RRR ಸಿನಿಮಾ 2021ರ ಜನವರಿ 8ಕ್ಕೆ ಬಿಡುಗಡೆ : KGF ಜೊತೆ ಕ್ಲಾಷ್​ ಆಗುತ್ತಾ..?

ಬೆಂಗಳೂರು :

ಇಡೀ ಭಾರತೀಯ ಸಿನಿಮಾ ರಂಗವೇ ಎದುರು ನೋಡ್ತಿರೋ ಮೆಗಾ ಮೂವಿ ಬಿಡುಗಡೆಗೆ ದಿನಾಂಕ ಫಿಕ್ಸ್​ ಆಗಿದೆ. ಬಾಹುಬಲಿ ನಿರ್ದೇಶಕ ಎಸ್​​ ಎಸ್​ ರಾಜಮೌಳಿ ನಿರ್ದೇಶನದ ಬಹು ನಿರೀಕ್ಷಿತ ಸಿನಿಮಾ ಆರ್​ಆರ್​ಆರ್​, ಮುಂದಿನ ವರ್ಷ ಜನವರಿ 8ರಂದು ಬಿಡುಗಡೆ ಆಗಲಿದೆ. ಇನ್ನೂ ಒಂದು ವರ್ಷ ಇರುವಾಗಲೇ, ಬಿಡುಗಡೆ ದಿನಾಂಕವನ್ನ ಘೋಷಣೆ ಮಾಡಿದೆ ಆರ್​ಆರ್​ಆರ್​ ಸಿನಿಮಾ ತಂಡ. ಮೆಗಾ ಪವರ್ ಸ್ಟಾರ್​ ರಾಮ್​ ಚರಣ್​, ಜ್ಯೂನಿಯರ್​ ಎನ್​ಟಿಆರ್ ಹಾಗೂ ಬಾಲಿವುಡ್​ ಸೂಪರ್ ಸ್ಟಾರ್​ ಅಜಯ್​ ದೇವಗಾನ್​ ಈ ಸಿನಿಮಾದಲ್ಲಿ ನಟಿಸ್ತಿದ್ದಾರೆ. ಈ ಮೂಲಕ ಆರ್​ಆರ್​ಆರ್​ ಸಿನಿಮಾ ಬಿಡುಗಡೆ ಯಾವಾಗ ಅನ್ಕೊಂಡಿದ್ದ ಕೋಟ್ಯಂತರ ಅಭಿಮಾನಿಗಳ ಕಾತರಕ್ಕೆ ಉತ್ತರ ಸಿಕ್ಕಿದೆ. ಈ ಮುಂಚೆ 2020 ಜುಲೈ 30ರಂದು ಸಿನಿಮಾ ಬಿಡುಗಡೆ ಮಾಡಲು ನಿರ್ಧರಿಸಲಾಗಿತ್ತು.

ಆರ್​ಆರ್​ ಆರ್ ಸಿನಿಮಾ ತಡವಾಗಿ ಬಿಡುಗಡೆ ಆಗ್ತಿರೋದಕ್ಕೆ ಸಿನಿಮಾ ತಂಡ ಸ್ಪಷ್ಟನೆ ನೀಡಿದೆ. ನೀವು ನಮ್ಮ ಮೇಲೆ ತೋರಿಸ್ತಿರೋ ಪ್ರೀತಿ, ಅಭಿಮಾನಕ್ಕೆ ಧನ್ಯವಾದ. ನಿಮ್ಮ ಪ್ರೀತಿ, ಅಭಿಮಾನದಿಂದಾಗಿಯೇ ನಾವು ಸೆಟ್​ನಲ್ಲಿ ಎಷ್ಟೇ ಕಷ್ಟ ಪಟ್ಟರು, ಅದನ್ನ ಮರೆತು ಹೋಗ್ತಿದ್ದೇವೆ. ಇದುವರೆಗೆ ಯಾವ ಸಿನಿಮಾದಲ್ಲೂ ತೋರಿಸದ ದೃಶ್ಯಕಾವ್ಯವನ್ನ ನೀವು ಆರ್​ಆರ್​ಆರ್ ಸಿನಿಮಾದಲ್ಲಿ ನೋಡ್ತೀರಿ. ಇದಕ್ಕಾಗಿಯೇ ನಾವು ಹಗಲು, ರಾತ್ರಿ ಶ್ರಮ ಪಡ್ತಿದ್ದೇವೆ. ವಿಶ್ವಾದ್ಯಂತ ಸಿನಿಮಾವನ್ನ ದೊಡ್ಡ ಪ್ರಮಾಣದಲ್ಲಿ ಬಿಡುಗಡೆ ಮಾಡಬೇಕು. ಹೀಗಾಗಿಯೇ ಸಿನಿಮಾ ಕ್ವಾಲಿಟಿ ಚೆನ್ನಾಗಿರಬೇಕು. ಹೆಚ್ಚಿನ ಸಮಯ ತೆಗೆದುಕೊಂಡು ಮತ್ತಷ್ಟು ಅದ್ಭುತವಾದ ಸಿನಿಮಾವನ್ನ ನಿಮ್ಮ ಮುಂದೆ ತರುತ್ತೇವೆ. ಸಂಕ್ರಾಂತಿ ಹಬ್ಬಕ್ಕೆ 2021ರ ಜನವರಿ 8ರಂದು ಸಿನಿಮಾ ಬಿಡುಗಡೆ ಮಾಡ್ತೀವಿ ಎಂದು ಆರ್​ಆರ್​ಆರ್ ಸಿನಿಮಾ ತಂಡ ಹೇಳಿದೆ.

