ಸುಷ್ಮಾ ಸ್ವರಾಜ್​ ಬದುಕಿನ ಹಾದಿ : ವಕೀಲೆಯಿಂದ ವಿದೇಶಾಂಗ ಸಚಿವೆವರೆಗೆ

ನವದೆಹಲಿ : ಬಿಜೆಪಿ ಹಿರಿಯ ನಾಯಕಿ, ಮಾಜಿ ವಿದೇಶಾಂಗ ಸಚಿವ ಸುಷ್ಮಾ ಸ್ವರಾಜ್ ನಿಧನರಾಗಿದ್ದಾರೆ. ಮಂಗಳವಾರ ರಾತ್ರಿ, ದೆಹಲಿಯ ಏಮ್ಸ್​ ಆಸ್ಪತ್ರೆಯಲ್ಲಿ ಹೃದಯಾಘಾತದಿಂದ ಕೊನೆಯುಸಿರೆಳೆದರು.

ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಹಿಂದಿನ ಸರ್ಕಾರದಲ್ಲಿ ವಿದೇಶಾಂಗ ಸಚಿವೆಯಾಗಿ, ಸಮರ್ಥವಾಗಿ ಖಾತೆ ನಿರ್ವಹಿಸಿದ್ದವರು ಸುಷ್ಮಾ ಸ್ವರಾಜ್​. ಸುಷ್ಮಾ, ಹರಿಯಾಣದ ಅಂಬಾಲಾ ಮೂಲದವರು. ಸುಪ್ರೀಂಕೋರ್ಟ್​ ವಕೀಲೆಯಾಗಿ ವೃತ್ತಿ ಬದುಕು ಆರಂಭಿಸಿದವರು ಸುಷ್ಮಾ. ಎಬಿವಿಪಿಯಲ್ಲಿ ಸಕ್ರಿಯರಾಗಿದ್ದ ಸುಷ್ಮಾ, ಬಳಿಕ ರಾಜಕೀಯಕ್ಕೆ ಧುಮುಕಿದ್ರು.

ಏಳು ಬಾರಿ ಸಂಸದರಾಗಿ, ಮೂರು ಬಾರಿ ವಿಧಾನಸಭಾ ಸದಸ್ಯರಾಗಿದ್ದವರು ಸುಷ್ಮಾ. ಸುಷ್ಮಾ ಸ್ವರಾಜ್ ಹುಟ್ಟಿದ್ದು 1952, ಫೆಬ್ರವರಿ 14ರಂದು ಹರಿಯಾಣದ ಅಂಬಾಲಾ ಕ್ಯಾಂಟ್ನಲ್ಲಿ. ಸಂಸ್ಕೃತ ಮತ್ತು ರಾಜ್ಯಶಾಸ್ತ್ರದಲ್ಲಿ ಪದವಿ ಪಡೆದು, ಬಳಿಕ ಕಾನೂನು ಅಭ್ಯಾಸ ಮಾಡಿದ್ರು ಸುಷ್ಮಾ. 1973ರಲ್ಲಿ ಸುಪ್ರೀಂಕೋರ್ಟ್​ನಲ್ಲಿ ವಕೀಲೆಯಾಗಿ ಅಭ್ಯಾಸ ಆರಂಭಿಸಿದ್ರು.

ರಾಜಕೀಯ ಜೀವನ

1970ರ ಸುಮಾರಿಗೆ ಎಬಿವಿಪಿಯಲ್ಲಿ ಗುರಿತಿಸಿಕೊಂಡಿದ್ದವರು ಸುಷ್ಮಾ. ಬಳಿಕ 1975ರಲ್ಲಿ ಜಾರ್ಜ್​ ಫರ್ನಾಂಡಿಸ್ ಅವರು ಕಾನೂನು ರಕ್ಷಣಾ ತಂಡದ ಭಾಗವಾಗಿದ್ರು. ಇದಾದ್ಮೇಲೆ ಜಯಪ್ರಕಾಶ್ ನಾರಾಯಣರ ಕ್ರಾಂತಿ ಚಳವಳಿಯಲ್ಲಿ ಸಕ್ರಿಯವಾಗಿ ಭಾಗಿಯಾಗಿದ್ರು. ತುರ್ತು ಪರಿಸ್ಥಿತಿ ಬಳಿಕ ರಾಜಕೀಯಕ್ಕೆ ಧುಮುಕಿದವರು ಸುಷ್ಮಾ.

1977ರಲ್ಲಿ ಹರಿಯಾಣ ವಿಧಾನಸಭೆಯ ಸದಸ್ಯರಾಗಿದ್ರು. 25ನೇ ವಯಸ್ಸಿನಲ್ಲೇ ಶಾಸಕಿಯಾದ ಕೀರ್ತಿ ಸುಷ್ಮಾಗೆ ಸಲ್ಲುತ್ತೆ. ವಿಶೇಷ ಅಂದ್ರೆ, 1977ರಲ್ಲೇ ಕ್ಯಾಬಿನೆಟ್​ ಸಚಿವೆಯಾದ್ರು. 1979ರಲ್ಲಿ ಹರಿಯಾಣದ ಜನತಾ ಪಕ್ಷದ ಅಧ್ಯಕ್ಷೆ ಕೂಡ ಆದ್ರು. ಬಳಿಕ ಭಾರತೀಯ ಜನತಾ ಪಕ್ಷಕ್ಕೆ ಬಂದ ಸುಷ್ಮಾ, ಮತ್ತೆ ಹಿಂದೆ ತಿರುಗಿ ನೋಡಿದ್ದೇ ಇಲ್ಲ.

ಹರಿಯಾಣದಲ್ಲಿ ರಾಜ್ಯ ಸಚಿವೆಯಾಗಿ, ದೆಹಲಿ ಮುಖ್ಯಮಂತ್ರಿಯಾಗಿ, ಕೇಂದ್ರ ಸರ್ಕಾರದಲ್ಲಿ ವಿವಿಧ ಖಾತೆಗಳನ್ನ ನಿರ್ವಹಿಸಿದ ಖ್ಯಾತಿ ಸುಷ್ಮಾ ಸ್ವರಾಜ್​ ಅವರದ್ದು. ವಾಜಪೇಯಿ ಅವಧಿಯಲ್ಲೂ ಸಚಿವೆಯಾಗಿದ್ದ ಸುಷ್ಮಾ, ಮೋದಿ ಅವಧಿಯಲ್ಲೂ ಸಚಿವೆಯಾಗಿ ತಮ್ಮ ಖಾತೆಯನ್ನ ಸಮರ್ಥವಾಗಿ ನಿಭಾಯಿಸಿದ್ರು.

ಇಂದಿರಾಗಾಂಧಿ ಬಳಿಕ ವಿದೇಶಾಂಗ ಖಾತೆ ನಿರ್ವಹಿಸಿದ ಭಾರತದ ಎರಡನೇ ಮಹಿಳೆ ಸುಷ್ಮಾ ಸ್ವರಾಜ್​ ಆಗಿದ್ರು.