Featured
ಪ್ರವಾಹ ಅವಲೋಕನ ಮಾಡದ ಪ್ರಧಾನಿ ಚಂದ್ರಯಾನ ಸ್ಪರ್ಶ ವೀಕ್ಷಿಸಲು ಆಗಮನ: ಕಾಂಗ್ರೆಸ್ ಫ್ಲೆಕ್ಸ್
ಬೆಂಗಳೂರು/ ಹುಬ್ಬಳ್ಳಿ ಭಾರತದ ಬಾಹ್ಯಾಕಾಶ ಸಾಧನೆಗೆ ನಾಳೆಯೊಂದು ಮೈಲಿಗಲ್ಲು, ಕಾರಣ ತಿಂಗಳ ಹಿಂದೆ ( ಜುಲೈ ೨೨) ಹಾರಿಬಿಟ್ಟ ಚಂದ್ರಯಾನ ೨ ವ್ಯೋಮನೌಕೆ ಹಂತ ಹಂತವಾಗಿ ಚಂದ್ರನ ಕಕ್ಷೆಯತ್ತ ದಾಪುಗಾಲು ಹಾಕಿ ಈಗ ಕೊನೆಯ ಹಂತ ಅಂದರೆ ರೋವರ್ನ್ನ ಚಂದ್ರನ ಅಂಗಳಕ್ಕೆ ಇಳಿಸುವ ಕಾರ್ಯ ಬಾಕಿ ಇದೆ. ಈ ಹಂತವನ್ನ ನಾಳೆ ಯಶಸ್ವಿಯಾಗಿ ಪೂರೈಸಲು ವಿಜ್ಞಾನಿಗಳು ಕಾತರರಾಗಿದ್ದಾರೆ. ಈ ಕ್ಷಣವನ್ನ ಲೈವ್ ಆಗಿ ನೋಡಲು ಇಸ್ರೋದಲ್ಲಿ ವ್ಯವಸ್ಥೆ ಮಾಡಲಾಗಿದ್ದು ಪ್ರಧಾನಿ ಮೋದಿ ಭಾಗವಹಿಸಲಿದ್ದಾರೆ.
ಪ್ರಧಾನಿ ಮೋದಿಯ ವೇಳಾಪಟ್ಟಿ ಹೀಗಿದೆ
ನಾಳೆ ರಾತ್ರಿ ೯;೩೦ಕ್ಕೆ ಬೆಂಗಳೂರಿನ ಯಲಹಂಕ ವಾಯುನೆಲೆಗೆ ಆಗಮನ, ರಾತ್ರಿ ಹತ್ತು ಗಂಟೆಗೆ ಇಸ್ರೋದ ಗೆಸ್ಟ್ ಹೌಸ್ನಲ್ಲಿ ವಿಶ್ರಾಂತಿ, ಮುಂಜಾನೆ ೧:೧೫ಕ್ಕೆ ಇಸ್ರೋ ಕಚೇರಿಗೆ ಆಗಮನ, ೧:೩೦ರಿಂದ ೭ರವರೆಗೆ ಇಸ್ರೋದಲ್ಲೇ ಇರಲಿದ್ದಾರೆ. ಮುಂಜಾನೆ ಪುನಃ ದೆಹಲಿಗೆ ವಾಪಸ್ ಆಗಲಿದ್ದಾರೆ. ಈ ಮಧ್ಯೆ ಬಿಜೆಪಿ ನಾಯಕರು ಹೇಗಾದರೂ ಮಾಡಿ ಭೇಟಿ ಮಾಡುವ ಇರಾದೆ ಹೊಂದಿದ್ದಾರೆ.
ರಾಜ್ಯ ಪ್ರವಾಹಕ್ಕೆ ತತ್ತರಿಸಿದರೂ ಬಾರದ ಪ್ರಧಾನಿ ಚಂದ್ರಯಾನ ಸ್ಫರ್ಶ ನೋಡಲು ಆಗಮಿಸುತ್ತಿರುವುದು ಕಾಂಗ್ರೆಸ್ ನಾಯಕರಿಗೆ ಬೇಸರ ತಂದಿದ್ದು ಹುಬ್ಬಳ್ಳಿ-ಧಾರವಾಡ ಜಿಲ್ಲಾ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ರಜತ್ ಉಳ್ಳಾಗಡ್ಡಿಮಠ ವಿಭಿನ್ನ ರೀತಿಯ ಫ್ಲೆಕ್ಸ್ ಮಾಡಿಸಿದ್ದಾರೆ. ರಾಜ್ಯ ಪ್ರವಾಹದಿಂದ ತತ್ತರಿಸಿದರೂ ಬಾರದ ಇವರು ಚಂದ್ರಯಾನ ವೀಕ್ಷಣೆಗೆ ಆಗಮಿಸುತ್ತಿರುವುದಕ್ಕೆ ಆಕ್ರೋಶ ವ್ಯಕ್ತಪಡಿಸಿ ಹುಬ್ಬಳ್ಳಿ ಚೆನ್ನಮ್ಮ ಸರ್ಕಲ್ ಬಳಿ ಫ್ಲೆಕ್ಸ್ ಹಾಕಿದ್ದಾರೆ.
