ಹಲ್ಲು ಉಜ್ಜದೇ ಇದ್ದರೆ ಏನಾಗುತ್ತೆ ಗೊತ್ತಾ..? ಸತ್ಯ ತಿಳಿದುಕೊಳ್ಳಿ..!

ಪ್ರತಿನಿತ್ಯ ಎದ್ದ ಕೂಡಲೇ ಹಲ್ಲು ಉಜ್ಜುವ ಅಭ್ಯಾಸ ನಮಗೆಲ್ಲರಿಗೂ ಇರುತ್ತದೆ. ಆದರೆ ಕೆಲವರು ಹಲ್ಲು ಉಜ್ಜುವ ಅಭ್ಯಾಸವನ್ನು ಬೆಳೆಸಿಕೊಂಡಿರುವುದಿಲ್ಲ. ಹೀಗೆ ಹಲ್ಲು ಉಜ್ಜದೇ ಇದ್ದರೆ ನಾವೆಲ್ಲಾ ತಿಳಿದುಕೊಂಡಿರುವುದಕ್ಕಿಂತಾ ಹೆಚ್ಚಿನ ಆರೋಗ್ಯ ಸಮಸ್ಯೆಗಳು ಕಾಡುತ್ತವೆ ಎಂದು ಹೊಸ ಸಂಶೋಧನೆಯಲ್ಲಿ ಗೊತ್ತಾಗಿದೆ.

ಮೂರನೇ ಎರಡರಷ್ಟು ಮಹಿಳೆಯರು ದಿನಕ್ಕೆ ಎರಡು ಬಾರಿ ಹಲ್ಲು ಉಜ್ಜುವ ಅಭ್ಯಾಸ ಬೆಳೆಸಿಕೊಂಡಿದ್ದಾರೆ. ಪುರುಷರಲ್ಲಿ ಮಹಿಳೆಯರ ಅರ್ಧದಷ್ಟು ಜನ ಮಾತ್ರ ಎರಡು ಬಾರಿ ಹಲ್ಲು ಉಜ್ಜುವ ಅಭ್ಯಾಸ ಬೆಳೆಸಿಕೊಂಡಿದ್ದಾರೆ. ಶೇಕಡ 3 ರಷ್ಟು ಬ್ರಿಟನ್ ನಾಗರಿಕರು ಹಲ್ಲು ಉಜ್ಜುವ ಅಭ್ಯಾಸವನ್ನೇ ಬೆಳೆಸಿಕೊಂಡಿಲ್ಲ ಎಂದು ಹೊಸ ಸಂಶೋಧನೆ ಹೇಳಿದೆ.

ದವಡೆಗಳ ಆರೋಗ್ಯ ಹೆಚ್ಚಳಕ್ಕೆ ನೆರವಾಗುವ ರೀತಿ ಹಲ್ಲು ಸಂದಿಗಳನ್ನು ಸ್ವಚ್ಛ ಮಾಡಲು ದಂತ ವೈದ್ಯರು ಶಿಫಾರಸು ಮಾಡಿದ್ದರೂ ಸಹ ಶೇಕಡ 31ರಷ್ಟು ಜನ ಈ ಅಭ್ಯಾಸ ಅಳವಡಿಸಿಕೊಂಡಿಲ್ಲ ಎಂದು ಗೊತ್ತಾಗಿದೆ. 24 ಗಂಟೆಗೊಮ್ಮೆ ಹಲ್ಲು ಉಜ್ಜಲೇಬೇಕು ಎಂದು ದಂತ ವೈದ್ಯರು ಹೇಳುತ್ತಾರೆ. 24 ಗಂಟೆಗೊಮ್ಮೆ ಹಲ್ಲು ಉಜ್ಜದೇ ಹೋದರೆ ಹಲ್ಲುಗಳ ಮೇಲೆ ಬ್ಯಾಕ್ಟೀರಿಯಾದಂತ ಕಣಗಳು ಅಂಟಿಕೊಳ್ಳುವ ಮೂಲಕ ದಂತ ಸಮಸ್ಯೆಗಳು ಉದ್ಭವವಾಗಲು ಕಾರಣವಾಗುತ್ತವೆ ಎಂದು ವೈದ್ಯರು ಹೇಳಿದ್ದಾರೆ.

ಬೆಳಗ್ಗೆ ಹೊತ್ತು ಹಲ್ಲು ಉಜ್ಜದೇ ಇದ್ದರೂ ಮಲಗುವ ಮುನ್ನ ಹಲ್ಲು ಉಜ್ಜಲು ವೈದ್ಯರು ಸಲಹೆ ನೀಡಿದ್ದಾರೆ. ಹಲ್ಲು ಉಜ್ಜದೇ ಇದ್ದರೆ ವಸಡುಗಳಲ್ಲಿ ರಕ್ತ ಸ್ರಾವ, ಬಾಯಿಯ ದುರ್ವಾಸನೆ, ಬ್ಯಾಕ್ಟೀರಿಯಾಗಳ ಬೆಳವಣಿಗೆ, ವಸಡುಗಳು ಸವೆಯುವುದು ಮತ್ತು ಹಲ್ಲು ಉದುರುವ ಸಮಸ್ಯೆ ಎದುರಾಗಲಿದೆ ಎಂದು ಸಂಶೋಧಕರು ಹೇಳಿದ್ದಾರೆ.