ಕೊರೊನಾ ಅಟ್ಟಹಾಸಕ್ಕೆ ಮತ್ತೊಂದು ಬಲಿ- ತುಮಕೂರಿನಲ್ಲಿ 3ನೇ ಸಾವು

ರೈಸಿಂಗ್​ ಕನ್ನಡ:

ಕೆ.ಆರ್​. ಬಾಬು, ತುಮಕೂರು:

ಕಲ್ಪತರು ನಾಡು ತುಮಕೂರಿನಲ್ಲಿ ಕೊರೋನಾ ಅಟ್ಟಹಾಸಕ್ಕೆ ಮೂರನೇ ಬಲಿ ಬಿದ್ದಿದೆ. ಈಗಾಗಲೇ ಕೊರೋನಾ ಹೆಮ್ಮಾರಿಗೆ ಎರಡು ಬಲಿಯನ್ನು ಕಂಡ ತುಮಕೂರು ಜಿಲ್ಲೆ ಇದೀಗ ಮೂರನೇ ಬಲಿ ಕಂಡಿದೆ. ನಗರದ ಪಿಎಚ್ ಕಾಲೊನಿಯ ಐವತ್ತಾರು ವರ್ಷದ ಪುರುಷ ಮೃತಪಟ್ಟಿದ್ದಾನೆ. ಜೂನ್​ 22 ರಂದು ಬೆಳಗ್ಗೆ ಜಿಲ್ಲಾಸ್ಪತ್ರೆಗೆ ದಾಖಲಾಗಿದ್ದ ವ್ಯಕ್ತಿ ತೀವ್ರ ಉಸಿರಾಟದ ತೊಂದರೆಯಿಂದ ಐಸಿಯುನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ. ಜೂನ್​ 22 ರಂದು ಆಸ್ಪತ್ರೆಗೆ ದಾಖಲಾದ ಬೆನ್ನಲ್ಲೇ ಆತನ ಗಂಟಲು ದ್ರವದ ಮಾದರಿಯನ್ನು ಸಂಗ್ರಹಿಸಲಾಗಿತ್ತು. ಜೂನ್ 23ರಂದು ಬೆಳಗ್ಗೆ 12.45ಕ್ಕೆ ಹೃದಯಾಘಾತದಿಂದ ಸಾವನ್ನಪ್ಪಿದ್ದಾನೆ. ರೋಗಿಗೆ ಮಧುಮೇಹ ಅಧಿಕ ರಕ್ತದೊತ್ತಡವಿತ್ತು. ಗಂಟಲು ದ್ರವದ ಮಾದರಿ ವರದಿಯಲ್ಲಿ ಕೋವಿಡ್ 19 ದೃಢಪಟ್ಟಿತ್ತು. ಪ್ರಾಥಮಿಕ ದ್ವಿತೀಯ ಸಂಪರ್ಕ ಹೊಂದಿದವರ ಪತ್ತೆಗೆ ಜಿಲ್ಲಾಡಳಿತ ಮುಂದಾಗಿದೆ. ಜಿಲ್ಲೆಯಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ 57ಕ್ಕೆ ಏರಿಕೆ ಕಂಡಿದ್ದು ಮೃತ ವ್ಯಕ್ತಿ ಪಿಎಚ್ ಕಾಲೋನಿ ಕಂಟೈನ್ಮೆಂಟ್ ಝೋನ್ ಎಂದು ಈಗಾಗಲೇ ಘೋಷಿಸಲಾಗಿದೆ. ಈ ಕುರಿತು ಡಿಎಚ್ಒ ಮಾಧ್ಯಮಗಳಿಗೆ ಹೇಳಿಕೆ ನೀಡಿದ್ದಾರೆ.