ಶ್ರಾವಣದಲ್ಲೂ ಕೊರೊನಾ ಕಾಟ- ದೇವಸ್ಥಾನಗಳಲ್ಲಿ ಪೂಜೆ ರದ್ದು

ರೈಸಿಂಗ್​ ಕನ್ನಡ:

ರಾಯಚೂರು:

ರಾಯಚೂರು ಜಿಲ್ಲೆಯಲ್ಲಿ ಕೊರೊನಾ ಅಟ್ಟಹಾಸ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದ್ದು ಈಗಾಗಲೆ ಲಾಕ್ ಡೌನ್ ಘೋಷಣೆ ಮಾಡಲಾಗಿದೆ. ಇದೀಗ ಶ್ರಾವಣ ಮಾಸದ ಹಿನ್ನೆಲೆ ಜಿಲ್ಲೆಯ ಪ್ರಸಿದ್ಧ ದೇವಾಲಯಗಳಲ್ಲಿ ಪೂಜೆಗಳನ್ನು ರದ್ಧು ಮಾಡಿ ರಾಯಚೂರು ಸಹಾಯಕ ಆಯುಕ್ತರಾದ ಸಂತೋಷ ಕುಮಾರ್ ಆದೇಶ ಹೊರಡಿಸಿದ್ದಾರೆ.

ರಾಯಚೂರು ಜಿಲ್ಲೆಯಲ್ಲಿ ಕೊರೋನಾ ಸೋಂಕಿತರ ಸಂಖ್ಯೆ ಸಾವಿರದ ಗಡಿಗೆ ಹತ್ತಿರವಾಗಿದ್ದು ಇದನ್ನು ತಡೆಗಟ್ಟುವ ನಿಟ್ಟಿನಲ್ಲಿ ಲಾಕ್ ಡೌನ್ ಈಗಾಗಲೆ ಘೋಷಣೆ ಮಾಡಲಾಗಿದೆ. ಇನ್ನೂ ಉತ್ತರ ಕರ್ನಾಟಕದ ಪ್ರಸಿದ್ದ ದೇವಾಲಯಗಳಾದ ದೇವಸುಗೂರಿನ ಶ್ರೀ ಸೂಗುರೇಶ್ವರ, ಕಲ್ಮಲಾ ಕರಿಯಪ್ಪ ತಾತಾ, ಲಿಂಗಸುಗೂರಿನ ಗುಡಗುಂಟಿ ಶ್ರೀ ಅಮರೇಶ್ವರ, ನಿರಮಾನ್ವಿ ಯಲ್ಲಮ್ಮ ದೇವಿ ದೇವಸ್ಥಾನಗಳಲ್ಲಿ ಈಗಾಗಲೆ ಶ್ರಾವಣ ಮಾಸದ ಪೂಜೆ ರದ್ದು ಮಾಡಿ ಆದೇಶ ಹೊರಡಿಸಲಾಗಿದೆ.

ಕೆಲ ಆಲಯಗಳಲ್ಲಿ ನಡೆಯುವ ವಿಶಿಷ್ಟ‌ ಹತ್ತಕ್ಕೂ ಹೆಚ್ಚು ಕಾರ್ಯಕ್ರಮಗಳನ್ನು ರದ್ದುಗೊಳಿಸಲಾಗಿದೆ. ಪುರಾಣ, ಪಳಾರ ನೈವೇದ್ಯ, ಭಕ್ತರಿಂದ ಅಭಿಷೇಕ, ನದಿ ನೀರು, ಗಣಂಗಳ ಪ್ರಸಾದ ಸೇರಿದಂತೆ ಅನೇಕ ಕಾರ್ಯಕ್ರಮಗಳನ್ನು ರದ್ದು ಪಡಿಸಿ ಆದೇಶ ಹೊರಡಿಸಿದ್ದಾರೆ. ಹಾಗಾಗಿ ಭಕ್ತರು ದೇವಸ್ಥಾನಗಳಿಗೆ ತೆರಳದೆ ಮನೆಯಲ್ಲೆ ಇದ್ದು ಪೂಜೆ ಪುರಸ್ಕಾರಗಳನ್ನು ಮಾಡಿಕೊಳ್ಳಬೇಕು ಎಂದು ತಿಳಿಸಿದ್ದಾರೆ.