ಸಿದ್ದು ವಿರುದ್ಧ ಯಡಿಯೂರಪ್ಪ ದ್ವೇಷ ರಾಜಕೀಯ.? : ತನಿಖೆಗಳ ಅಸಲಿಯತ್ತೇನು..?

ಬೆಂಗಳೂರು : ನಾನು ದ್ವೇಷ ರಾಜಕೀಯ ಮಾಡಲ್ಲ. ಎಲ್ಲರನ್ನು ಗಣನೆಗೆ ತೆಗೆದುಕೊಂಡು ಕೆಲಸ ಮಾಡ್ತೇನೆ ಎಂದು ಹೇಳಿದ್ದ ಸಿಎಂ ಯಡಿಯೂರಪ್ಪ ಮಾತು ತಪ್ಪಿದಂತೆ ಕಾಣ್ತಿದೆ. ಮಾಜಿ ಸಿಎಂ ಸಿದ್ದು ವಿರುದ್ಧ ದ್ವೇಷ ಸಾದಿಸ್ತಿದ್ದಾರಾ ಸಿಎಂ ಬಿಎಸ್ ವೈ ಅನ್ನೋ ಅನುಮಾನ ಹಾಗೂ ಚರ್ಚೆ ಶುರುವಾಗಿದೆ. ಇದಕ್ಕೆ ಕಾರಣ, ತನಿಖೆ ಹೆಸರಲ್ಲಿ ಸಿದ್ದು ಸರ್ಕಾರದ ಒಂದೊಂದೇ ಯೋಜನೆ ಯಡಿಯೂರಪ್ಪ ಕೈಬಿಡ್ತಿದ್ದಾರೆ.

ಈಗಾಗ್ಲೆ, ಅನ್ನಭಾಗ್ಯ, ಇಂದಿರಾ ಕ್ಯಾಂಟೀನ್ ಪರಿಸ್ಥಿತಿ ಡೋಲಾಯಮಾನವಾಗಿದೆ. ಈಗ ಸಿದ್ದು ಸರ್ಕಾರದ ಕೃಷಿ ಭಾಗ್ಯ ಯೋಜನೆಗೂ ಕಲ್ಲು ಬೀಳುವ ಸಾಧ್ಯತೆ ಇದೆ. ಯಾಕಂದ್ರೆ, ಕೃಷಿಹೊಂಡ, ಪಂಪ್ ಸೆಟ್ ಖರೀದಿ ಯೋಜನೆಯ ತನಿಖೆಗೆ ಸಿಎಂ ಆದೇಶಿಸಿದ್ದು, ಎರಡು ತಿಂಗಳೊಳಗೆ ವರದಿ ನೀಡುವಂತೆ ಸೂಚನೆ ನೀಡಲಾಗಿದೆ. ಜಿಲ್ಲಾ ಕೃಷಿ ನಿರ್ದೇಶಕರಿಗೆ ಸಿಎಂ ಆದೇಶ ನೀಡಿದ್ದಾರೆ.

ಕೃಷಿ ಹೊಂಡ ನಿರ್ಮಾಣಕ್ಕೆ 921 ಕೋಟಿ ವೆಚ್ಚ ಮಾಡಲಾಗಿದೆ. ಹಣ ವೆಚ್ಚವಾಗಿದೆ ಆದ್ರೆ, ಕೃಷಿ ಹೊಂಡ ನಿರ್ಮಾಣವಾಗಿಲ್ಲ ಅನ್ನೋ ಆರೋಪದ ಮೇಲೆ ತನಿಖೆಗೆ ಸಿಎಂ ಆದೇಶಿಸಿದ್ದಾರೆ. ತನಿಖೆ ಹೆಸರಿನಲ್ಲಿ ಯೋಜನೆಯನ್ನೇ ಕೈಬಿಡ್ತಾರಾ ಅನ್ನೋ ಅನುಮಾನ ಕಾಡ್ತಿದೆ. ಮತ್ತೊಂದು ಕಡೆ ತ್ಯಾಜ್ಯ ವಿಲೇವಾರಿ ಘಟಕಗಳ ತನಿಖೆಗೆ ಸೂಚನೆ ನೀಡಲಾಗಿದೆ. ಬೆಂಗಳೂರಿನಲ್ಲಿ ನೂರಾರು ಕೋಟಿ ವೆಚ್ಚ ಮಾಡಲಾಗಿದೆ. ಆದರೆ ಅಕ್ರಮ ನಡೆದಿದೆ ಎಂಬ ಆರೋಪ ಹಿನ್ನೆಲೆಯಲ್ಲಿ, ಇದರ ಬಗ್ಗೆಯೂ ತನಿಖೆಗೆ ಸಿಎಂ ಸೂಚಿಸಿದ್ದಾರೆ.

ಸಿದ್ದರಾಮಯ್ಯ ಸಿಎಂ ಆಗಿದ್ದಾಗ ಜಾರಿಗೆ ಬಂದ ಒಂದೊಂದೇ ಯೋಜನೆಗಳನ್ನ ತನಿಖೆ ನೆಪದಲ್ಲಿ, ಕೊನೆ ಮಾಡ್ತಿದ್ದಾರಾ ಅನ್ನೋ ಸಂಶಯ ಮೂಡಿದೆ. ದ್ವೇಷದ ರಾಜಕಾರಣ ಮಾಡಲ್ಲವೆಂದೇ ಸಿಎಂ ಯಡಿಯೂರಪ್ಪ ದ್ವೇಷ ಸಾಧನೆ ಮಾಡ್ತಿದ್ದಾರೆ ಅನ್ನೋ ಆರೋಪ ಕೇಳಿ ಬರ್ತಿದೆ.