ಸಂಜೆಯೊಳಗೆ ಸಚಿವರಿಗೆ ಖಾತೆಗಳ ಹಂಚಿಕೆ ಪಕ್ಕಾ : CM ಯಡಿಯೂರಪ್ಪ ಮೇಲೆ ಮುಗಿಬಿದ್ದರಾ ಅನರ್ಹರು..?

ಬೆಂಗಳೂರು/ನವದೆಹಲಿ : ಅನರ್ಹ ಶಾಸಕರ ಮನವೊಲಿಗೆ ಹಾಗೂ ಬಿಜೆಪಿ ಹೈಕಮಾಂಡ್​​ ಭೇಟಿಗೆ ದೆಹಲಿಗೆ ಹೋಗಿದ್ದ ಸಿಎಂ ಯಡಿಯೂರಪ್ಪ ಬೆಂಗಳೂರಿಗೆ ವಾಪಸ್​ ಆಗಿದ್ದಾರೆ. ತಡರಾತ್ರಿ ಬೆಂಗಳೂರಿಗೆ ಬಂದ ಯಡಿಯೂರಪ್ಪ, ಸಚಿವರ ಖಾತೆಗಳ ಹಂಚಿಕೆ ಕುರಿತು ಸ್ಪಷ್ಟನೆ ನೀಡಿದ್ರು. ಇಂದು ಸಂಜೆ ವೇಳೆಗೆ ಯಾವ ಸಚಿವರಿಗೆ ಯಾವ ಖಾತೆ ಅನ್ನೋದು ಫೈನಲ್​ ಆಗಲಿದೆ ಎಂದರು.

ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್ ಶಾ ಭೇಟಿ ವೇಳೆ ಸಾಕಷ್ಟು ವಿಚಾರಗಳ ಬಗ್ಗೆ ಚರ್ಚೆ ಆಗಿದೆ ಎಂದ ಯಡಿಯೂರಪ್ಪ, ಸುಮಾರು ಒಂದೂವರೆ ಗಂಟೆಗಳ ಕಾಲ ಅಮಿತ್ ಶಾ ಜೊತೆ ಚರ್ಚೆ ನಡೆಸಿದ್ದಾಗಿ ಹೇಳಿದ್ರು. ಆದ್ರೆ, ಅನರ್ಹ ಶಾಸಕರ ಮುಂದಿನ ನಡೆ ಕುರಿತು ಮಾತ್ರ ಬಿಎಸ್​ವೈ ಬಾಯಿ ಬಿಡಲಿಲ್ಲ.

ಈ ನಡುವೆ, ದೆಹಲಿಯಲ್ಲೇ ಬೀಡು ಬಿಟ್ಟಿರೋ ಅನರ್ಹ ಶಾಸಕರು, ಯಡಿಯೂರಪ್ಪ ಮೇಲೆ ಕೆಂಡಾಮಂಡಲರಾಗಿದ್ದಾರೆ ಎನ್ನಲಾಗಿದೆ. ಈವರೆಗೆ ತಮ್ಮ ಬಗ್ಗೆ ಯಾವುದೇ ರೀತಿಯ ಕಾಳಜಿ ತೋರಿಸುತ್ತಿಲ್ಲ. ದೆಹಲಿಗೆ ಬಂದರೂ ಹೈಕಮಾಂಡ್​ ಮಟ್ಟದ ನಾಯಕರು ಯಾರು ನಮ್ಮನ್ನ ಮಾತಾಡಿಸುತ್ತಿಲ್ಲ. ನಮ್ಮಿಂದಾಗಿ ಸರ್ಕಾರ ರಚಿಸಿ, ನಮ್ಮನ್ನೇ ಅತಂತ್ರ ಮಾಡಿದ್ದೀರಿ ಎಂದು ಯಡಿಯೂರಪ್ಪ ಮೇಲೆ ಅನರ್ಹ ಶಾಸಕರು ಗರಂ ಆಗಿದ್ದರು ಎನ್ನಲಾಗಿದೆ.