ಸಿಟ್ಯಾಕೆ ಸಿಡುಕ್ಯಾಕೆ CM ಸಾಹೇಬ್ರೇ..! ಯಡಿಯೂರಪ್ಪ ಮನೆಗೆ ಮಾಧ್ಯಮಗಳ ನಿರ್ಬಂಧ ಯಾಕೆ..?

ಬೆಂಗಳೂರು : ಕುಮಾರಸ್ವಾಮಿ ಸಿಎಂ ಆಗಿದ್ದಾಗ ವಿಧಾನಸೌಧಕ್ಕೆ ಮಾಧ್ಯಮಗಳಿಗೆ ನಿರ್ಬಂಧ ಮಾಡಲಾಗಿತ್ತು. ಆಗ ಬಿ.ಎಸ್. ಯಡಿಯೂರಪ್ಪ ಅವರೇ ಖಂಡಿಸಿದ್ರು. ಈಗ ಇದೇ ಯಡಿಯೂರಪ್ಪ ಸಿಎಂ ಆಗಿದ್ದು ಅದ್ಯಾಕೋ, ಮಾಧ್ಯಮಗಳ ಮೇಲೆ ಗರಂ ಆಗಿದ್ದಾರೆ. ವಿಧಾನಸೌಧವಲ್ಲ, ತಮ್ಮ ಮನೆ ಬಳಿಯೂ ಮಾಧ್ಯಮಗಳಿಗೆ ನಿರ್ಬಂಧ ಹಾಕಿದ್ದಾರೆ.

ಯೆಸ್, ಬಿಎಸ್‌ವೈ ನಿವಾಸದ ರಸ್ತೆಗೆ ಮಾಧ್ಯಮದವರಿಗೆ ನೋ ಎಂಟ್ರಿ. ಯಡಿಯೂರಪ್ಪ ಮನೆ ಬಳಿಯವರೆಗೂ ಮಾಧ್ಯಮಗಳಿಗೆ ಎಂಟ್ರಿ ಕೊಡಬೇಡಿ ಎಂದು ಭದ್ರತಾ ಸಿಬ್ಬಂದಿಗೆ ಸಿಎಂ ಸೂಚನೆ ನೀಡಿದ್ದಾರೆ. ಹೀಗಾಗಿ, ಸಿಎಂ ಸೂಚನೆ ಇದೆ ಮಾಧ್ಯಮಗಳನ್ನ ಬಿಡೋದಿಲ್ಲ ಎಂದು ಪೊಲೀಸರೇ ಹೇಳ್ತಿದ್ದಾರೆ.

ಈ ಮಿದಲಿನಿಂದ ಬಿಎಸ್‌ವೈ ಸಿಎಂ ಆದ ಮೇಲೂ, ಅವರ ನಿವಾಸದವರೆಗೂ ಮಾಧ್ಯಮಗಳಿಗೆ ಎಂಟ್ರಿ ಇತ್ತು. ಆದ್ರೀಗ ದಿಢೀರ್ ಎಂದು ಮಾಧ್ಯಮಗಳಿಗೆ ಸಿಎಂ ನಿರ್ಬಂಧಿಸಿರುವುದು ಚರ್ಚೆಗೆ ಗ್ರಾಸವಾಗಿದೆ.

ಮೂಲಗಳ ಪ್ರಕಾರ, ಪ್ರತಿ‌ ದಿನ ಅಂಗವಿಕಲರು, ಹಲವರು ಕಷ್ಟ ಎಂದು ಯಡಿಯೂರಪ್ಪ ಮನೆ ಬಳಿ ಬರುತ್ತಾರೆ. ಆದ್ರೆ ಹಲವು ಬಾರಿ, ಸಿಎಂ ಮನೆ ಸಿಬ್ಬಂದಿ ಕಷ್ಟ ಎಂದು ಬಂದವರನ್ನು ಆಚೆ ನಿಲ್ಲಿ, ದೂರ ನಿಲ್ಲಿ ಎಂದು ಬೆದರಿಸಿದ್ದು ಇದೆ. ಈ ಬಗ್ಗೆ ಕೆಲವು ಮಾಧ್ಯಮಮಗಳು ವರದಿ ಮಾಡಿದ ಹಿನ್ನಲೆಯಲ್ಲಿ,
ಮಾಧ್ಯಮಗಳ ಮೇಲೆ ಸಿಎಂ ಯಡಿಯೂರಪ್ಪ ಸಿಟ್ಟಾಗಿ, ನಿರ್ಬಂಧದ ನಿರ್ಧಾರ ಮಾಡಿದ್ದಾರೆ ಎನ್ನಲಾಗಿದೆ.