ಯಡಿಯೂರಪ್ಪ ಸಂಪುಟದಲ್ಲಿ ಲಿಂಗಾಯತರೇ ಸಿಂಹಪಾಲು : ಉಳಿದವರಿಗೆ ಮೋಸ ಮಾಡಿದ್ರಾ BSY..?

ಬೆಂಗಳೂರು : ಯಡಿಯೂರಪ್ಪ ಸಚಿವ ಸಂಪುಟದಲ್ಲಿ ಲಿಂಗಾಯತರಿಗೆ ಬಹುಪಾಲು ಸಿಕ್ಕಿದೆ. 17 ಸಚಿವರ ಪೈಕಿ ಸಿಎಂ ಬಿಎಸ್​ವೈ ಸೇರಿ 8 ಮಂದಿ ಲಿಂಗಾಯತ ಸಮುದಾಯದವರೇ ಇದ್ದಾರೆ. ಅಂದ್ರೆ, ಸರಿ ಸುಮಾರು ಶೇಕಡಾ 44 ರಷ್ಟು ಮಂದಿ ಲಿಂಗಾಯತರು ಸಂಪುಟದಲ್ಲಿ ಸ್ಥಾನ ಪಡೆದಿದ್ದಾರೆ. ಯಾರೆಲ್ಲಾ ಲಿಂಗಾಯತ ಸಚಿವರಿದ್ದಾರೆ, ಯಾಕೆ ಅವರನ್ನ ಆಯ್ಕೆ ಮಾಡಲಾಗಿದೆ ಅನ್ನೋದನ್ನ ನೋಡೋಣ.

ಜಗದೀಶ್​ ಶೆಟ್ಟರ್​. ಮಾಜಿ ಮುಖ್ಯಮಂತ್ರಿಯಾಗಿದ್ದ ಶೆಟ್ಟರ್ ಈಗ ಸಚಿವರಾಗಿದ್ದಾರೆ. 6 ಬಾರಿ ಶಾಸಕರಾಗಿ ಆಯ್ಕೆಯಾದ ಶೆಟ್ಟರ್​ ಹಿರಿಯರು. ಉತ್ತರ ಕರ್ನಾಟಕದಲ್ಲಿ ಲಿಂಗಾಯತರ ಪ್ರಭಾವಿ ನಾಯಕ. ಹೀಗಾಗಿ, ಶೆಟ್ಟರ್​ ಈಗ ಮಂತ್ರಿಯಾಗಿದ್ದಾರೆ.

ಬಸವರಾಜ್​ ಬೊಮ್ಮಾಯಿ : ಹಾವೇರಿ ಜಿಲ್ಲೆಯ ಬಿಜೆಪಿ ಪ್ರಭಾವಿ ಜೊತೆಗೆ ಲಿಂಗಾಯಿತ ನಾಯಕ. ಯಡಿಯೂರಪ್ಪಗೆ ಆಪ್ತರೂ ಕೂಡ. ಸಮ್ಮಿಶ್ರ ಸರ್ಕಾರ ಬೀಳಿಸುವಾಗ, ಬಿಎಸ್​ವೈ ಜೊತೆ ನಿಂತವರು ಬೊಮ್ಮಾಯಿ. 3 ಬಾರಿ ಶಾಸಕರು ಕೂಡ. ಈ ಎಲ್ಲಾ ಅರ್ಹತೆಗಳಿಂದ ಬೊಮ್ಮಾಯಿಗೆ ಮಂತ್ರಿ ಸ್ಥಾನ ಸಿಕ್ಕಿದೆ.

ಜೆ.ಸಿ. ಮಾಧುಸ್ವಾಮಿ : ಬಹುಶಃ ಮಾಧುಸ್ವಾಮಿ ಅವರ ಮಾತುಗಾರಿಕೆ ಇಲ್ಲದೇ ಇದ್ದಿದ್ದರೆ, ಸಮ್ಮಿಶ್ರ ಸರ್ಕಾರ ಇದ್ದಾಗ ಸದನದಲ್ಲಿ ಯಡಿಯೂರಪ್ಪ ಆತುರ ಪಟ್ಟು ಸೋಲುತ್ತಿದ್ದರೇನೋ. ಅಷ್ಟು ಚೆನ್ನಾಗಿ ಮಾಧುಸ್ವಾಮಿ, ಪರಿಸ್ಥಿತಿಯನ್ನ ನೋಡಿಕೊಂಡು ಮಾತನ್ನ ಆಡಿದ್ರು. ಅದರ ಫಲವಾಗಿ ಮಾಧುಸ್ವಾಮಿ ಇವತ್ತು ಮಂತ್ರಿಯಾಗಿದ್ದಾರೆ. ಅಲ್ಲದೆ, ಬಿಎಸ್​ವೈ ಆಪ್ತರು, ಲಿಂಗಾಯತರು ಅನ್ನೋ ಕಾರಣ ಜೊತೆಗೆ ತುಮಕೂರನ್ನ ಪ್ರತಿನಿಧಿಯಾಗಿ ಮಾಧುಸ್ವಾಮಿ ಮಿನಿಸ್ಟರ್​ ಆಗಿದ್ದಾರೆ.

