‘ಕಬ್ಜ’ ಸಿನಿಮಾ ಶೂಟಿಂಗ್ ಮತ್ತೆ ಶುರು : ಉಪ್ಪಿ-ಕಿಚ್ಚಿ ಚಿತ್ರಕ್ಕೆ ಬರೋಬ್ಬರಿ 40 ಸೆಟ್​​

ರೈಸಿಂಗ್​​ ಕನ್ನಡ :

ಸೆಟ್ಟೇರಿದ ದಿನದಿಂದಲೂ ದೊಡ್ಡಮಟ್ಟದಲ್ಲಿ ಸದ್ದು ಮಾಡ್ತಿರೋ ಸಿನಿಮಾ ಕಬ್ಜ. ಆರ್​. ಚಂದ್ರು ನಿರ್ದೇಶನದ ಈ ಹೈವೋಲ್ಟೇಜ್ ಆ್ಯಕ್ಷನ್​ ಸಿನಿಮಾದಲ್ಲಿ ರಿಯಲ್ ಸ್ಟಾರ್​ ಉಪೇಂದ್ರ ಮಾಫಿಯಾ ಡಾನ್​ ಅವತಾರದಲ್ಲಿ ಬಣ್ಣ ಹಚ್ಚಿದ್ದಾರೆ. ಅಲ್ಲದೆ, ಕಿಚ್ಚ ಸುದೀಪ್​ ಎಂಟ್ರಿಯಿಂದ ಕಬ್ಜ ಖದರ್​ ಡಬಲ್​ ಆಗಿದೆ.

ಕೆಜಿಎಫ್​ ಮಾದರಿಯಲ್ಲಿ ಎರಡು ಭಾಗಗಳಾಗಿ ಬಹಳ ಅದ್ಧೂರಿಯಾಗಿ ಕಬ್ಜ ಸಿನಿಮಾ ನಿರ್ಮಾಣವಾಗ್ತಿದೆ. ಒಂದಲ್ಲ ಎರಡಲ್ಲ ಬರೋಬ್ಬರಿ ಏಳು ಭಾಷೆಗಳಲ್ಲಿ ಸಿನಿಮಾ ಮೂಡಿ ಬರ್ತಿದ್ದು, ಅದಕ್ಕೆ ತಕ್ಕಂತೆ ಶೂಟಿಂಗ್​ ನಡೀತಿದೆ. ಕಳೆದ ವರ್ಷ ಮಿನರ್ವ ಮಿಲ್​ನಲ್ಲಿ ಕಬ್ಜ ಶೂಟಿಂಗ್​ ಆಗಿತ್ತು. ಆದ್ರೆ, ಕೊರೋನಾದಿಂದ ಚಿತ್ರೀಕರಣಕ್ಕೆ ಬ್ರೇಕ್​ ಬಿದ್ದಿತ್ತು. ಇದೀಗ ಕೊನೆಗೂ ಆರ್​. ಚಂದ್ರು ಮತ್ತೆ ಕಬ್ಜ ಸಿನಿಮಾ ಕೆಲಸಗಳಿಗೆ ಚಾಲನೆ ಕೊಟ್ಟಿದ್ದಾರೆ.

ಕೊರೋನಾ ಸೋಂಕು ಹರಡದಂತೆ ಮುನ್ನೆಚ್ಚರಿಕೆ ಕ್ರಮಗಳನ್ನ ಕೈಗೊಂಡು ಕಬ್ಜ ಶೂಟಿಂಗ್​ ಬುಧವಾರದಿಂದ ಶುರು ಮಾಡ್ತಿದೆ ಚಿತ್ರತಂಡ. ಕಬ್ಜ ಚಿತ್ರಕ್ಕಾಗಿ ಬರೋಬ್ಬರಿ 40 ಸೆಟ್​​ಗಳನ್ನ ನಿರ್ಮಾಣ ಮಾಡಲಾಗಿದೆ. ಕೆಜಿಎಫ್​ ಖ್ಯಾತಿಯ ಆರ್ಟ್​ ಡೈರೆಕ್ಟರ್​ ಶಿವಕುಮಾರ್​ ಸಾರಥ್ಯದಲ್ಲಿ ಬಗೆ ಬಗೆಯ ಸೆಟ್​ಗಳು ಎದ್ದು ನಿಂತಿದೆ. ಇದೇ ಸೆಟ್​ಗಳಲ್ಲಿ 2 ತಿಂಗಳ ಕಾಲ ಚಿತ್ರೀಕರಣಕ್ಕೆ ಪ್ಲಾನ್​ ಮಾಡಲಾಗ್ತಿದೆ. ತೆಲುಗಿನ ಗನಿ ಸಿನಿಮಾ ಶೂಟಿಂಗ್​ ಹೋಗಿದ್ದ ಉಪೇಂದ್ರ ಶೀಘ್ರದಲ್ಲೇ ಕಬ್ಜ ಸೆಟ್​​ ಸೇರಿಕೊಳ್ಳಲಿದ್ದಾರೆ.

ಕಬ್ಜ ಚಿತ್ರದಲ್ಲಿ ಕಿಚ್ಚ ಸುದೀಪ್ ಭಾರ್ಗವ ಭಕ್ಷಿ ಅನ್ನೋ ಖಡಕ್​ ರೋಲ್​ ಮಾಡ್ತಿದ್ದಾರೆ. ಅಕ್ಕಪಕ್ಕದ ಇಂಡಸ್ಟ್ರಿಯ ಘಟಾನುಘಟಿ ಕಲಾವಿದರು ಕಬ್ಜ ಚಿತ್ರದಲ್ಲಿ ನಟಿಸ್ತಿದ್ದಾರೆ. ಸಹಜವಾಗಿಯೇ ಸಿನಿಮಾ ಮೇಲೆ ಕುತೂಹಲ ಮೂಡಿದೆ. ಬಹುಕೋಟಿ ವೆಚ್ಚದಲ್ಲಿ ಆರ್​. ಚಂದ್ರು ಕಬ್ಜ ಚಿತ್ರವನ್ನ ಕಟ್ಟಿಕೊಡ್ತಿದ್ದಾರೆ.