ಆರ್​ಆರ್​ಆರ್ ಸಿನಿಮಾದಲ್ಲಿ ವಿದೇಶಿ ನಟಿ ಲಿವಿಯಾ ಮಾರಿಸ್​​ ಎನ್​ಟಿಆರ್​ಗೆ ಜೋಡಿಯಾಗಿದ್ರೆ, ರಾಮ್​ಚರಣ್​ಗೆ ಆಲಿಯಾ ಭಟ್​ ಜೋಡಿ. ವಿಶೇಷ ಹಾಗೂ ವಿಭಿನ್ನ ಪಾತ್ರದಲ್ಲಿ ಬಾಲಿವುಡ್​ ನಟ ಅಜಯ್​ ದೇವಗಾನ್​ ನಟಿಸ್ತಿದ್ದಾರೆ. ಅಜಯ್​ ದೇವಗಾನ್​ಗೆ ಜೋಡಿ ಯಾರು ಅನ್ನೋದು ಇನ್ನೂ ಕನ್ಫರ್ಮ್​ ಆಗಿಲ್ಲ. ಇಷ್ಟೇ ಅಲ್ಲದೆ, ಸದ್ಯಕ್ಕೆ ಸಿನಿಮಾಗೆ ವರ್ಕಿಂಗ್ ಟೈಟಲ್​ ಮಾತ್ರ ಇಡಲಾಗಿದೆ. ಇನ್ನೂ, ಸಿನಿಮಾಗೆ ಪೂರ್ತಿ ಹೆಸರು ಕೂಡ ಇಟ್ಟಿಲ್ಲ. ಈಗಾಗಲೇ ಅಭಿಮಾನಿಗಳ ಹಲವು ರೀತಿಯ ಟೈಟಲ್​ಗಳನ್ನ ಸಿನಿಮಾ ತಂಡಕ್ಕೆ ಸಲಹೆ ನೀಡಿದ್ದಾರೆ. ಯಾವುದನ್ನ ಫೈನಲ್ ಮಾಡ್ತಾರೆ ಅನ್ನೋದು ಕಾದುನೋಡಬೇಕಿದೆ.

ಇನ್ನು, ಈ ಸಿನಿಮಾ ಸ್ವಾತಂತ್ರ್ಯ ಪೂರ್ವದಲ್ಲಿ ನಡೆಯುವ ಕಥೆ. ಸ್ವಾತಂತ್ರ್ಯ ಹೋರಾಟಗಾರರ ಕಥೆ. ಅಲ್ಲೂರಿ ಸೀತಾರಾಮರಾಜು ಹಾಗೂ ಕೊಮರಂಭೀಮ್​ ಅವರ ರೋಚಕ ಕಥೆ ಇದರಲ್ಲಿ ಇರಲಿದೆ. ಬ್ರೀಟಿಷರ ವಿರುದ್ಧ ಹೋರಾಟ ಮಾಡಿದ ವೀರರ ಕಥೆ ಇದಾಗಿದೆ. ಇದಕ್ಕೆ ಕೊಂಚ ಮಸಾಲೆ ಸೇರಿಸಿ, ಸೀತಾರಾಮರಾಜು ಹಾಗೂ ಕೋಮರಂಭೀಮ್​ ಒಂದಾದ್ರೆ, ಹೇಗಿರುತ್ತೆ..? ಅವರಿಬ್ಬರ ನಡುವೆ ಫೈಟ್​ ನಡೆದಿತ್ತಾ..? ಈ ರೀತಿಯಾ ಕುತೂಲಕಾರಿ ಅಂಶಗಳು ಸಿನಿಮಾದಲ್ಲಿ ಇರುತ್ತೆ. ನಿರ್ದೇಶಕ ರಾಜಮೌಳಿ ಈ ವಿಚಾರವನ್ನ ಈಗಾಗಲೇ ಹೇಳಿದ್ದಾರೆ.

ಒಟ್ಟಿನಲ್ಲಿ ಆರ್​ಆರ್​ಆರ್​ ಸಿನಿಮಾ ಮುಂದಿನ ವರ್ಷ ತೆರೆ ಕಾಣಲಿದ್ದು, ಈಗಾಗಲೇ ಪ್ರೇಕ್ಷಕರ ನಿರೀಕ್ಷೆಯನ್ನ ಹೆಚ್ಚಿಸಿದೆ. ಆರ್​ಆರ್ಆರ್​ ಸಿನಿಮಾ ಕನ್ನಡದಲ್ಲೂ ಬಿಡುಗಡೆ ಆಗ್ತಿರೋದು ವಿಶೇಷ.