ಡಿಕೆ ಶಿವಕುಮಾರ್​ ಅರೆಸ್ಟ್​ : ED ಬೋನಿಗೆ ಬಿದ್ದ ಕನಕಪುರ ಬಂಡೆ..!

ನವದೆಹಲಿ : ಕಳೆದ ನಾಲ್ಕು ದಿನಗಳಿಂದ ಇಡಿ ವಿಚಾರಣೆಯಲ್ಲಿದ್ದ ಮಾಜಿ ಸಚಿವ, ಕಾಂಗ್ರೆಸ್​ನ ಟ್ರಬಲ್ ಶೂಟರ್ ಡಿ.ಕೆ.ಶಿವಕುಮಾರ್ ಅವರನ್ನ ಜಾರಿ ನಿರ್ದೇಶನಾಲಯ ಕೊನೆಗೂ ಇವತ್ತು ರಾತ್ರಿ 8 ಗಂಟೆ ಸುಮಾರಿಗೆ ಬಂಧಿಸಿದೆ. ಈ ಕುರಿತು ಸುದ್ದಿ ಸಂಸ್ಥೆ ಐಎನ್​ಎಸ್​ ಟ್ವೀಟ್​ ಮಾಡಿದ್ದು, ಡಿಕೆಶಿ ಬಂಧನ ವಿಚಾರವನ್ನ ದೃಢಪಡಿಸಿದೆ.

ದೆಹಲಿಯ ಫ್ಲಾಟ್​ನಲ್ಲಿ ಹಣ ಸಿಕ್ಕ ಪ್ರಕರಣದಲ್ಲಿ ಡಿಕೆಶಿ ಬಂಧನವಾಗಿದೆ. ಇಡಿ ತನಿಖೆಗೆ ಸಹಕಾರ ನೀಡದ ಹಿನ್ನೆಲೆಯಲ್ಲಿ ಡಿಕೆಶಿ ಅವರನ್ನ ಬಂಧಿಸಿರೋದಾಗಿ ಇಡಿ ಸ್ಪಷ್ಟನೆ ನೀಡಿದೆ. ಡಿಕೆ ಶಿವಕುಮಾರ್ ಅವರನ್ನ ಬಂಧಿಸಿರೋ ಇಡಿ ಅಧಿಕಾರಿಗಳು, ದೆಹಲಿ ಪೊಲೀಸರ ಸಹಕಾರದೊಂದಿಗೆ ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಲಿದ್ದಾರೆ. ಆರ್​ಎಂಎಲ್​ ಆಸ್ಪತ್ರೆಯಲ್ಲಿ ವೈದ್ಯಕೀಯ ಪರೀಕ್ಷೆ ನಡೆಯಲಿದ್ದು, ಬಳಿಕ ಕೋರ್ಟ್​​ಗೆ ಹಾಜರು ಪಡಿಸಲಿದ್ದಾರೆ.

ದೆಹಲಿಯ ಡಿಕೆಶಿ ಫ್ಲಾಟ್​ನಲ್ಲಿ 8.59 ಕೋಟಿ ಹಣ ಪತ್ತೆಯಾಗಿತ್ತು. ಈ ಪ್ರಕರಣದಲ್ಲಿ ಇಡಿ, ಡಿಕೆಶಿಗೆ ಸಮನ್ಸ್​ ಜಾರಿ ಮಾಡಿತ್ತು. ಅದರಂತೆ ಕಳೆದ ನಾಲ್ಕು ದಿನಗಳಿಂದ ಡಿಕೆಶಿ ವಿಚಾರಣೆ ನಡೀತಿತ್ತು. ಕೊನೆಗೆ ಇವತ್ತು ದೆಹಲಿಯ ಲೋಕನಾಯಕ ಭವನದಲ್ಲಿರೋ ಇಡಿ ಕಚೇರಿಯಲ್ಲಿ ಬಂಧಿಸಲಾಗಿದೆ.