2ನೇ ಸ್ಥಾನಕ್ಕೆ ನ್ಯೂಸ್ 18 ಕನ್ನಡ ಲಗ್ಗೆ : ಪಬ್ಲಿಕ್ ಟಿವಿಗೆ ಶಾಕ್..! TV9ಗೂ ನಡುಕ ಶುರುನಾ..? ಹೊಸ ಇತಿಹಾಸಕ್ಕೆ ನಾಂದಿ

ಬೆಂಗಳೂರು : ಇದು ಕನ್ನಡ ಮಾಧ್ಯಮ ಲೋಕದಲ್ಲೇ ಹೊಸ ಸಂಚಲನ ಸೃಷ್ಟಿಸಿರೋ ಸುದ್ದಿ. ಕಳೆದ ವಾರವಷ್ಟೇ ರೈಸಿಂಗ್ ಕನ್ನಡ ವೆಬ್​​ಸೈಟ್​​ನಲ್ಲೇ ಈ ಕುರಿತು ವರದಿ ಮಾಡಲಾಗಿತ್ತು. ಹೌದು, ನ್ಯೂಸ್​ 18 ಕನ್ನಡ, ಸುದ್ದಿ ವಾಹಿನಿ ಈಗ ಕರ್ನಾಟಕದಲ್ಲಿ ಎರಡನೇ ಸ್ಥಾನವನ್ನ ಪಡೆದಿದೆ. ಈ ಮೂಲಕ ಕಳೆದ 4 ವರ್ಷಗಳಿಂದ ಎರಡನೇ ಸ್ಥಾನವನ್ನ ಕಾಯ್ದುಕೊಂಡಿದ್ದ ಪಬ್ಲಿಕ್​ ಟಿವಿಗೆ ಶಾಕ್​ ನೀಡಿದೆ.

ಕಳೆದ ಎರಡು ವಾರಗಳ ಹಿಂದಷ್ಟೇ ಸುವರ್ಣ ನ್ಯೂಸ್​ ಅನ್ನ ನಾಲ್ಕನೇ ಸ್ಥಾನಕ್ಕೆ ತಳ್ಳಿದ ನ್ಯೂಸ್​ 18 ಕನ್ನಡ, ಮೂರನೇ ಸ್ಥಾನಕ್ಕೆ ಲಗ್ಗೆ ಇಟ್ಟಿತ್ತು. ಆದ್ರೀವಾರ ಪಬ್ಲಿಕ್ ಟಿವಿಯನ್ನೇ ಮೂರನೇ ಸ್ಥಾನಕ್ಕೆ ತಳ್ಳಿದ್ದು, ನ್ಯೂಸ್​ 18 ಕನ್ನಡ ಎರಡನೇ ಸ್ಥಾನಕ್ಕೆ ಬಂದಿದೆ. ಪಬ್ಲಿಕ್​ ಟಿವಿ ಹಾಗೂ ನ್ಯೂಸ್​ 18 ಕನ್ನಡದ ರೇಟಿಂಗ್​ ವ್ಯತ್ಯಾಸ ಕಡಿಮೆ ಇದ್ರೂ ಕೂಡ, ಪಬ್ಲಿಕ್​​​ ಟಿವಿ ಈಗ ಮೂರನೇ ಸ್ಥಾನಕ್ಕೆ ಕುಸಿದಿದೆ.

ನ್ಯೂಸ್​ 18 ಕನ್ನಡದ ವೇಗ ನೋಡ್ತಿದ್ರೆ, ಮುಂದಿನ ಟಾರ್ಗೆಟ್​ ಟಿವಿ9 ಅನ್ನೋ ಮಾತುಗಳು ಕೇಳಿ ಬರ್ತಿವೆ. ಆದ್ರೆ, ಕಳೆದ 12 ವರ್ಷಗಳಿಂದ ಟಿವಿ9 ಮೊದಲ ಸ್ಥಾನದಲ್ಲೇ ಇದೆ. ಹೀಗಾಗಿ, ಟಿವಿ9 ಅನ್ನು ಮೀರಿ ನಂಬರ್​ ಒನ್​ ಸ್ಥಾನ ಪಡೆಯೋದು ಅಷ್ಟು ಸುಲಭವಲ್ಲ ಅನ್ನೋ ಚರ್ಚೆ ಕೂಡ ಶುರುವಾಗಿದೆ. ಆದ್ರೂ, ಯಾವುದೂ ಅಸಾಧ್ಯವಲ್ಲ ಅನ್ನೋದಕ್ಕೆ ಕಳೆದ ನಾಲ್ಕು ವಾರಗಳ ರೇಟಿಂಗ್​ ಸಾಕ್ಷಿ ಎನ್ನಲಾಗ್ತಿದೆ.

ನಾಲ್ಕು ವರ್ಷಗಳಿಂದ ಪಬ್ಲಿಕ್​ ಟಿವಿಯನ್ನ ಯಾರು ಕೂಡ ಮುಟ್ಟಲು ಆಗಿರಲಿಲ್ಲ. ಆದ್ರೀಗ, ಪಬ್ಲಿಕ್​ ಟಿವಿ ಮೂರನೇ ಸ್ಥಾನಕ್ಕೆ ಕುಸಿದಿದೆ.