ವಿ.ಸೋಮಣ್ಣ : ಐದು ಬಾರಿ ಶಾಸಕರಾಗಿರೋ ವಿ.ಸೋಮಣ್ಣ ಮೇಲೆ ಹೈಕಮಾಂಡ್​ ಜೊತೆಗೆ ಹಲವು ಮಠಗಳ ಪ್ರಭಾವವಿದೆ. ಇದೇ ಕಾರಣಕ್ಕೆ ವಿ.ಸೋಮಣ್ಣ ಆಯ್ಕೆ ನಡೆದಿದೆ. ಯಡಿಯೂರಪ್ಪ ಜೊತೆ ಈಗ ಅಷ್ಟಕ್ಕೆ ಅಷ್ಟೇ ಆಗಿದ್ರೂ, ಸಂತೋಷ್​ ಜೊತೆ ಚೆನ್ನಾಗಿದ್ದಾರೆ. ಮೈಸೂರು ಭಾಗದಲ್ಲಿ ಲಿಂಗಾಯತ ಲೀಡರ್​. ಹೀಗಾಗಿ ಸೋಮಣ್ಣ ಆಯ್ಕೆಯಾಗಿದ್ದಾರೆ.

ಲಕ್ಷ್ಮಣ ಸವದಿ. ಶಾಸಕರು ಅಲ್ಲದೇ ಇದ್ರೂ, ಲಕ್ಷ್ಮಣ ಸವದಿ ಮಿನಿಸ್ಟರ್ ಆಗಿದ್ದೇ ಅಚ್ಚರಿ. ಇದಕ್ಕೆ ಬೆಳಗಾವಿ ಬೇಗುದಿ ಕಾರಣ ಎನ್ನಲಾಗ್ತಿದೆ. ಲಿಂಗಾಯತ ಲೀಡರ್ ಅನ್ನೋ ಜೊತೆಗೆ ಜಾರಕಿಹೊಳಿ ಬಣದಲ್ಲಿ ಗುರುತಿಸಿಕೊಂಡಿದ್ರು. ಉಮೇಶ್​ ಕತ್ತಿಗೆ ಸ್ಥಾನ ತಪ್ಪಿಸಿ, ಸವದಿಗೆ ನೀಡಿದ್ದಾರೆ.

ಸಿ.ಸಿ.ಪಾಟೀಲ್​. ಇವರು ಕೂಡ ಲಿಂಗಾಯತ ಲೀಡರ್. ಯಡಿಯೂರಪ್ಪ ಆಪ್ತ. ಸವದಿಗೂ ಆಪ್ತರು. ಕೊನೇ ಕ್ಷಣದವರೆಗೆ ಇವರೇ ಹೆಸರೇ ಪಟ್ಟಿಯಲ್ಲಿ ಇರಲಿಲ್ಲ. ಆದ್ರೂ, ಮಿನಿಸ್ಟರ್ ಆಗಿದ್ದು ಎಲ್ಲರಿಗೂ ಶಾಕ್​ ಕೊಡ್ತು.

ಶಶಿಕಲಾ ಜೊಲ್ಲೆ : ಹಿರಿಯೂರು ಶಾಸಕಿ, ಪೂರ್ಣಿಮಾಗೆ ಯಾದವ ಸಮುದಾಯದ ಪ್ರತಿನಿಧಿಯಾಗಿ ಮಿನಿಸ್ಟರ್​ ಆಗೋ ಚಾನ್ಸ್​ ಇತ್ತು. ಆದ್ರೆ, ಜೊಲ್ಲೆ ಮೂರು ಬಾರಿ ಶಾಸಕಿಯಾಗಿರೋದ್ರಿಂದ ಸಚಿವ ಸ್ಥಾನ ಒಲಿದಿದೆ.

ಒಟ್ಟಿನಲ್ಲಿ ಯಡಿಯೂರಪ್ಪ ಸಂಪುಟದಲ್ಲಿ ಒಟ್ಟು, ಬಿಎಸ್​ವೈ ಸೇರಿ 18 ಮಂದಿ ಇದ್ದಾರೆ. ಇದ್ರಲ್ಲಿ 8 ಮಂದಿ ಲಿಂಗಾಯತರೇ ಇರೋದು ಹಲವು ಚರ್ಚೆಗೆ ಕಾರಣವಾಗಿದೆ. ಸಾಮಾಜಿಕ ನ್ಯಾಯ ಸಿಕ್ಕಿಲ್ಲ ಅನ್ನೋ ಅಸಮಾಧಾನ ಸದ್ಯ ಪಕ್ಷದಲ್ಲಿ ಶುರುವಾಗಿದೆ.