ಬಿಹಾರದಲ್ಲಿ ಬದಲಾಗಲಿದೆ ರಾಜಕೀಯ ಲೆಕ್ಕಾಚಾರ- ಮಹಾಮೈತ್ರಿಗೆ ಮತ್ತೊಂದು ಹಿನ್ನಡೆ

ರೈಸಿಂಗ್​ ಕನ್ನಡ:

ಕೊರೊನಾ ಮಹಾಮಾರಿ ನಡುವೆ ಬಿಜೆಪಿ ರಾಜಕೀಯ ಲೆಕ್ಕಾಚಾರಗಳನ್ನು ಮಾಡುತ್ತಿದೆ. ಮುಂದಿನ ಡಿಸೆಂಬರ್​​​ನಲ್ಲಿ ನಡೆಯುವ ಬಿಹಾರ ವಿಧಾನಸಭಾ ಚುನಾವಣೆಗೆ ಬಿಜೆಪಿ ಈಗಾಗಲೇ ತಯಾರಿ ಮಾಡಿಕೊಳ್ಳುತ್ತಿದೆ. ಕಾಂಗ್ರೆಸ್​ ಮತ್ತು ಆರ್​ಜೆಡಿ ನೇತೃತ್ವದ ಮಹಾಮೈತ್ರಿಯನ್ನು ಚಿಂದಿಗೊಳಿಸಲು ಪ್ಲಾನ್​ ಮಾಡಿಕೊಂಡಿದೆ. ಬಿಹಾರದಲ್ಲಿ ಜೆಡಿಯು ಮತ್ತು ಬಿಜೆಪಿ ಸರಕಾರ ನಡೆಸುತ್ತಿದೆ. ಮುಂದಿನ ವಿಧಾನ ಸಭಾ ಚುನಾವಣೆ ಹೊತ್ತಿಗೆ ಎನ್​ಡಿಎ ಜೊತೆ ಪ್ರಭಾವಿ ನಾಯಕರು ಸೇರಿಕೊಳ್ಳುವ ಸಾಧ್ಯತೆ ಇದೆ. ಈ ನಡುವೆ ಬಿಹಾರದ ಪ್ರಮುಖ ನಾಯಕ ಮತ್ತು ಮಾಜಿ ಮುಖ್ಯಮಂತ್ರಿ ಜೀತನ್​ ರಾಂ ಮಾಂಜಿ ಎನ್​ ಡಿಎ ಜೊತೆ ಸೇರಿಕೊಳ್ಳುವುದು ಬಹುತೇಕ ಖಚಿತವಾಗಿದೆ.

ಹಿಂದೂಸ್ತಾನಿ ಅವಾಮಿ ಮೋರ್ಚಾ (HAM) ಸಂಸ್ಥಾಪಕ ಜೀತನ್​ ರಾಂ  ಬಿಜೆಪಿ ಜೊತೆ ಕೈ ಜೋಡಿಸಿದರೆ ಬಿಹಾರದ ರಾಜಕೀಯ ಸಮೀಕರಣಗಳು ಬದಲಾಗಲಿದೆ.  ಜೀತನ್​ ರಾಂ ಈ ಸಂಬಂಧ ಜುಲೈ 10ರಂದು ಅಧಿಕೃತ ಘೋಷಣೆ ಮಾಡಲಿದ್ದಾರೆ.

2019ರ ಲೋಕಸಭೆ ಚುನಾವಣೆಯಲ್ಲಿ ಮಹಾ ಮೈತ್ರಿಕೂಟದೊಂದಿಗೆ ಜೀತನ್​ ರಾಂ ಮಾಂಝಿ ಕೈ ಜೋಡಿಸಿದ್ದರು.  ಆದರೆ ಎನ್​ಡಿಎ ಬಿರುಗಾಳಿ ಎದುರು ಮಹಾಮೈತ್ರಿ ಕೂಟ ನಡುಗಿ ಹೋಗಿತ್ತು. ಇದರ ನಡುವೆ ಮಹಾಮೈತ್ರಿ ಕೂಟಕ್ಕೆ ಜೀತನ್​ ರಾಂ ಮಾಂಝಿ ಕಳೆದ ಜೂನ್​ 25ರ ಒಳಗೆ ಸೀಟು ಹಂಚಿಕೆ ಬಗ್ಗೆ ಸಮನ್ವಯ ಸಮಿತಿ ರಚನೆ ಆಗಬೇಕು ಎಂದು ಷರತ್ತು ವಿಧಿಸಿದ್ದರು. ಆದರೆ ಮಹಾಮೈತ್ರಿ ಕೂಟ ಈ ಬಗ್ಗೆ ತಲೆ ಕೆಡಿಸಿಕೊಂಡಿಲ್ಲ.  ಈ ಎಲ್ಲಾ ಬೆಳವಣಿಗೆಗಳ ಮಧ್ಯೆ ಜೀತನ್​ ರಾಂ  ಮಾಂಝಿ ಬಿಜೆಪಿ ಬಗ್ಗೆ ಒಲವು ತೋರುತ್ತಿದ್ದಾರೆ.

243 ಸ್ಥಾನಗಳಿರುವ ಬಿಹಾರ ವಿಧಾನಸಭೆಯಲ್ಲಿ ಸದ್ಯ ಜೆಡಿಯು 80 ಹಾಗೂ ಬಿಜೆಪಿ 54 ಸ್ಥಾನಗಳೊಂದಿಗೆ ಅಧಿಕಾರ ನಡೆಸುತ್ತಿದೆ.  2 ಸ್ಥಾನ ಹೊಂದಿರುವ ಎಲ್​​ಜೆಪಿ ಮತ್ತು 5 ಪಕ್ಷೇತರರು ಕೂಡ ಎನ್​ಡಿಎ ಸರಕಾರದ ಭಾಗವಾಗಿದ್ದಾರೆ. ಸದ್ಯ ವಿರೋಧ ಪಕ್ಷದ ಸ್ಥಾನದಲ್ಲಿರುವ ಜೀತನ್​ ರಾಂ ಮಾಂಝಿಯ ಹಿಂದೂಸ್ತಾನಿ ಅವಾಮಿ ಮೋರ್ಚ ಕಳೆದ ಬಿಹಾರ ವಿಧಾನಸಭಾ ಚುನಾವಣೆಯಲ್ಲಿ  ಕೇವಲ ಒಂದು ಸ್ಥಾನ ಮಾತ್ರ ಗೆದ್ದುಕೊಂಡಿತ್ತು.