ಬಾಲಕಿ ಕತ್ತು ಸೀಳಿದ ಗಾಳಿಪಟ ದಾರ : ಖುಷಿಯಿಂದ ತಂದೆ ಬೈಕ್​​ನಲ್ಲಿ ಹೋಗುತ್ತಿದ್ದಾಗ ಹಾರಿ ಹೋಯ್ತು ಪ್ರಾಣ..!

ನವದೆಹಲಿ : ಜೀವನದಲ್ಲಿ ಏನು ಬೇಕಾದರೂ ಆಗಬಹುದು ಅನ್ನೋದಕ್ಕೆ ಈ ದುರಂತ ಘಟನೆ ಸಾಕ್ಷಿ. ತಂದೆಯ ಬೈಕಿನಲ್ಲಿ ಖುಷಿ ಖುಷಿಯಾಗಿ ಹೋಗ್ತಿದ್ದ ವೇಳೆ ಇದ್ದಕ್ಕಿದ್ದಂತೆ ಪುಟ್ಟ ಬಾಲಕಿಯ ಪ್ರಾಣ ಪಕ್ಷಿಯೇ ಹಾರಿಹೋಗಿದೆ. ಇದಕ್ಕೆ ಕಾರಣವಾಗಿದ್ದು ಗಾಳಿಪಟಕ್ಕೆ ಬಳಸುವ ಮಾಂಜಾ ದಾರ..

ಹೌದು, ಇದು ಅಚ್ಚರಿಯಾದರೂ ಸತ್ಯ. ಈ ದಾರುಣ ಘಟನೆ ನಡೆದಿರೋದು ದೆಹಲಿಯಲ ಛಜೂರಿ ಖಾಸ್ ಪ್ರದೇಶದಲ್ಲಿ.

ಇಷ್ಟಕ್ಕೂ ಆಗಿದ್ದೇನು ಗೊತ್ತಾ..?

ಐದು ವರ್ಷದ ಬಾಲಕಿ ಇಷಿಕಾ, ತನ್ನ ತಂದೆ ಜೊತೆ ದೆಹಲಿಯ ಜಮುನಾ ಬಜಾರ್​ ರಸ್ತೆಯಲ್ಲಿರೋ ಹನುಮಾನ್​ ದೇವಾಲಯಕ್ಕೆ ಹೋಗ್ತಿದ್ರು. ತಂದೆಯ ಬೈಕಿನಲ್ಲಿ ಇಷಿಕಾ ಖುಷಿ ಖುಷಿಯಾಗಿ ಹೋಗಿದ್ದಳು. ಈ ವೇಳೆ, ಎಲ್ಲಿಂದಲೋ ಹಾರಿ ಬಂದ ಗಾಳಿಪಟದ ದಾರ, ಬಾಲಕಿಯ ಕುತ್ತಿಗೆಯನ್ನೇ ಸೀಳಿದೆ. ತಕ್ಷಣ ಇಷಿಕಾಳನ್ನ ಸ್ಥಳೀಯ ಆಸ್ಪತ್ರೆಗೆ ದಾಖಲು ಮಾಡಲಾಯ್ತು. ಆದ್ರೆ, ಅಷ್ಟೊತ್ತಿಗಾಗ್ಲೇ ಬಾಲಕಿ ಇಷಿಕಾಳ ಪ್ರಾಣವೇ ಹಾರಿಹೋಗಿತ್ತು.

ಇಷಿಕಾ ತಂದೆಯ ಬೈಕ್​​ನಲ್ಲಿ ಮುಂದೆ ಕುಳಿತುಕೊಂಡಿದ್ದಳು. ಇಷಿಕಾ ಜೊತೆ ಮತ್ತೊಬ್ಬ ಸಹೋದರಿ ಕೂಡ ಬೈಕಿನಲ್ಲಿ ಇದ್ದರು ಎನ್ನಲಾಗಿದೆ. ನಿರ್ಲಕ್ಷ್ಯದಿಂದ ಸಾವು ಎಂಬ ಅಡಿಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ನಡೆದಿದೆ. ಆದ್ರೆ,ಯಾರೋ ಮಾಡಿದ ತಪ್ಪಿಗೆ ಪುಟ್ಟ ಬಾಲಕಿ ಬಲಿಯಾಗಿದ್ದು ಮಾತ್ರ ದಾರುಣ.