ಡಿಸೆಂಬರ್​ ಜನವರಿಗೆ ಮಧ್ಯಂತರ ಚುನಾವಣೆ ಫಿಕ್ಸ್​..! ಸಿದ್ದು ಈ ಮಾತು ಹೇಳಿದ್ದು ಯಾಕೆ..?

ಮೈಸೂರು : ಮಾಜಿ ಸಿಎಂ ಸಿದ್ದರಾಮಯ್ಯ ಅದ್ಯಾಕೋ ಏನೋ ಪದೇ ಪದೇ ಮಧ್ಯಂತರ ಚುನಾವಣೆ ಬಗ್ಗೆ ಮಾತಾಡುತ್ತಲೇ ಇದ್ದಾರೆ. ಇವತ್ತು ಕೂಡ ಮೈಸೂರಿನಲ್ಲಿ ಮಾತನಾಡಿದ ಸಿದ್ದರಾಮಯ್ಯ ಡಿಸೆಂಬರ್​ ಅಥವಾ ಜನವರಿಯಲ್ಲಿ ಮಧ್ಯಂತರ ಚುನಾವಣೆ ಆಗುತ್ತೆ ಎಂದು ಭವಿಷ್ಯ ನುಡಿದಿದ್ದಾರೆ. ಇಷ್ಟು ದಿನ ಮಧ್ಯಂತರ ಚುನಾವಣೆ ಅಂತಿದ್ದ ಸಿದ್ದು, ಈ ಬಾರಿ ಡಿಸೆಂಬರ್​ ಅಂತ ಹೇಳಿದ್ದು, ತಿಂಗಳು ಕೂಡ ಹೇಳಿದ್ದಾರೆ ಅಂದ್ರೆ, ಇಲ್ಲೇನೋ ಇದೆ ಅನ್ನೋ ಸಂಶಯ ರಾಜಕೀಯ ಪಂಡಿತರು ವ್ಯಕ್ತಪಡಿಸಿದ್ದಾರೆ.

ಸರ್ಕಾರವೇ ಇಲ್ಲ.. ಟೇಕಾಫ್​ ಎಲ್ಲಾಗುತ್ತೆ..?

ಇದೇ ವೇಳೆ ಮಾತ್ನಾಡಿದ ಸಿದ್ದು, ಬಿಜೆಪಿ ಸರ್ಕಾರ ರಚನೆಯಾಗಿ 25 ದಿನ ಯಡಿಯೂರಪ್ಪ ಒಬ್ಬರೇ ಸಿಎಂ ಆಗಿದ್ದರು. ಈಗ 17 ಸಚಿವರಿದ್ದಾರೆ. ರಾಜ್ಯದಲ್ಲಿ ಸರ್ಕಾರವೇ ಇಲ್ಲ. ಇನ್ನೂ ಟೇಕಾಫ್​ ಆಗೋದು ಹೇಗೆ ಅಂತ ವ್ಯಂಗ್ಯವಾಡಿದ್ರು.

ಈ ಮಧ್ಯೆ, ಅನರ್ಹ ಶಾಸಕರ ಸ್ಥಿತಿ ಕೂಡ ಡೋಲಾಯಮಾನವಾಗಿದೆ. ಅವರ ಮುಂದಿನ ನಡೆ ಏನು ಅನ್ನೋದು ಇನ್ನೂ ಗೊತ್ತಾಗಿಲ್ಲ. ಜೊತೆಗೆ ಉಪಚುನಾವಣೆ ಆಗುತ್ತಾ ಇಲ್ವಾ ಅನ್ನೋದರ ಬಗ್ಗೆ ಯಾರೂ ಮಾತಾಡ್ತಿಲ್ಲ. ಚುನಾವಣಾ ಆಯೋಗ ಕೂಡ ಉಪ ಚುನಾವಣೆ ಇಲ್ಲ ಎಂದು ಹೇಳಿದೆ.

ಇತ್ತ ಸಿದ್ದರಾಮಯ್ಯ ಮಾತ್ರ ಮಧ್ಯಂತರ ಚುನಾವಣೆ ಹಾಗೂ ಉಪ ಚುನಾವಣೆಗೆ ಕಾಂಗ್ರೆಸ್​ ಕಾರ್ಯಕರ್ತರು ಸಿದ್ಧರಾಗಿ ಎಂದು ಘೋಷಣೆಯನ್ನೇ ಹೊರಡಿಸಿದ್ದಾರೆ. ಒಟ್ಟಿನಲ್ಲಿ ರಾಜ್ಯ ರಾಜಕೀಯದಲ್ಲಿ ಯಾವ ಕ್ಷಣದಲ್ಲಿ ಏನು ಬೇಕಾದರೂ ಆಗಬಹುದು ಎಂದು ಸಿದ್ದು ಹೇಳಿದ್ದು, ಮುಂದಿನ ದಿನಗಳಲ್ಲಿ ಏನಾಗುತ್ತೆ ಅನ್ನೋದನ್ನ ಕಾದುನೋಡಬೇಕಿದೆ.