್ರ ಏಕಾಏಕಿ ಮಾಯವಾಗಲು ಕಾರಣ ಏನೆಂಬುದು ಇನ್ನೂ ತಿಳಿದಿಲ್ಲ ಎಂದು ಆ್ಯಂಡ್ರ್ಯೂ ಆ್ಯಲನ್ ಹೇಳಿದ್ದಾರೆ. ಅಲದೇ ಖಗೋಳ ವಿಜ್ಞಾನದಲ್ಲೇ ಇದು ಹೊಸ ಸವಾಲಾಗಿದ್ದು, ಈ ಕುರಿತು ಅಧ್ಯಯನ ನಡೆಸುತ್ತಿರೋದಾಗಿ ತಿಳಿಸಿದ್ದಾರೆ.