ಸಾಹೋ ಸಿನಿಮಾ ರಿಲೀಸ್​ : ಒಂದೇ ದಿನಕ್ಕೆ 60 ಕೋಟಿ ಗಳಿಕೆ ಗುರಿ..!

ಹೈದರಾಬಾದ್​/ಮುಂಬೈ : ಬಾಹುಬಲಿ ಪ್ರಭಾಸ್ ಹಾಗೂ ಶ್ರದ್ಧಾ ಅಭಿನಯದ ಬಹುನಿರೀಕ್ಷಿಸಿ, ಬಹುಕೋಟಿ ವೆಚ್ಚದ ಸಿನಿಮಾ ಸಾಹೋ ವಿಶ್ವಾದ್ಯಂತ ಬಿಡುಗಡೆಯಾಗಿದೆ. ತೆಲುಗು, ತಮಿಳು, ಮಲಯಾಳಂ, ಹಿಂದಿ ಸೇರಿದಂತೆ ನಾಲ್ಕು ಭಾಷೆಗಳಲ್ಲಿ ರಿಲೀಸ್ ಆಗಿದೆ. ಈವರೆಗೆ ಭಾರತದಲ್ಲಿ ಮೊದಲ ದಿನ ಅತೀ ಹೆಚ್ಚು ಗಳಿಕೆ ಕಂಡ ಸಿನಿಮಾ ಅಂದ್ರೆ, ಅವೇಂಜರ್ ಎಂಡ್​ ಗೇಮ್​. ಅವೇಂಜರ್​ ಎಂಡ್​ ಗೇಮ್ ಮೊದಲ ದಿನ 53 ಕೋಟಿ ಗಳಿಕೆ ಮಾಡಿತ್ತು. ಅದರಂತೆ, ಅಮೀರ್​ ಖಾನ್​​ ಅಭಿನಯದ ಥಗ್ಸ್​ ಆಫ್​ ಹಿಂದೋಸ್ತಾನ್​ ಸಿನಿಮಾ ಮೊದಲ ದಿನ 52.25 ಕೋಟಿ ಗಳಿಸಿತ್ತು. ಈ ಎರಡೂ ಸಿನಿಮಾಗಳ ದಾಖಲೆಯನ್ನ ಸಾಹೋ ಮೀರಿಸಲಿದೆ ಎಂದು ಸಿನಿಮಾ ಪಂಡಿತರು ಅಭಿಪ್ರಾಯ ಪಟ್ಟಿದ್ದಾರೆ.

ಬಾಹುಬಲಿ ಸಿನಿಮಾಗಳ ಬಳಿಕ ಪ್ರಭಾಸ್ ಅಭಿನಯದ ಸಿನಿಮಾ ರಿಲೀಸ್​ ಆಗ್ತಿದೆ. ಬಾಹುಬಲಿಗೆ ಇದ್ದಷ್ಟೇ ನಿರೀಕ್ಷೆ, ಸಾಹೋ ಮೇಲೂ ಇದೆ. ಆದ್ರೆ, ಬಾಹುಬಲಿ ಪೌರಾಣಿಕ ಸಿನಿಮಾ. ಸಾಹೋ ಇದೇ ಕಾಲಘಟ್ಟದ ಪಕ್ಕಾ ಕಮರ್ಷಿಯಲ್ ಸಿನಿಮಾ. ಹೀಗಾಗಿ ಎರಡೂ ಸಿನಿಮಾಗಳಿಗೆ ಹೋಲಿಕೆ ಬೇಡ ಅನ್ನೋದು ಸಿನಿ ಪಂಡಿತರ ವಾದ. ಆದ್ರೆ, ಸಾಹೋ ಸಿನಿಮಾ ಒಳ್ಳೇ ಓಪನಿಂಗ್ ಪಡೆಯಲಿದೆ. ಅಲ್ಲದೆ, ಒಳ್ಳೇ ಬೇಡಿಕೆ ಇದ್ದು, ಎಲ್ಲಡೆ ಉತ್ತಮ ಪ್ರದರ್ಶನ ಕಾಣುತ್ತೆ ಅಂತಿದ್ದಾರೆ ಸಿನಿ ಪಂಡಿತರು.

ಮೊದಲ ದಿನ ತೆಲುಗು ರಾಜ್ಯಗಳಾದ ಆಂಧ್ರ, ತೆಲಂಗಾಣದಲ್ಲೇ 35 ಕೋಟೆ ಗಳಿಸೋ ನಿರೀಕ್ಷೆ ಇದೆ. ತಮಿಳುನಾಡಿನಲ್ಲಿ 10 ಕೋಟಿ, ಕರ್ನಾಟಕದಲ್ಲಿ 5 ಕೋಟಿ, ಕೇರಳದಲ್ಲಿ 2 ಕೋಟಿ, ಹಿಂದಿ ಬೆಲ್ಟ್​​​15 ಕೋಟಿ ಗಳಿಸೋ ಸಾಧ್ಯತೆ ಇದೆ ಎನ್ನಲಾಗಿದೆ. ಒಟ್ಟಾರೆ ಮೊದಲ ದಿನವೇ 60 ರಿಂದ 70 ಕೋಟಿ ಗಳಿಸೋ ನಿರೀಕ್ಷೆ ನಿರ್ಮಾಪಕರದ್ದು ಹಾಗೂ ಸಿನಿಮಾ ತಂಡದ್ದಾಗಿದೆ.

ಹಾಗಿದ್ರೆ, ಬಾಹುಬಲಿ ಪ್ರಭಾಸ್​ ಸಾಹೋ ಸಿನಿಮಾ ಕೂಡ ಭಾರತೀಯ ಚಿತ್ರರಂಗದಲ್ಲಿ ಹೊಸ ಮೈಲಿಗಲ್ಲು ಸೃಷ್ಟಿಸುತ್ತಾ..? ಬಾಲಿವುಡ್​ ಸಿನಿಮಾಗಳಿಗೆ ಪ್ರಾದೇಶಿಕ ಸಿನಿಮಾ ಫೈಟ್​ ನೀಡುತ್ತಾ ಅನ್ನೋದು ಇನ್ನೆರಡು ದಿನಗಳಲ್ಲಿ ಗೊತ್ತಾಗಲಿದೆ.