ಹಿಂದೂಗಳಿಗೆ ಅಯೋಧ್ಯೆ ರಾಮ ಜನ್ಮಭೂಮಿ : ಸುಪ್ರೀಂಕೋರ್ಟ್​​ ಐತಿಹಾಸಿಕ ತೀರ್ಪು

ನವದೆಹಲಿ : ನೂರಾರು ವರ್ಷಗಳ ವಿವಾದ ಕೊನೆಗೂ ಬಗೆಹರಿದಿದ್ದು, ವಿವಾದಿತ ಅಯೋಧ್ಯೆ ಭೂಮಿ ಹಿಂದೂಗಳಿಗೆ ಸೇರಿದ್ದು ಎಂದು ಸುಪ್ರೀಂಕೋರ್ಟ್​ ಐತಿಹಾಸಿಕ ತೀರ್ಪು ನೀಡಿದೆ. ಬೆಳಗ್ಗೆ 10.30ಕ್ಕೆ ಶುರುವಾದ ತೀರ್ಪು ಓದುವ ಪ್ರಕ್ರಿಯೆ, 30 ನಿಮಿಷಗಳಲ್ಲಿ ಮುಕ್ತಾಯವಾಯ್ತು. ಸುಪ್ರೀಂಕೋರ್ಟ್​ ಮುಖ್ಯನಾಯಮೂರ್ತಿ ರಂಜನ್ ಗೊಗಾಯ್​ ನೇತೃತ್ವದ ಐವರು ನ್ಯಾಯಮೂರ್ತಿಗಳ ಪೀಠ, ಸರ್ವಾನುಮತದಿಂದ ತೀರ್ಪು ನೀಡ್ತು.

ಮೊದಲಿಗೆ ಶಿಯಾ ಅರ್ಜಿಯನ್ನ ವಜಾ ಮಾಡಿದ ನ್ಯಾಯಪೀಠ, ನಿರ್ಮೋಹಿ ಅಖಾರ ಸಲ್ಲಿಸಿದ್ದ ಅರ್ಜಿಯನ್ನೂ ವಜಾ ಮಾಡ್ತು. ಅಲ್ಲದೆ, ಈ ಹಿಂದೆ ಅಲಹಾಬಾದ್ ಹೈಕೋರ್ಟ್​ ನೀಡಿದ್ದ ತೀರ್ಪು ಒಪ್ಪಲು ಆಗುವುದಿಲ್ಲ ಎಂದು ಸುಪ್ರೀಂಕೋರ್ಟ್​ ಹೇಳ್ತು. ಪುರಾತತ್ವ ಇಲಾಖೆ ಸಾಕ್ಷಿಗಳನ್ನು ಆಧರಿಸಿ, ಅದು ಹಿಂದೂಗಳಿಗೆ ಸೇರಿದ್ದ ಭೂಮಿ ಎಂದು ಸುಪ್ರೀಂಕೋರ್ಟ್​ ಅಭಿಪ್ರಾಯ ಪಡ್ತು.

ಅದರಂತೆ 2.77 ಎಕರೆ ಭೂಮಿ ಹಿಂದೂಗಳಿಗೆ ಅಂದ್ರೆ ರಾಮಲಲ್ಲಾಗೆ ಸೇರಿದ್ದು ಎಂದು ಸುಪ್ರೀಂಕೋರ್ಟ್​​ ಐತಿಹಾಸಿಕ ತೀರ್ಪು ನೀಡ್ತು. ಅಲ್ಲದೆ, ಸುನ್ನಿ ವಕ್ಫ್​ ಬೋರ್ಡ್​​ಗೆ ಅಯೋಧ್ಯೆಯಲ್ಲೇ ಪ್ರತ್ಯೇಕ 5 ಎಕರೆ ಭೂಮಿ ನೀಡುವಂತೆ ಸುಪ್ರೀಂಕೋರ್ಟ್​ ಆದೇಶ ನೀಡ್ತು. 2.77 ಎಕರೆ ವಿವಾದಿತ ಭೂಮಿಯಲ್ಲಿ ರಾಮ ಮಂದಿರ ನಿರ್ಮಾಣದ ಹೊಣೆ ಕೇಂದ್ರ ಸರ್ಕಾರ ವಹಿಸಿಕೊಳ್ಳುವಂತೆ ಸುಪ್ರೀಂ ಆದೇಶ ನೀಡ್ತು. ಇದರ ಜೊತೆಗೆ 3 ತಿಂಗಳಲ್ಲಿ ಮಂದಿರ ನಿರ್ಮಾಣ ಸಮಿತಿ ರಚನೆ ಮಾಡಿ, ಮುಂದಿನ ಕಾರ್ಯಗಳು, ಯೋಚನೆಗಳ ಕುರಿತ ಸಮಗ್ರ ವರದಿ ತಯಾರಿಸುವಂತೆ ಸುಪ್ರೀಂಕೋರ್ಟ್​ ಮಹತ್ವದ ಆದೇಶ ನೀಡ್ತು.

ಈ ಮೂಲಕ ಕಳೆದ 495 ವರ್ಷಗಳ ಈ ವಿವಾದ ಕೊನೆಗೂ ಇತ್ಯರ್ಥವಾಗಿದೆ. ರಾಮ ಮಂದಿರ ಕಟ್ಟುವ ವನವಾಸ ಅಂತ್ಯವಾಗಿದೆ. ರಾಮ ಜನ್ಮ ಭೂಮಿ ಅಯೋಧ್ಯೆಯಲ್ಲೇ ರಾಮ ಮಂದಿರ ನಿರ್ಮಾಣ ಆಗಲಿದ್ದು, ರಾಮನ ವನವಾಸವೂ ಅಯೋಧ್ಯೆಯಲ್ಲಿ ಅಂತ್ಯವಾಗಲಿದೆ.