ಐಪಿಎಲ್ ಹಬ್ಬ:ಕಿಂಗ್ಸ್ ಎದುರು ಡೆಲ್ಲಿ ಕ್ಯಾಪಿಟಲ್ಸ್​ಗೆ ಸೂಪರ್ ಗೆಲುವು

ರೈಸಿಂಗ್​ ಕನ್ನಡ:

ನ್ಯೂಸ್​ ಡೆಸ್ಕ್​:

ಆಲ್ರೌಂಡರ್​ ಸ್ಟೋಯ್ನಿಸ್​ ಅವರ ಆಲ್ರೌಂಡ್​ ಪ್ರದರ್ಶನ ಮತ್ತು ರಬಾಡ ಅವರ ಮಾರಕ ದಾಳಿಯ ನೆರವಿನಿಂದ ಡೆಲ್ಲಿ ಕ್ಯಾಪಿಟಲ್ಸ್​ ತಂಡ ಕಿಂಗ್ಸ್ ಇಲೆವೆನ್​ ಪಂಜಾಬ್​ ವಿರುದ್ದದ ರಣ ರೋಚಕ ಕದನದಲ್ಲಿ ಸೂಪರ್​ ಗೆಲುವು ದಾಖಲಿಸಿದೆ.

ದುಬೈನಲ್ಲಿ ನಡೆದ ಚುಟಕು ಮಹಾ ಕದನದಲ್ಲಿ ಟಾಸ್​ ಗೆದ್ದ ಕಿಂಗ್ಸ್​ ಇಲೆವೆನ್​ ಪಂಜಾಬ್​ ತಂಡ ಫಿಲ್ಡಿಂಗ್​ ಆಯ್ದುಕೊಂಡಿತ್ತು. ಮೊದಲು ಬ್ಯಾಟಿಂಗ್​ ಮಾಡಿದ ಡೆಲ್ಲಿ ತಂಡ ಆರಂಭಿಕರಾದ ಶಿಖರ್​ ಧವನ್​(0),ಪೃಥ್ವಿ ಶಾ (5) ಪೆವಿಲಿಯನ್​ ಸೇರಿ ಆಘಾತ ಅನುಭವಿಸಿತು.

ಮೂರನೇ ವಿಕೆಟ್​ಗೆ ಜೊತೆಗೂಡಿದ ನಾಯಕ ಶ್ರೇಯಸ್​ ಅಯ್ಯರ್​ (39) ಮತ್ತು  ರಿಷಭ್​ ಪಂತ್​(31) ಭರ್ಜರಿ ಬ್ಯಾಟಿಂಗ್​ ಮಾಡಿ ತಂಡದ ಕುಸಿತವನ್ನ ತಡೆದರು. ಈ ಇಬ್ಬರು ಆಟಗಾರರು ಔಟಾದ ನಂತರ ಡೆಲ್ಲಿ ತಂಡ ಮತ್ತೆ ಸಂಕಷ್ಟದಲ್ಲಿ ಸಿಲುಕಿತು. ಈ ವೇಳೆ ಆರನೇ ಕ್ರಮಾಂಕದಲ್ಲಿ ಬಂದ ಆಲ್ರೌಂಡರ್​ ಸ್ಟೋಯ್ನಿಸ್​ (53) ಬಿರುಗಾಳಿಯಂತೆ ಅಬ್ಬರಿಸಿ ತಂಡಕ್ಕೆ ಮತ್ತೆ ಜೀವ ತುಂಬಿದರು. ಕೊನೆಯಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್​ ತಂಡ ನಿಗದಿತ ಓವರ್​ಗಳಲ್ಲಿ 8 ವಿಕೆಟ್​ ನಷ್ಟಕ್ಕೆ 157 ರನ್​ ಕಲೆ ಹಾಕಿತು.

158 ರನ್​ಗಳ ಸ್ಪರ್ಧಾತ್ಮಕ ಗುರಿ ಬೆನ್ನತ್ತಿದ ಪಂಜಾಬ್​ ತಂಡ ನಾಯಕ ಕೆ.ಎಲ್​.ರಾಹುಲ್​ ಅವರ ವಿಕೆಟ್​ ಕಳೆದಕೊಂಡು ಆಘಾತ ಅನುಭವಿಸಿತು. ನಂತರ ಬಂದ ಕರುಣ್​ ನಾಯರ್​ (1),ನಿಕೊಲೊಸ್​ ಪೂರಾನ್​(0)ಗ್ಲೇನ್​ ಮ್ಯಾಕ್ಸ್​ವೆಲ್ (1), ಸರ್ಫಾರಾಜ್​ ಖಾನ್​ (12), ಕೆ.ಗೌತಮ್​20, ಜೋರ್ಡನ್​(5) ರನ್​ಗಳಿಸಿದರು. ಕನ್ನಡಿಗ ಮಯಾಂಕ್​ ಅಗರ್​ವಾಲ್​​ ಕೊನೆಯವರೆಗೂ ಹೋರಾಟ ಮಾಡಿದರು. ಆದರೆ ಕೊನೆಯ ಓವರ್​ನ ಕೊನೆಯ ಎರಡು ಎಸೆತಗಳಲ್ಲಿ ಸ್ಟೋನಿಸ್​ ಕರರುವಕ್​ ದಾಳಿ ನಡೆಸಿ ಮಯಾಂಕ್​ ಅಗರ್​ವಾಲ್​(89), ಮತ್ತು ಜೋರ್ಡನ್​ ಅವರನ್ನ ಔಟ್ ಮಾಡಿ ಪಂದ್ಯವನ್ನ ಟೈ ಮಾಡಿದರು.

ಸೂಪರ್​ ಓವರ್​ನಲ್ಲಿ ಗೆದ್ದ ಡೆಲ್ಲಿ

ನಿರ್ಣಾಯಕ ಸೂಪರ್​ ಓವರ್​ನಲ್ಲಿ ಮೊದಲು ಬ್ಯಾಟ್​ ಮಾಡಿದ ಪಂಜಾಬ್​ ತಂಡ ಕೇವಲ 3 ರನ್​ಗಳಿಸಿತು. ಡೆಲ್ಲಿ ವೇಗಿ ರಬಾಡ ಎರಡು ವಿಕೆಟ್​ ಪಡೆದರು. ಸುಲಭ ಟಾರ್ಗೆಟ್​ ಬೆನ್ನತ್ತಿದ ಡೆಲ್ಲಿ ತಂಡಕ್ಕೆ ಪಂತ್ ತಂಡವನ್ನ ಗೆಲುವಿನ ದಡ ಸೆರಿಸಿದರು.