ಈಶ್ವರಪ್ಪಗೆ ತಪ್ಪಿದ ಡಿಸಿಎಂ ಸ್ಥಾನ : ಮತ್ತೆ ಸಂಗೊಳ್ಳಿ ರಾಯಣ್ಣ ಬ್ರಿಗೇಡ್​ ಆ್ಯಕ್ಟೀವ್​..! ಬಿಜೆಪಿಗೆ ಬಿಸಿ ತುಪ್ಪ..!

ಬೆಂಗಳೂರು/ಶಿವಮೊಗ್ಗ : ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್​ ಸಚಿವರಾಗಿರೋ ಕೆ.ಎಸ್.ಈಶ್ವರಪ್ಪಗೆ ಡಿಸಿಎಂ ಸ್ಥಾನ ತಪ್ಪಿದೆ. ಇದರಿಂದಾಗಿ ಈಶ್ವರಪ್ಪ ಬೆಂಬಲಿಗರು ಆಕ್ರೋಶ ಮತ್ತು ಅಸಮಾಧಾನವನ್ನ ಹೊರ ಹಾಕಿದ್ದಾರೆ. ಈ ಮಧ್ಯೆ, ಇಷ್ಟು ದಿನ ಮುಚ್ಚಿ ಹೋಗಿದ್ದ ರಾಯಣ್ಣ ಬ್ರಿಗೇಡ್​ಗೆ ಮತ್ತೆ ಮರುಜೀವ ಬಂದಿದೆ.

ಕೆ.ಎಸ್. ಈಶ್ವರಪ್ಪ ಬಿಜೆಪಿಯಲ್ಲಿ ಹಿರಿಯ ನಾಯಕರು. ಕುರುಬ ಸಮುದಾಯದ ಮುಖಂಡರು. ಹಿಂದಿನ ಬಿಜೆಪಿ ಸರ್ಕಾರದಲ್ಲಿ ಉಪ ಮುಖ್ಯಮಂತ್ರಿಯಾಗಿದ್ದವರು. ಆದ್ರೆ, ಈ ಬಾರಿ ಡಿಸಿಎಂ ಸ್ಥಾನ ಸಿಗದೇ ಇರೋದಕ್ಕೆ ಆಪ್ತರಲ್ಲಿ ಈಶ್ವರಪ್ಪ ಬೇಸರ ಹೊರಹಾಕಿದ್ದಾರೆ. ಇತ್ತ, ಇಷ್ಟು ದಿನ ಕಣ್ಮರೆಯಾಗಿದ್ದ ಸಂಗೊಳ್ಳಿ ರಾಯಣ್ಣ ಬ್ರಿಗೇಡ್ ಮತ್ತೆ ಕಾರ್ಯ ಶುರು ಮಾಡಿದಂತೆ ಕಾಣ್ತಿದೆ.

ಈಶ್ವರಪ್ಪಗೆ ಉಪ ಮುಖ್ಯಮಂತ್ರಿ ಹುದ್ದೆ ನೀಡದೇ, ಹಿಂದುಳಿದ ವರ್ಗಗಳಿಗೆ ಬಿಜೆಪಿ ಅನ್ಯಾಯ ಮಾಡಿದೆ. ಕೂಡಲೇ ಈಶ್ವರಪ್ಪಗೆ ಡಿಸಿಎಂ ಹುದ್ದೆ ನೀಡಬೇಕು ಎಂದು ರಾಯಣ್ಣ ಬ್ರಿಗೇಡ್​ ಅಧ್ಯಕ್ಷ ಎಂ.ದೊಡ್ಡಯ್ಯ ಆನೇಕಲ್​ ಎಚ್ಚರಿಕೆ ನೀಡಿದ್ದಾರೆ. ಈ ಕುರಿತು ಪತ್ರಿಕಾ ಪ್ರಕಟಣೆ ಹೊರಡಿಸಿರೋ ದೊಡ್ಡಯ್ಯ ಆನೇಕಲ್, ಆಗಿರುವ ತಪ್ಪನ್ನ ಈಗಲೇ ಸರಿಪಡಿಸಬೇಕು. ಇಲ್ಲದೇ ಹೋದಲ್ಲಿ ರಾಜ್ಯಾದ್ಯಂತ ಹೋರಾಟ ಮಾಡೋದಾಗಿ ಯಡಿಯೂರಪ್ಪಗೆ ಎಚ್ಚರಿಕೆ ನೀಡಿದ್ದಾರೆ.

ಈ ನಡುವೆ, ಈಶ್ವರಪ್ಪ ಕೂಡ ಅಸಮಾಧಾನ ಹೊರಹಾಕಿದ್ದಾರೆ.