Featured
ಲೇಡಿ ಎಸ್ಐ ಮೇಲೆ ಎಎಸ್ಐ ಹಲ್ಲೆ : ಮಂಡ್ಯದಲ್ಲಿ ಪೊಲೀಸರ ಕಿತ್ತಾಟ
ಮಂಡ್ಯ : ಜನರಿಗೆ ರಕ್ಷಣೆ ನೀಡಬೇಕಾದ ಪೊಲೀಸರೇ ಕಿತ್ತಾಡಿರೋ ಸ್ಟೋರಿ ಇದು. ರಾತ್ರಿ ಗಸ್ತು ವಿಚಾರದಲ್ಲಿ ಮಹಿಳಾ ಎಸ್ಐ ಮೇಲೆಯೇ ಎಎಸ್ಐ ಹಲ್ಲೆ ನಡೆಸಿದ್ದಾರೆ. ಮಂಡ್ಯ ತಾಲೂಕು ಬಸರಾಳು ಪೊಲೀಸ್ ಠಾಣೆಯಲ್ಲಿ ಈ ಘಟನೆ ವರದಿಯಾಗಿದೆ. ಮಹಿಳಾ ಎಸ್ಐ ಜಯಗೌರಿ ಎಂಬುವವರ ಮೇಲೆ ಎಎಸ್ಐ ಶಿವನಂಜೇಗೌಡ ಎಂಬುವವರಿಂದ ಹಲ್ಲೆಯಾಗಿದೆ. ಈ ಸಂಬಂಧ ಎಎಸ್ಐ ವಿರುದ್ಧ ಎಫ್ಐಆರ್ ಕೂಡ ದಾಖಲಾಗಿದೆ.
ಇಷ್ಟಕ್ಕೂ ಆಗಿದ್ದು ಇಷ್ಟು..!
ಅವತ್ತು ನವೆಂಬರ್ 9. ಬಸರಾಳು ಠಾಣೆಯಲ್ಲಿ ಎಎಸ್ಐ ಶಿವನಂಜೇಗೌಡ ಕರ್ತವ್ಯದಲ್ಲಿದ್ರು. ಅವತ್ತೇ ಸಂಜೆ 4 ಗಂಟೆಗೆ ಸಿಎಂ ಯಡಿಯೂರಪ್ಪ ಬಂದೋಬಸ್ತ್ ಕರ್ತವ್ಯ ಮುಗಿಸಿ ಎಸ್ಐ ಜಯಗೌರಿ ಠಾಣೆಗೆ ಬಂದ್ರು. ಈ ವೇಳೆ, ರಾತ್ರಿ ಗಸ್ತು ಕರ್ತವ್ಯಕ್ಕೆ ಸಿಬ್ಬಂದಿ ನಿಯೋಜನೆ ಮಾಡುವ ವಿಚಾರವಾಗಿ ಇಬ್ಬರ ನಡುವೆ ಮಾತುಕತೆ ನಡೆದಿದೆ. ಸಿಬ್ಬಂದಿ ಇಲ್ಲವೆಂದು ಎಎಸ್ಐ ಶಿವನಂಜೇಗೌಡ ಹೇಳಿದ್ದಾರೆ.
ಆಗ ನೀವು ಮನೆಗೆ ಹೋಗಿ ವಿಶ್ರಾಂತಿ ಪಡೆಯಿರಿ. ರಾತ್ರಿ ಗಸ್ತಿಗೆ ಬನ್ನಿ ಎಂದು ಎಎಸ್ಐ ಶಿವನಂಜೇಗೌಡರಿಗೆ ಎಸ್ಐ ಜಯಗೌರಿ ಸೂಚನೆ ನೀಡಿದ್ದಾರೆ. ಆದ್ರೆ, ಬೆಳಗ್ಗೆಯಿಂದ ಕರ್ತವ್ಯ ನಿರ್ವಹಿಸಿದ್ದೀನಿ. ರಾತ್ರಿ ಗಸ್ತಿಗೆ ನಾನ್ಯಾಕೆ ಹೋಗಲಿ ಎಂದು ಎಎಸ್ಐ ಜಗಳಕ್ಕೆ ನಿಂತಿದ್ದಾರೆ. ಪರಿಸ್ಥಿತಿ ವಿಕೋಪಕ್ಕೆ ತಿರುಗಿ, ಬರಹಗಾರರ ಕೊಠಡಿಯಲ್ಲಿ ಮಹಿಳಾ ಎಸ್ಐ ಮೇಲೆ ಹಲ್ಲೆ ನಡೆಸಿದ್ದಾರೆ. ಕತ್ತಿನ ಪಟ್ಟಿ ಹಿಡಿದು, ಎಳೆದಾಡಿ ಹಲ್ಲೆ ಮಾಡಿ ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದಾರೆಂದು ಎಎಸ್ಐ ಶಿವನಂಜೇಗೌಡ ಮೇಲೆ ಎಫ್ಐಆರ್ ದಾಖಲು ಮಾಡಲಾಗಿದೆ.