ನ್ಯೂಸ್​ 18 ಕನ್ನಡದಲ್ಲಿ ಸಂಭ್ರಮವೋ ಸಂಭ್ರಮ

ಕಳೆದ ನಾಲ್ಕು ವಾರಗಳಿಂದ ನ್ಯೂಸ್​ 18 ಕನ್ನಡ ಅತ್ಯುತ್ತಮವಾಗಿ ರೇಟಿಂಗ್ ಗಳಿಸುತ್ತಿದ್ದು, ಕಚೇರಿಯಲ್ಲಿ ಹಬ್ಬದ ವಾತಾವರಣವೇ ಮನೆ ಮಾಡಿದೆ. ಪ್ರತಿವಾರ ಕೇಕ್​ ಕಟ್​ ಮಾಡಿ, ಈ ಸಂಭ್ರಮವನ್ನ ಆಚರಣೆ ಮಾಡಲಾಗ್ತಿದೆ.

ರೇಟಿಂಗ್​​ಗೆ ಲ್ಯಾಂಡಿಂಗ್ ಪೇಜ್​ ಆರೋಪ..!

ಈ ಮಧ್ಯೆ, ನ್ಯೂಸ್​ 18 ಕನ್ನಡ ವೇಗವಾಗಿ ರೇಟಿಂಗ್ ಪಡೆದಿರೋದಕ್ಕೆ ಹಲವರು ಹಲವು ರೀತಿಯಲ್ಲಿ ವಿಶ್ಲೇಷಣೆ ಮಾಡ್ತಿದ್ದಾರೆ. ಕಳೆದ ಎರಡು ತಿಂಗಳಿಂದ ಲ್ಯಾಂಡಿಂಗ್​ ಪೇಜ್​​ಗೆ ಅನುಮತಿ ನೀಡಲಾಗಿದೆ. ಬಹುತೇಕ ಕರ್ನಾಟಕ ಕೇಬಲ್​ಗಳಲ್ಲಿ ನ್ಯೂಸ್​ 18 ಕನ್ನಡ ಲ್ಯಾಂಡಿಂಗ್ ಪೇಜ್​ ಆಗಿದೆ. ಹೀಗಾಗಿ ರೇಟಿಂಗ್ ಬರ್ತಿದೆ ಅನ್ನೋ ಮಾತು ಕೇಳಿ ಬರ್ತಿದೆ.

ಏನಿದು ಲ್ಯಾಂಡಿಂಗ್ ಪೇಜ್​..?

ಲ್ಯಾಂಡಿಂಗ್ ಪೇಜ್​ ಅಂದ್ರೆ, ಟಿವಿ ಆನ್​ ಮಾಡಿದ ತಕ್ಷಣ ಬರುವಂತಹ ಚಾನೆಲ್​. ನೀವೀಗ ಮನೆಯಲ್ಲಿ ಟಿವಿ ಆನ್​ ಮಾಡಿದ ತಕ್ಷಣ ನಿಮ್ಮ ಮನೆಯಲ್ಲಿ ಯಾವುದಾದರೊಂದು ಚಾನೆಲ್ ಬರುತ್ತೆ. ಹಾಗೆ ಬಂದಾಗ, ಆ ಚಾನೆಲ್​ಅನ್ನ ನೀವು ನೋಡಬಹುದು, ಅಥವಾ ಬದಲಾವಣೆ ಮಾಡಬಹುದು. ಆದ್ರೆ, ಟಿವಿ ಹಾಕಿದ ತಕ್ಷಣ ಆ ಚಾನೆಲ್ ಬರೋದ್ರಿಂದ, ಅದನ್ನ ಕನಿಷ್ಠ 2 ನಿಮಿಷ ನೋಡಿದರೂ, ಚಾನೆಲ್ ರೇಟಿಂಗ್​ ಮೇಲೆ ಪರಿಣಾಮ ಬೀರುತ್ತೆ ಅನ್ನೋದು ತಜ್ಞರ ವಾದ.

ಸುಪ್ರೀಂಕೋರ್ಟ್​​ನಲ್ಲಿ ವಿಚಾರಣೆ..!

ಇದೇ ಲ್ಯಾಂಡಿಂಗ್ ಪೇಜ್​ ವಿಚಾರವಾಗಿ ಹಲವು ಸಂಸ್ಥೆಗಳು ಕೋರ್ಟ್​ ಮೆಟ್ಟಿಲೇರಿವೆ. ಈಗಾಗಲೇ ವಿಚಾರಣೆ ನಡೆಸಿರೋ ಸುಪ್ರೀಂಕೋರ್ಟ್​​, ಟ್ರಾಯ್​​ಗೆ ನೊಟೀಸ್​ ನೀಡಿದೆ. ಮುಂದಿನ ತಿಂಗಳು ಸೆಪ್ಟೆಂಬರ್​ 12ರಂದು ಈ ಕುರಿತು ಸುಪ್ರೀಂನಲ್ಲಿ ವಿಚಾರಣೆ ನಡೆಯಲಿದೆ.

ಅದೇನೇ ಆಗ್ಲಿ, ಕನ್ನಡ ಸುದ್ದಿ ಮಾಧ್ಯಮ ಇತಿಹಾಸದಲ್ಲಿ ನ್ಯೂಸ್​ 18 ಕನ್ನಡ ಹೊಸ ಮೈಲಿಗಲ್ಲು ಸೃಷ್ಟಿಸಿರೋದು ಸುಳ್ಳಲ್ಲ..