ಮಣ್ಣಿನ ಗಣಪನ ವಿಸರ್ಜಿಸಲು ಹೋದ ಮಕ್ಕಳು, ಕೆರೆಯಲ್ಲಿ ನೀರು ಪಾಲು, ಕಣ್ಣೀರ ಕಡಲಲ್ಲಿ ಊರು.. ಛೇ..ಪಾಪ..!

ಕೋಲಾರ: ಕೆಜಿಎಫ್‌ ಹೊರವಲಯದ ಮರದಘಟ್ಟ ಗ್ರಾಮದಲ್ಲಿ ಊರ ಹೊರಗಿನ ಕೃತಕ ಕೆರೆಗೆ ಮಣ್ಣಿನ ಆಟಿಕೆ ಗಣಪನನ್ನ ತೆಗೆದುಕೊಂಡು ಹೋದ ಆರು ಮಕ್ಕಳು ನೀರುಪಾಲಾದ ಘಟನೆ ನಡೆದಿದೆ. ಇಡೀ ಊರೇ ಈಗ ಕಣ್ಣೀರ ಕಡಲಲ್ಲಿ ಮುಳುಗಿದೆ. ನಾಳೆ ಕಂದಮ್ಮಗಳನ್ನ ಸಂಸ್ಕಾರ ಮಾಡುವುದಾಗಿ ಊರ ಗ್ರಾಮಸ್ಥರು ಹೇಳಿದ್ದಾರೆ.

ತೇಜಸ್ವಿ, ವೈಷ್ಣವಿ, ವೀಣಾ, ರಕ್ಷಿತಾ, ಧನುಷ್‌, ರೋಹಿತ್‌, ಎಲ್ಲಾ ಮಕ್ಕಳೂ ಏಳರಿಂದ ಒಂಭತ್ತು ವರ್ಷದೊಳಗಿನವರು, ಮಧ್ಯಾಹ್ನ ಮಣ್ಣಿನ ಗಣೇಶನನ್ನ ಮಾಡಿ ಆಡುತ್ತಿದ್ದರು, ನಂತರ ಅದನ್ನ ವಿಸರ್ಜನೆ ಮಾಡಲು ಊರ ಹೊರಗಿನ ಕೃತಕ ಕೆರೆಗೆ ಹೋಗಿದ್ದಾರೆ. ಅಲ್ಲಿ ಕಾಲು ಜಾರಿ ಎಲ್ಲರೂ ನೀರುಪಾಲಾಗಿದ್ದು ಮಕ್ಕಳ ಶವವನ್ನ ಹೊರತೆಗೆಯಲಾಗಿದೆ.

ಅಕ್ರಮ ಕಲ್ಲುಕ್ವಾರಿಯ ಕೊಳ ಎನ್ನಲಾಗಿದ್ದು ಸ್ಥಳಕ್ಕೆ ಜಿಲ್ಲಾಧಿಕಾರಿ ಮಂಜುನಾಥ್‌,ಎಸ್‌ಪಿ ಮೊಹಮ್ಮದ್‌ ಭೇಟಿ ನೀಡಿದ್ದಾರೆ. ಘಟನೆ ಕುರಿತು ಸಂತಾಪ ವ್ಯಕ್ತಪಡಿಸಿರುವ ಸಿಎಂ ಯಡಿಯೂರಪ್ಪ ಮೃತ ಮಕ್ಕಳ ಕುಟುಂಬಕ್ಕೆ ತಲಾ ಎರಡು ಲಕ್ಷ ರೂಪಾಯಿ ಪರಿಹಾರ ನೀಡಲು ಜಿಲ್ಲಾಧಿಕಾರಿಗೆ ಆದೇಶಿಸಿದ್ದಾರೆ.