5 ಲಕ್ಷದವರೆಗೆ ತೆರಿಗೆ ಇಲ್ವಾ..? 5 ರಿಂದ 10 ಲಕ್ಷ ಆದಾಯಕ್ಕೆ ಎಷ್ಟು ತೆರಿಗೆ..? ಮೋದಿ ಸರ್ಕಾರದ ಹೊಸ ಚಿಂತನೆ ಏನು..?

ನವದೆಹಲಿ : ವಾರ್ಷಿಕ 5 ಲಕ್ಷದವರೆಗೆ ಆದಾಯ ಇರೋ ವ್ಯಕ್ತಿ ತೆರಿಗೆ ಕಟ್ಟಬೇಕಿಲ್ಲ ಎಂದು ಕಳೆದ ಮೋದಿ ಸರ್ಕಾರದಲ್ಲಿ ಹಣಕಾಸು ಸಚಿವರಾಗಿದ್ದ ಪಿಯೂಷ್ ಗೋಯಲ್​​ ಬಜೆಟ್​ ಮಂಡಿಸಿದ್ದರು. ಇದನ್ನೇ ಈಗಿನ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್​ ಹೇಳಿದ್ರು. ಆದ್ರೀಗ ಮತ್ತೆ ಆದಾಯ ತೆರಿಗೆ ಸ್ಲ್ಯಾಬ್​ ಪರಿಶೀಲಿಸೋ ಸಾಧ್ಯತೆ ಇದೆ.

ಈ ಕುರಿತು ರಚನೆಯಾಗಿರೋ ಟಾಸ್ಕ್​ ಫೋರ್ಟ್​ ಕೇಂದ್ರ ಹಣಕಾಸು ಸಚಿವಾಲಯಕ್ಕೆ ವರದಿ ನೀಡಿದ್ದು, 5 ಲಕ್ಷದವರೆಗೆ ತೆರಿಗೆ ಬೇಡ. ಆದ್ರೆ, 5 ರಿಂದ 10 ಲಕ್ಷ ವಾರ್ಷಿಕ ಆದಾಯ ಇರುವವರಿಗೆ ಶೇಕಡಾ 20ರ ಬದಲು ಶೇಕಡಾ 10ರಷ್ಟು ತೆರಿಗೆ ವಿಧಿಸಿದರೆ ಸಾಕು ಎಂದು ಶಿಫಾರಸು ಮಾಡಿದೆ. ಅಲ್ಲದೆ, 10 ಲಕ್ಷದಿಂದ 20 ಲಕ್ಷ ವಾರ್ಷಿಕ ಆದಾಯ ಹೊಂದಿದ್ದರೆ ಅವರಿಗೆ 20ರಷ್ಟು ಶೇಕಡಾ ತೆರಿಗೆ ಹಾಕಬೇಕು ಎಂದು ವರದಿಯಲ್ಲಿ ಹೇಳಿದೆ.

ಕೇಂದ್ರ ನೇರ ತೆರಿಗೆ ಮಂಡಳಿ ಸದಸ್ಯ ಅಖಿಲೇಶ್ ರಾಜನ್​ ನೇತೃತ್ವದಲ್ಲಿ ಟಾಸ್ಕ್​ ಫೋರ್ಸ್​ ರಚನೆಯಾಗಿದ್ದು, ಆದಾಯ ತೆರಿಗೆ ವಿಚಾರವಾಗಿ ಕೇಂದ್ರ ಸರ್ಕಾರ ಪಾಲಿಸಬಹುದಾದ ನಿಯಮಗಳನ್ನ ಶಿಫಾರಸು ಮಾಡಿದ್ದಾರೆ. ಈ ಶಿಫಾರಸ್ಸುಗಳನ್ನ ಆಧರಿಸಿ, ಕೇಂದ್ರ ಹಣಕಾಸು ಸಚಿವಾಲಯ ಮುಂದಿನ ನಿರ್ಧಾರ ಪ್ರಕಟಿಸಲಿದೆ.