ಹೆಲ್ಮೆಟ್​​ ಹಾಕಿಲ್ಲ ಅಂದ್ರೆ ಇನ್ಮುಂದೆ ಪೆಟ್ರೋಲ್​ ಸಿಗಲ್ಲ..!

ಬೆಂಗಳೂರು : ಹೆಲ್ಮೆಟ್​ ಹಾಕಿಕೊಂಡು ಗಾಡಿ ಚಲಾಯಿಸಿ ಅಂತ ಎಷ್ಟೇ ಹೇಳಿದ್ರೂ, ವಾಹನ ಸವಾರರು ಮಾತ್ರ ಇದನ್ನ ನಿರ್ಲಕ್ಷ್ಯ ಮಾಡ್ತಿದ್ದಾರೆ. ಹೆಲ್ಮೆಟ್​ ಇಲ್ಲದ ವಾಹನ ಸವಾರರೇ ಅಪಘಾತಗಳಲ್ಲಿ ಹೆಚ್ಚಾಗಿ ಮೃತಪಡುವುದು ಸಾಬೀತಾಗಿದೆ. ಈ ಹಿನ್ನೆಲೆಯಲ್ಲಿ ಬೆಂಗಳೂರು ಪೊಲೀಸರು ಕಟ್ಟುನಿಟ್ಟಿನ ಕ್ರಮಕ್ಕೆ ಮುಂದಾಗಿದ್ದಾರೆ. ಇನ್ಮುಂದೆ ಯಾವುದೇ ಪೆಟ್ರೋಲ್​ ಬಂಕ್​ಗೆ ಹೋಗಿ, ಪೆಟ್ರೋಲ್​ ಬೇಕಂದ್ರೂ ನೀವು ಹೆಲ್ಮೆಟ್​ ಹಾಕಿರಲೇ ಬೇಕು. ಹೆಲ್ಮೆಟ್​ ಇಲ್ಲದೇ ಇನ್ಮುಂದೆ ಪೆಟ್ರೋಲ್ ಸಿಗಲ್ಲ.

ಹೆಲ್ಮೆಟ್​ ಇಲ್ಲದೆ, ಪೆಟ್ರೋಲ್ ಹಾಕದಂತೆ ಈಗಾಗಲೇ ಬೆಂಗಳೂರು ಪೊಲೀಸರು, ಎಲ್ಲಾ ಬಂಕ್ ಮಾಲೀಕರಿಗೆ ಮಾಹಿತಿ ನೀಡಿದ್ದಾರೆ. ಇದೇ ವಿಚಾರವಾಗಿ ಇವತ್ತು ಬೆಂಗಳೂರಿನ ಬಂಕ್ ಮಾಲೀಕರ ಜೊತೆ ಬೆಂಗಳೂರು ಸಂಚಾರಿ ಪೊಲೀಸ್ ಆಯುಕ್ತ ಹರಿಶೇಖರನ್​ ಸಭೆ ನಡೆಸಲಿದ್ದಾರೆ. ಸಭೆಯಲ್ಲಿ ಸುಮಾರು 3 ಸಾವಿರಕ್ಕೂ ಹೆಚ್ಚು ಬಂಕ್ ಮಾಲೀಕರು ಭಾಗಿಯಾಗಲಿದ್ದಾರೆ.

ಸುಪ್ರೀಂಕೋರ್ಟ್​ ಆದೇಶ ಇದ್ದರೂ, ಅದನ್ನ ಉಲ್ಲಂಘಿಸಿ ಹೆಲ್ಮೆಟ್​ ಇಲ್ಲದೇ ಸಂಚಾರ ಮಾಡ್ತಾರೆ. ಹೀಗಾಗಿ, ಹೆಲ್ಮೆಟ್​ ಇಲ್ಲದೇ ಪೆಟ್ರೋಲ್​ ಹಾಕದಿರಲು ಪೊಲೀಸರು ಮೌಖಿಕ ಆದೇಶ ಹೊರಡಿಸಿದ್ದಾರೆ. ಇವತ್ತಿನ ಸಭೆಯ ಬಳಿಕ ಅಧಿಕೃತ ಆದೇಶ ಜಾರಿಯಾಗುವ ಸಾಧ್ಯತೆ ಇದೆ.